Congo School Fire: ડેમોક્રેટિક રિપબ્લિક ઑફ કાંગોમાં ભયાનક આગ લાગવાથી બે શાળાના ઓછામાં ઓછા 24 બાળકોનાં મોત થયા છે. આગની ઘટના વિદ્રોહીઓના કબજાવાળા બુકાવુ વિસ્તારમાં બની છે. અહેવાલમાં કેટલાક પુખ્ત વયના લોકોનાં પણ મોત થયાનું જણાવવામાં આવ્યું છે. ગીચ વસ્તી ધરાવતા વિસ્તારમાં આગ લાગવાથી મૃત્યુ પામનારાઓની સંખ્યા હજુ વધી શકે છે. બચી ગયેલા લોકોને નજીકની હોસ્પિટલોમાં લઈ જવામાં આવ્યા છે. ઘટનાસ્થળેથી ભયાનક ફૂટેજ સામે આવ્યા છે, જેમાં બાળકો હોસ્પિટલના ફર્શ પર પીડાથી કણસતા જોવા મળી રહ્યા છે.
વિસ્તાર પર કબજો ધરાવતા વિદ્રોહી જૂથ M23એ જણાવ્યું કે 24 લોકોનાં મોત થયા છે. 29 લોકોની સ્થાનિક હોસ્પિટલોમાં સારવાર ચાલી રહી છે. આગ લાગવાથી આશરે 300 ઘર બળીને ખાખ થઈ ગયા છે. આવી સ્થિતિમાં મૃતકોની સંખ્યા વધવાની આશંકા છે. આગ લાગવાનું કારણ જાણી શકાયું નથી.
આગની ઝપેટમાં આવી શાળાઓ
સ્થાનિક વિસ્તારના પ્રશાસક મોસે લુબાલાના જણાવ્યા અનુસાર, આગ એક ઘરમાં શરૂ થઈ હતી અને ત્યારબાદ નજીકની બે શાળાઓ સુધી ફેલાઈ ગઈ હતી. લુબાલાએ જણાવ્યું કે ઘણા વિદ્યાર્થીઓ ફુરાહા સેકન્ડરી સ્કૂલની અંદર ફસાઈ ગયા હતા અને કેટલાકનો શ્વાસ રૂંધાવા લાગ્યો હતો. નર્સ સિઝા જીન-બાપ્ટિસ્ટે જણાવ્યું કે ફુરાહા અને ઉજામા પ્રાઇમરી સ્કૂલના વિદ્યાર્થીઓને સ્કૂલ યુનિફોર્મમાં જ હેલ્થ સેન્ટર લઈ જવામાં આવ્યા હતા.
બારીઓમાંથી કૂદવા લાગ્યા વિદ્યાર્થીઓ
લુબાલાએ કહ્યું કે બહાર નીકળવાનો રસ્તો ખૂબ સાંકડો હતો, તેથી કેટલાક વિદ્યાર્થીઓ બારીઓમાંથી કૂદવા લાગ્યા, જ્યારે કેટલાક દરવાજા તરફ દોડ્યા. બહાર નીકળવાની અફરાતફરીમાં વિદ્યાર્થીઓ એકબીજા સાથે અથડાઈ ગયા અને પગ તળે કચડાઈ ગયા. સમાચાર એજન્સી રોયટર્સે એક પ્રત્યક્ષદર્શીના હવાલાથી જણાવ્યું કે ગુરુવારે બપોર સુધીમાં આગ બુઝાવી દેવામાં આવી હતી, પરંતુ કાટમાળ અને ટીનની ચાદરોમાંથી હજુ પણ ધુમાડો નીકળી રહ્યો હતો.
બુકાવુ શહેર કાંગોના સાઉથ કિવુ પ્રાંતની રાજધાની છે. આ દેશના પર્વતીય વિસ્તારોમાં વસેલું સૌથી વધુ વસ્તી ધરાવતા શહેરોમાંનું એક છે. ગયા વર્ષે ફેબ્રુઆરીમાં અહીં M23 વિદ્રોહીઓએ કબજો કરી લીધો હતો. સ્થાનિક પ્રશાસક લુબાલાએ જણાવ્યું કે જ્યાં આગ લાગી હતી તે ગીચ વસ્તી ધરાવતો વિસ્તાર છે અને ત્યાં મોટા ભાગનાં ઘર લાકડાંનાં બનેલા છે.
