Iran Hormuz Strait Control: હોર્મુઝ જળમાર્ગમાં અમેરિકાના સૂચિત રૂટને અવગણાયો, વિદેશી જહાજોએ ઈરાની કોરિડોર પસંદ કર્યો
Iran Hormuz Strait Control: હોર્મુઝ જળમાર્ગમાં જહાજો પર હુમલાના મુદ્દે ઈરાનની રણનીતિ સફળ થતી હોય તેવું જણાઈ રહ્યું છે. છેલ્લા ત્રણ દિવસના મેરિટાઇમ ડેટા મુજબ હોર્મુઝ જળમાર્ગમાંથી પસાર થતા તમામ જહાજો તેહરાન દ્વારા નક્કી કરાયેલા માર્ગનો ઉપયોગ કરી રહ્યા છે. મેરિટાઇમ ઇન્ટેલિજન્સ ફર્મ મેરિસ્ક્સ (મેરિસ્ક્સ) ના ડેટામાંથી આ માહિતી સામે આવી છે. આ સાથે એવું પણ જાણવા મળ્યું છે કે આ સમયગાળા દરમિયાન એક પણ જહાજ ઓમાનના કિનારા પાસેના માર્ગથી પસાર થયું નથી, જેનો ઉપયોગ કરવા માટે અમેરિકા જહાજોને સલાહ આપી રહ્યું છે.
58 જહાજો ઈરાની કોરિડોરમાંથી પસાર થયા
અમેરિકન બ્રોડકાસ્ટર સીએનએનના અહેવાલ મુજબ, મેરિટાઇમ ફર્મે જણાવ્યું કે શનિવારથી સોમવાર દરમિયાન હોર્મુઝ જળમાર્ગમાંથી કુલ 78 જહાજો પસાર થયા હતા. તેમાં 20 જહાજો ઈરાનના ધ્વજવાળા હતા. અહેવાલ અનુસાર આ માર્ગથી પસાર થયેલા તમામ 58 બિન-ઈરાની જહાજોએ ઈરાન દ્વારા દર્શાવાયેલા કોરિડોરનો ઉપયોગ કર્યો હતો. અમેરિકી સેનાએ સૂચવેલા ઓમાનના કિનારા નજીકના વૈકલ્પિક શિપિંગ માર્ગનો ઉપયોગ કરતું એકપણ જહાજ જોવા મળ્યું નહોતું.
તાજેતરના ઓટોમેટિક આઇડેન્ટિફિકેશન ડેટા મુજબ પ્રતિબંધો હોવા છતાં બિન-ઈરાની વ્યાપારી જહાજોની અવરજવર સતત ઈરાનના નિયંત્રણ હેઠળના ઉત્તરીય માર્ગ પરથી જ થઈ રહી છે. અન્ય એક મેરિટાઇમ કંપની વિન્ડવર્ડએ પણ પોતાના અહેવાલમાં જણાવ્યું કે રવિવારે હોર્મુઝ જળમાર્ગમાંથી માત્ર 7 જહાજો પસાર થયા હતા અને તે તમામ ઈરાનના નિયંત્રણ હેઠળના ઉત્તરીય માર્ગ પરથી જ ગયા હતા.
તેહરાને હોર્મુઝ પર મજબૂત નિયંત્રણ સ્થાપ્યું
હોર્મુઝ જળમાર્ગને લઈને અમેરિકા અને ઈરાન વચ્ચે ફરી એકવાર તણાવ વધી રહ્યો છે. ઈરાનના ઇસ્લામિક રિવોલ્યુશનરી ગાર્ડ કોર્પ્સએ વારંવાર ચેતવણી આપી છે કે હોર્મુઝમાંથી પસાર થતા જહાજોએ તેહરાનની મંજૂરી લેવી પડશે. ઈરાનના વિદેશ મંત્રી અબ્બાસ અરાઘચીએ શનિવારે ઈરાન ડેલીમાં પ્રકાશિત એક મુલાકાતમાં જણાવ્યું હતું કે વોશિંગ્ટને હોર્મુઝ જળમાર્ગમાં વૈકલ્પિક શિપિંગ માર્ગ શરૂ કરીને ઈરાન-અમેરિકા કરારનું જાણીજોઈને ઉલ્લંઘન કર્યું છે.
ઈરાનના સરકારી ટીવી આઈઆરઆઈબીએ સોમવારે જણાવ્યું કે ઈરાની સેનાએ તે જહાજોના માર્ગ બદલી દીધા હતા, જે જળમાર્ગના દક્ષિણ ભાગમાંથી પસાર થવાનો પ્રયાસ કરી રહ્યા હતા. બીજી તરફ અમેરિકી નાકાબંધી હોવા છતાં ઈરાનના બંદરો પર તેલના ટેન્કરો સતત પહોંચી રહ્યા છે. વિન્ડવર્ડ મેરિટાઇમ ડેટા મુજબ રવિવારે ખર્ગ દ્વીપના લોડિંગ ટર્મિનલ પર 24 ટેન્કરો રાહ જોઈ રહ્યા હતા. એક દિવસ પહેલાં તેમની સંખ્યા 21 હતી.
અમેરિકાએ ઈરાન પરના હુમલા રોક્યા
આ દરમિયાન અમેરિકાએ બે અઠવાડિયા સુધી બોમ્બમારો કર્યા બાદ ઈરાન પરના હુમલા સ્થગિત કરવાનો નિર્ણય લીધો છે. અમેરિકાના રાષ્ટ્રપતિ ડોનાલ્ડ ટ્રમ્પે દાવો કર્યો કે ઈરાન વારંવાર વાતચીત માટે અપીલ કરી રહ્યું છે અને તેઓ કૂટનીતિને વધુ એક તક આપવા માંગે છે. જોકે, ટ્રમ્પે સ્પષ્ટ કર્યું છે કે જો ઈરાન સાથેની વાતચીત સફળ નહીં થાય તો અમેરિકા ફરીથી હુમલા શરૂ કરશે.
