H1B Visa Interview: ડોનાલ્ડ ટ્રમ્પ પ્રશાસને અમેરિકન H-1B વિઝા હોલ્ડર ભારતીયોની ચિંતામાં ફરી એકવાર વધારો કર્યો છે. અંતિમ સમયે અમેરિકાએ ભારતમાં આ મહિને (ડિસેમ્બર) થનારા ઇન્ટરવ્યૂ આગામી વર્ષે માર્ચ-એપ્રિલ સુધી ટાળી દીધા છે. આનાથી ઘણા વિઝાધારકોનું અમેરિકા પાછા ફરવાનું અટકી ગયું છે. ઇમિગ્રેશન વકીલોએ H-1B વિઝા હોલ્ડર્સને સલાહ આપી છે કે તેઓ હાલમાં ભારતની યાત્રા ન કરે. નિષ્ણાતોનું કહેવું છે કે H-1B વિઝા હોલ્ડર્સના પ્રવાસ કરવાથી તેમની નોકરી ખતરામાં આવી શકે છે.
રિપોર્ટ મુજબ, ડિસેમ્બરમાં થનારા વિઝા ઇન્ટરવ્યૂ ટળવાથી સેંકડો ભારતીય H-1B વિઝાધારકો મુશ્કેલીમાં છે. ઇમિગ્રેશન વિશેષજ્ઞ રાહુલ રેડ્ડીએ ચેતવણી આપી છે કે હાલમાં ભારતની યાત્રા કરનારા H-1B કર્મચારીઓને નોકરી ગુમાવવી પડી શકે છે અને તેઓ પોતાના પરિવારોથી વિખૂટા પડી શકે છે.
સલાહ: જ્યાં સુધી તમારા પાસપોર્ટ પર વૈધ વિઝા સ્ટેમ્પ ન હોય, ત્યાં સુધી વિઝા સ્ટેમ્પિંગ માટે આંતરરાષ્ટ્રીય યાત્રા ન કરો.
૧. બેરોજગાર થવાનો ખતરો
યુએસ ઇમિગ્રેશન ફર્મ રેડ્ડી ન્યૂમેન બ્રાઉન પીસીના સ્થાપક પાર્ટનર રાહુલ રેડ્ડીના મતે:
‘નોકરીદાતા (Employer) છ મહિના સુધી H-1B પદ ખાલી રાખી શકતા નથી.’
‘ઘણી કંપનીઓ કાનૂની દ્રષ્ટિએ અમેરિકાની બહારથી કામની કાનૂની મંજૂરી આપી શકતી નથી.’
અસર: H-1B કર્મચારી હવે યાત્રા કરશે તો તે પોતાની નોકરી પર પાછા નહીં પણ બેરોજગારી તરફ પાછા ફરી શકે છે.
ઇમિગ્રેશન એટર્ની રેબેકા ચેનનું કહેવું છે કે જે લોકોને હજી સુધી ઇમેઇલ નથી મળ્યો, તેમણે પણ હાલમાં ભારતની યાત્રા મોકૂફ કરી દેવી જોઈએ. જે લોકો પહેલાથી જ ભારતમાં છે અને અમેરિકા પાછા ફરવા માટે વિઝા સ્ટેમ્પિંગની જરૂરિયાત ધરાવે છે, તેમની પાસે હવે રાહ જોવા સિવાય કોઈ વિકલ્પ નથી.
૨. વિઝા સ્ટેમ્પિંગની જરૂરિયાત
ઇમિગ્રેશન વકીલો અનુસાર, અમેરિકામાં ફરીથી પ્રવેશ કરવા માટે વિઝા સ્ટેમ્પ હોવું જરૂરી છે. તેથી જો કોઈ વિઝા ધારક પહેલાથી જ અમેરિકામાં છે, તો તેને વિઝા સ્ટેમ્પિંગ માટે યાત્રા કરવાથી બચવું જોઈએ. ઇન્ટરવ્યૂ આગળ વધવાથી અમેરિકામાં કામ કરતા ઘણા ભારતીયો પર અસર પડશે, જેઓ પોતાના વિઝા સ્ટેમ્પનું નવીનીકરણ (રીન્યૂ) કરાવવા માંગે છે.
નિષ્ણાતોનું કહેવું છે કે આ સ્થિતિ તે લોકો માટે વિશેષરૂપે ચિંતાજનક છે, જેઓ પોતાના પરિવાર સાથે ભારત આવવા માંગતા હતા. વિઝા પ્રક્રિયામાં અણધારી વિલંબ ન માત્ર તેમના વ્યક્તિગત જીવનને પ્રભાવિત કરી રહ્યો છે, પરંતુ વ્યવસાયિક કારકિર્દી પર પણ અસર કરી શકે છે. ઘણા લોકો સામે આ ઘટનાક્રમથી નોકરી ગુમાવવાનો ડર વધી ગયો છે.
