Idaho Restaurant Shooting: અમેરિકાના ઇદાહો રાજ્યના ટ્વિન ફોલ્સમાં એક રેસ્ટોરન્ટમાં થયેલા ગોળીબારમાં અનેક લોકોના મોત થયા છે અને ઘણા લોકો ઘાયલ થયા છે. અધિકારીઓના જણાવ્યા મુજબ ગોળીબાર પ્રખ્યાત બર્ગર ચેન ઇન-એન-આઉટ રેસ્ટોરન્ટમાં થયો હતો, જે આ સ્થળે થોડા દિવસ પહેલાં જ શરૂ થયું હતું. ટ્વિન ફોલ્સ પોલીસ ચીફ મેથ્યુ હિક્સે જણાવ્યું કે હુમલાખોર પણ મૃત્યુ પામ્યો છે અને હવે સમુદાય માટે કોઈ જોખમ રહ્યું નથી. પોલીસ હુમલાખોરની ઓળખ અને હુમલાના કારણની તપાસ કરી રહી છે.
ગોળીબારમાં ઓછામાં ઓછા ત્રણના મોત
મેથ્યુ હિક્સે જણાવ્યું કે તેમને હજુ ચોક્કસ માહિતી નથી કે કેટલા લોકોના મોત થયા છે અથવા કેટલા લોકો ઘાયલ થયા છે. અધિકારીઓ હાલમાં પીડિતોના પરિવારજનોને જાણ કરી રહ્યા છે. કેટલાક અહેવાલોમાં જણાવાયું છે કે ગોળીબારમાં ઓછામાં ઓછા ત્રણ લોકોના મોત થયા છે. પોલીસ ચીફની પ્રેસ કોન્ફરન્સ પહેલાં ટ્વિન ફોલ્સ કાઉન્ટીના કમિશનર બ્રેન્ટ રેન્કેએ જણાવ્યું હતું કે શેરિફ જેક જૉનસને તેમને માહિતી આપી હતી કે પાંચ લોકો ઘાયલ થયા છે.
રાઇફલથી રેસ્ટોરન્ટમાં ચલાવી ગોળીઓ
એક પ્રત્યક્ષદર્શીએ જણાવ્યું કે તેઓ ઇન-એન-આઉટ નજીક ટ્રાફિક સિગ્નલ પર ઉભા હતા ત્યારે તેમણે જોયું કે એક વ્યક્તિ AR-સ્ટાઇલ રાઇફલ લઈને ડ્રાઇવ-થ્રૂમાંથી બહાર આવ્યો. ત્યારબાદ પિસ્તોલ ધરાવતા બીજા એક વ્યક્તિએ હુમલાખોર પર ગોળીબાર શરૂ કર્યો. તેમણે વધુમાં જણાવ્યું કે હુમલાખોરે ઓછામાં ઓછા ત્રણથી ચાર રાઉન્ડ ગોળીઓ ચલાવી હતી.
માર્ગની સામેની બાજુથી બનાવવામાં આવેલા એક વિડિયોમાં હુમલાખોર જોવા મળ્યો હતો. તેણે કાળા રંગના કપડાં પહેર્યા હતા. તે લાંબી રાઇફલ લઈને એક સફેદ કાર પાસે ગયો. તેણે ડ્રાઇવરની બાજુનો દરવાજો ખોલ્યો અને કારની ડિકી ખોલી. ત્યારબાદ તેણે ડિકીમાં હાથ નાખ્યો. ત્યાર પછી વિડિયો બંધ થઈ જાય છે. પોલીસે જણાવ્યું કે હુમલાખોરનું મૃત્યુ થયું છે, પરંતુ તેનું મૃત્યુ કેવી રીતે થયું તેની માહિતી આપવામાં આવી નથી.
પોલીસે જણાવ્યું કે હુમલા બાદ સમગ્ર વિસ્તારના માર્ગો બંધ કરી દેવામાં આવ્યા હતા, જેમાં નજીકનો એક પુલ પણ સામેલ હતો. તાજેતરના મહિનાઓમાં જાહેર સ્થળોએ લોકોને નિશાન બનાવીને થયેલી ગોળીબારની ઘટનાઓની વધતી યાદીમાં આ ઘટનાનો પણ સમાવેશ થયો છે.
