Trump Blasted On Nato Allies: ઈરાન સામેના યુદ્ધમાં અમેરિકાનો સાથ ન આપવા બદલ અમેરિકી રાષ્ટ્રપતિ ડોનાલ્ડ ટ્રમ્પ નાટો (NATO) સહયોગીઓ પર અત્યંત રોષે ભરાયા છે. ટ્રમ્પે શુક્રવારે ફરી એકવાર નાટોને નિશાને લીધું અને ઈરાન સાથેના યુદ્ધમાં અમેરિકાને મદદ ન કરવા બદલ સૈન્ય ગઠબંધનની આકરી ટીકા કરી. તેમણે ખુલ્લી ધમકી આપતા કહ્યું કે અમેરિકાને નાટો માટે હાજર રહેવાની કોઈ જરૂર નથી. અમેરિકી રાષ્ટ્રપતિ મિયામીમાં એક ઇન્વેસ્ટમેન્ટ ફોરમને સંબોધિત કરી રહ્યા હતા.
નાટો પર કેમ ભડક્યા ડોનાલ્ડ ટ્રમ્પ?
ટ્રમ્પે કહ્યું કે તેઓ એ વાતથી નારાજ છે કે યુરોપિયન નાટો દેશોએ અમેરિકાને જરૂરી મદદ આપવાનો ઇનકાર કરી દીધો છે. અમેરિકા અને ઈરાન વચ્ચેનો સંઘર્ષ હવે ચોથા સપ્તાહમાં પહોંચ્યો છે. ઉલ્લેખનીય છે કે અમેરિકા અને ઈઝરાયલે ૨૮ ફેબ્રુઆરીએ ઈરાન પર હુમલો કર્યો હતો. જોકે, ઈરાન પર હુમલો કરવાના નિર્ણય અંગે અમેરિકાએ તેના યુરોપિયન સહયોગીઓની કોઈ સલાહ લીધી નહોતી, જેના કારણે નાટો દેશોના અનેક નેતાઓએ આ કાર્યવાહીનો વિરોધ કર્યો હતો.
ફોરમને સંબોધતી વખતે નાટો અંગેનો ટ્રમ્પનો બળાપો બહાર આવી ગયો હતો. તેમણે કહ્યું, “અમે હંમેશા તેમના માટે હાજર રહ્યા, પરંતુ હવે તેમના વલણને જોતા લાગે છે કે અમારે તેમના માટે હાજર રહેવાની જરૂર નથી. ખરું ને?”
“મને લાગે છે કે આ હમણાં જ આવેલી બ્રેકિંગ ન્યૂઝ છે, પરંતુ આ સાચું છે. હું આ જ તો કહેતો આવ્યો છું. જો તેઓ અમારા માટે હાજર નથી, તો અમે તેમના માટે કેમ હાજર રહીએ? તેઓ અમારા માટે હાજર નહોતા.” — ડોનાલ્ડ ટ્રમ્પ, અમેરિકી રાષ્ટ્રપતિ
નાટો પ્રત્યે ટ્રમ્પની નારાજગી
ફેબ્રુઆરીના અંતમાં ઈરાન પર હુમલાની શરૂઆત થયા બાદથી ટ્રમ્પે વારંવાર પશ્ચિમી સહયોગીઓના સમર્થનનો અભાવ અને ‘હોર્મુઝ સ્ટ્રેટ’ ખોલવા માટે સેના મોકલવામાં તેમની ખચકાટ પર નિરાશા વ્યક્ત કરી છે.
યુદ્ધ શરૂ થયા બાદ ટ્રમ્પે બ્રિટન અને જાપાન જેવી મોટી શક્તિઓની સાથે ચીનને પણ હોર્મુઝ ખોલવા માટે સેના મોકલવા અપીલ કરી હતી.
બ્રિટન, ફ્રાન્સ, જર્મની અને જાપાને યોગ્ય પ્રયાસોમાં મદદ કરવાની ઈચ્છા દર્શાવી છે, પરંતુ કોઈએ પણ મિલિટરી ફોર્સ મોકલવાની તૈયારી બતાવી નથી.
ટ્રમ્પે ગયા અઠવાડિયે નાટોના સભ્યોને ‘ડરપોક’ કહ્યા હતા અને અમેરિકા વગર આ ગઠબંધનને ‘કાગળનો સિંહ’ (Paper Tiger) ગણાવ્યું હતું.
ગુરુવારે તેમણે પોતાના ‘ટ્રુથ સોશિયલ’ પ્લેટફોર્મ પર એક પોસ્ટમાં નાટો પર હુમલો કર્યો અને કહ્યું કે અમેરિકાને નાટો પાસેથી કંઈ જોઈતું નથી.
