Israel Gaza Attack: ગાઝામાં શનિવારે ઈઝરાયેલી હુમલામાં ઓછામાં ઓછા છ લોકોના મોત થયા છે. આમાં કતારની ન્યૂઝ ચેનલ અલજઝીરાના એક કેમેરામેન અહેમદ વિશાહ અને બે બાળકો સામેલ છે. પેલેસ્ટિનિયન આરોગ્ય અધિકારીઓએ આ મોતની પુષ્ટિ કરી છે. અલજઝીરાએ જણાવ્યું કે તે પોતાના સંવાદદાતાને નિશાન બનાવવા અને તેમની હત્યા કરવાના ઘૃણાસ્પદ ગુનાની નિંદા કરે છે. અહેમદ વિશાહનું મોત શનિવારે મધ્ય ગાઝાના એક ઘર પર થયેલા હુમલામાં થયું હતું.
ઈઝરાયેલી સેના દ્વારા હમાસનો આતંકી હોવાનો દાવો
ઈઝરાયેલી સંરક્ષણ દળ (IDF) એ વિશાહના મોતની પુષ્ટિ કરી છે પરંતુ જણાવ્યું છે કે તે હમાસની મિલિટરી વિંગનો એક આતંકવાદી હતો, જે સ્નાઈપર તરીકે કામ કરતો હતો. હમાસ સંચાલિત ગાઝાના આરોગ્ય મંત્રાલયના આંકડા અનુસાર, ગયા વર્ષે ઓક્ટોબરમાં ઈઝરાયેલ અને હમાસ વચ્ચે યુદ્ધવિરામ છતાં ઈઝરાયેલી હુમલામાં 1000 થી વધુ પેલેસ્ટિનિયનો માર્યા ગયા છે.
મંત્રાલયે જણાવ્યું કે શનિવારે પ્રથમ હુમલો વહેલી સવારે 2 વાગ્યે ગાઝા સિટીની એક ઈમારત પર થયો હતો. ઘટનાસ્થળે એસોસિએટેડ પ્રેસના એક રિપોર્ટર જર્જરિત કાટમાળ અને લોહીથી લથપથ કોંક્રિટના ટુકડા જોયા. એક સ્થાનિક હોસ્પિટલે જણાવ્યું કે બુરેઇજ શરણાર્થી શિબિરમાં ઘર પર થયેલા હુમલામાં વિશાહ સાથે અન્ય બે લોકો પણ માર્યા ગયા.
અલજઝીરા દ્વારા હુમલાની નિંદા અને પૂર્વ ઇતિહાસ
અલજઝીરાએ જણાવ્યું કે વિશાહનું મોત તમામ આંતરરાષ્ટ્રીય કાયદાઓ અને નિયમોનું એક નવું અને ખુલ્લું ઉલ્લંઘન છે. આ પત્રકારોને નિશાન બનાવવાની અને સત્યના અવાજને દબાવવાની સતત ચાલી રહેલી વ્યવસ્થિત નીતિને દર્શાવે છે. બીજી તરફ, આઈડીએફે (IDF) કહ્યું કે વિશાહે તાજેતરના મહિનાઓમાં ઈઝરાયેલી સૈનિકો સામે સ્નાઈપર હુમલાની યોજના બનાવી હતી. જોકે, તેણે કોઈ પુરાવા આપ્યા નથી.
વિશાહના ભાઈ મોહમ્મદ પણ અલજઝીરાના સંવાદદાતા હતા. તેઓ આ જ વર્ષે એપ્રિલમાં ઈઝરાયેલી હુમલામાં માર્યા ગયા હતા. આઈડીએફે તેમના પર હમાસના રોકેટ અને હથિયાર બનાવવાના મુખ્ય મથકમાં કામ કરવાનો આરોપ લગાવ્યો હતો. આ અંગે અન્ય કોઈ માહિતી ઉપલબ્ધ કરાવવામાં આવી નહોતી.
