Greenland Sovereignty US Dispute: અમેરિકાના કબજાના વિચાર વિરુદ્ધ ગ્રીનલેન્ડમાં વિરોધ તેજ થતો જઈ રહ્યો છે. ગ્રીનલેન્ડની સરકારના કડક વલણ બાદ હવે તમામ રાજકીય પક્ષો આ મુદ્દે એકસાથે આવી ગયા છે. ગ્રીનલેન્ડના પક્ષના નેતાઓએ સાથે આવીને અમેરિકાના ટાપુ પર નિયંત્રણ કરવાના નિવેદનોને ફગાવી દીધા છે. ગ્રીનલેન્ડના રાજકીય પક્ષોએ કહ્યું છે કે અમે અમેરિકાની જબરદસ્તી ઈચ્છતા નથી. ગ્રીનલેન્ડનું ભવિષ્ય નક્કી કરવાનો હક અહીંના લોકો પાસે હોવો જોઈએ.
ગ્રીનલેન્ડના પ્રધાનમંત્રી જેન્સ-ફ્રેડરિક નીલસન અને ચાર પક્ષના નેતાઓ તરફથી શુક્રવારે રાત્રે જાહેર કરવામાં આવેલા એક નિવેદનમાં કહેવામાં આવ્યું છે કે, ‘અમે અમેરિકન બનવા નથી માંગતા અને ના તો અમે ડેનિશ બનવા માંગીએ છીએ. અમે ગ્રીનલેન્ડવાસી બનવા માંગીએ છીએ અને અમને તે જ રહેવા દેવામાં આવે. ગ્રીનલેન્ડનું ભવિષ્ય ગ્રીનલેન્ડના લોકો જ નક્કી કરશે.’
અમારા પર દબાણ ન બનાવવામાં આવે
નિવેદનમાં કહેવામાં આવ્યું છે કે, ‘ગ્રીનલેન્ડના પક્ષના નેતાઓ તરીકે અમે ફરી એકવાર એ વાત પર ભાર મૂકવા માંગીએ છીએ કે અમારા દેશ પ્રત્યે અમેરિકાની નફરત ખતમ થવી જોઈએ. ગ્રીનલેન્ડના ભવિષ્ય પર કામ ગ્રીનલેન્ડના લોકો સાથેની વાતચીતમાં થાય છે અને તેને આંતરરાષ્ટ્રીય કાયદાઓના આધારે જ તૈયાર કરવામાં આવે છે.’
નિવેદનમાં આગળ કહેવામાં આવ્યું છે કે ગ્રીનલેન્ડમાં કોઈ બીજો દેશ આમાં દખલગીરી કરી શકે નહીં. અમારે અમારા દેશનું ભવિષ્ય પોતે જ નક્કી કરવું પડશે. આ કોઈપણ દબાણ, ઉતાવળ, વિલંબ કે બીજા દેશોની દખલગીરી વગર થશે. આ નિવેદન પર નીલસન, પેલે બ્રોબર્ગ, મ્યુટે બી એગેડે, એલેકા હેમન્ડ અને અક્કાલુ સી જેરિમિસેને સહી કરી છે.
ગ્રીનલેન્ડની ખાસિયત
ગ્રીનલેન્ડ દુનિયાનો એક અત્યંત મહત્વનો ટાપુ છે. તેની વસ્તી લગભગ ૫૭,૦૦૦ છે. ગ્રીનલેન્ડના પોતાના પીએમ બને છે પરંતુ તેની પોતાની કોઈ સેના નથી. ગ્રીનલેન્ડની સુરક્ષા ડેનમાર્કની સેના સંભાળે છે. અમેરિકા તરફથી કહેવામાં આવી રહ્યું છે કે તે કોઈપણ સંજોગોમાં ગ્રીનલેન્ડને પોતાના કબજામાં લેવા માંગે છે. અમેરિકાના ટ્રમ્પ પ્રશાસન તરફથી આવી રહેલા આ નિવેદનોએ ડેનમાર્ક અને ગ્રીનલેન્ડની ચિંતામાં વધારો કર્યો છે.
