FBI Alert Iran Drone Attack: અમેરિકાને હવે ઈરાનના હુમલાનો ડર સતાવી રહ્યો છે. અમેરિકાની ફેડરલ ઇન્વેસ્ટિગેશન બ્યુરો (FBI) એ કેલિફોર્નિયામાં પોલીસ વિભાગને ચેતવણી આપી છે કે ઈરાન અમેરિકાના પશ્ચિમ કિનારા પર ડ્રોન હુમલા કરી શકે છે. FBI એલર્ટને ટાંકીને પોતાના રિપોર્ટમાં આ ખુલાસો કર્યો છે. એલર્ટમાં કહેવામાં આવ્યું છે કે અમેરિકી હુમલાનો બદલો લેવા માટે ઈરાન આવા હુમલા કરી શકે છે.
આ ચેતવણી એવા સમયે આવી છે જ્યારે અમેરિકા અને ઇઝરાયેલના હુમલા બાદ મધ્ય પૂર્વમાં યુદ્ધ ફાટી નીકળ્યું છે. ઈરાને જવાબી હુમલામાં ઇઝરાયેલ અને સમગ્ર મધ્ય પૂર્વમાં અમેરિકી ઠેકાણાઓને નિશાન બનાવ્યા છે. એલર્ટમાં ગુપ્ત માહિતીના આધારે જણાવાયું છે કે ઈરાને અમેરિકી તટ નજીક એક જહાજ પરથી ડ્રોન લોન્ચ કરવાના વિચાર પર વિચારણા કરી હતી.
અમેરિકી તટ પાસે હુમલાનો પ્લાન
FBI ની ચેતવણીમાં કહેવામાં આવ્યું છે કે અમને તાજેતરમાં માહિતી મળી છે કે ‘ફેબ્રુઆરી 2026 ની શરૂઆતમાં ઈરાન કથિત રીતે અમેરિકાના દરિયાકિનારા પાસે એક અજાણ્યા જહાજ પરથી માનવરહિત એરિયલ વ્હીકલ (ડ્રોન) નો ઉપયોગ કરીને અચાનક હુમલો કરવાનો પ્રયાસ કરી રહ્યું હતું.’ આમાં કહેવામાં આવ્યું છે કે કેલિફોર્નિયામાં અજાણ્યા ટાર્ગેટ તેના નિશાન પર હતા.
FBI પાસે હજુ પણ પૂરી માહિતી નથી
એલર્ટમાં એવું પણ કહેવામાં આવ્યું છે કે હાલમાં આ બાબતે ઓપરેશનલ વિગતોનો અભાવ છે. FBI એ જણાવ્યું કે તેમની પાસે હુમલાના સમય, પદ્ધતિ અને ટાર્ગેટની સાથે જ ગુનેગારો વિશે કોઈ ચોક્કસ માહિતી નથી. ચેતવણીમાં એ નથી જણાવાયું કે કયા શહેરો અને સ્થળોને ટાર્ગેટ કરવામાં આવી શકે છે.
અમેરિકી રાષ્ટ્રપતિ ડોનાલ્ડ ટ્રમ્પે એલર્ટમાં વ્યક્ત કરવામાં આવેલી ચિંતાઓને ફગાવી દીધી છે. જ્યારે તેમને પૂછવામાં આવ્યું કે શું તેમને અમેરિકાની અંદર ઈરાનની બદલાની કાર્યવાહીનો ડર છે, તો ટ્રમ્પે જવાબ આપ્યો, “ના, મને નથી.” જોકે, એલર્ટ મળ્યા બાદ કેલિફોર્નિયાએ સુરક્ષાને લઈને દેખરેખ વધારી દીધી છે.
