India Bangladesh Oil Pipeline: ભારત ફરી એકવાર બાંગ્લાદેશ માટે તારણહાર બનીને આવ્યું છે. ઈરાન યુદ્ધના કારણે વિશ્વભરમાં સર્જાયેલી ઉર્જા કટોકટી દરમિયાન ભારતે બાંગ્લાદેશને 5000 ટન ડીઝલનો પુરવઠો મોકલ્યો છે. ખાસ વાત એ છે કે આ પુરવઠો તે જ પાઈપલાઈન દ્વારા મોકલવામાં આવ્યો છે, જેનું નિર્માણ પૂર્વ વડાપ્રધાન શેખ હસીનાના કાર્યકાળ દરમિયાન કરવામાં આવ્યું હતું. આ પુરવઠાએ શેખ હસીના વિરુદ્ધ ફેલાવવામાં આવેલા જમાત અને BNPના તે પ્રોપેગેન્ડાની પણ પોલ ખોલી દીધી છે, જેમાં પાઈપલાઈનને ભારતીય વર્ચસ્વનું પ્રતીક કહીને ટીકા કરવામાં આવી હતી. શેખ હસીનાને ભારતીય એજન્ટ પણ કહેવામાં આવ્યા અને તેમના પર દેશ વેચવાનો આરોપ લગાવવામાં આવ્યો હતો.
ભારત વિરોધી પ્રોપેગેન્ડાની ખુલી પોલ
શેખ હસીનાની અવામી લીગ સરકારમાં માહિતી મંત્રી રહી ચૂકેલા મોહમ્મદ અલી અરાફાતે હવે બાંગ્લાદેશ નેશનાલિસ્ટ પાર્ટી (BNP) અને બાંગ્લાદેશની જમાત-એ-ઇસ્લામી પર પ્રહાર કર્યા છે. સોશિયલ મીડિયા પ્લેટફોર્મ X પર તેમણે લખ્યું કે, આ પાઈપલાઈન બનવા બદલ BNP અને જમાતે શેખ હસીના પર દેશને ભારતના હાથમાં વેચવાનો આરોપ લગાવ્યો હતો. તેમનો દાવો હતો કે આ પ્રોજેક્ટ દેશના હિતોને વેચવાનો એક હિસ્સો છે. તેમને અસંખ્ય ટીકાઓ અને આરોપોનો સામનો કરવો પડ્યો હતો.
ભારત-બાંગ્લાદેશની મિત્રતાથી પાકિસ્તાન સમર્થકોને સમસ્યા
અરાફાતે આગળ લખ્યું કે હવે તે જ પાઈપલાઈન દ્વારા ભારતથી ડીઝલ આયાત કરવામાં આવી રહ્યું છે, જેનાથી દેશનો ઈંધણ પુરવઠો થોડો સરળ અને વધુ સ્થિર બન્યો છે. તેમણે કહ્યું કે ભારતીય વર્ચસ્વનું નેરેટિવ પાકિસ્તાન સમર્થક ‘રઝાકાર’ ગ્રુપે મુક્તિ સંગ્રામ દરમિયાન બનાવ્યું હતું, જે આજે પણ પ્રમોટ કરવામાં આવી રહ્યું છે. અરાફાતે શેખ હસીનાના વિરોધીઓ પર નિશાન સાધતા કહ્યું કે, ‘તેઓ બાંગ્લાદેશની આઝાદી સમર્થક શક્તિઓ અને ભારત વચ્ચે સમાનતાના આધારે બનેલી મિત્રતાને ભારતીય વર્ચસ્વ કહે છે.’
“જે લોકો માનસિક રીતે ગુલામ છે, તેમને ભારત સાથેની સમાનતાની મિત્રતા પણ ભારતીય આધિપત્ય લાગે છે. આ કોઈ નવી વાત નથી, આ તેમની જૂની આદત રહી છે. જો ઇતિહાસ જોવામાં આવે તો આનો પુરાવો સરળતાથી મળી શકે છે.” – મોહમ્મદ અલી અરાફાત, પૂર્વ માહિતી મંત્રી, બાંગ્લાદેશ
અરાફાતે જણાવ્યું કે શેખ હસીના સત્તામાં હતા ત્યારે ભારતીય વર્ચસ્વ વિશે અસંખ્ય વાર્તાઓ ફેલાવવામાં આવી હતી. તેમ છતાં, તેઓ તેમના સમયમાં ભારત સાથેનો એવો એક પણ કરાર બતાવી શક્યા નથી જે બાંગ્લાદેશના હિતોની વિરુદ્ધ ગયો હોય. પૂર્વ માહિતી મંત્રીએ કહ્યું કે શેખ હસીનાના કાર્યકાળ દરમિયાન ભારતે નહીં, પરંતુ બાંગ્લાદેશે નવી દિલ્હી પાસેથી ઘણા ફાયદા મેળવ્યા. પરંતુ પાકિસ્તાની વિચારધારા તેને સકારાત્મક રીતે જોઈ શકી નથી.
ભારત-બાંગ્લાદેશ ઓઇલ પાઈપલાઈન શું છે?
ભારત અને બાંગ્લાદેશ વચ્ચે વર્ષ 2023 માં ક્રોસ-બોર્ડર ઓઇલ પાઈપલાઈન શરૂ કરવામાં આવી હતી. આ પહેલા ભારત રેલગાડી દ્વારા બાંગ્લાદેશને ડીઝલ મોકલતું હતું.
આ પાઈપલાઈન ભારતમાં સિલીગુડી પાસેની નુમાલીગઢ રિફાઈનરી થી શરૂ થાય છે અને બાંગ્લાદેશના દિનાજપુરમાં પાર્વતીપુર રેલહેડ ડેપો સુધી જાય છે.
2023માં પીએમ મોદી અને શેખ હસીનાએ તેનું ઉદ્ઘાટન કર્યું હતું. ઉદ્ઘાટનના દિવસે જ પાઈપલાઈન દ્વારા 90 લાખ લિટર ડીઝલ બાંગ્લાદેશના પાર્વતીપુર ડેપો પહોંચ્યું હતું.
130 કિલોમીટર લાંબી ભારત-બાંગ્લાદેશ ફ્રેન્ડશિપ પાઈપલાઈનનું નિર્માણ ભારતીય લાઈન ઓફ ક્રેડિટ દ્વારા અંદાજે 3.46 અબજ રૂપિયા ના ખર્ચે કરવામાં આવ્યું છે.
