US Iran War Funding 2026: આ દરમિયાન અમેરિકી ટ્રેઝરી સેક્રેટરી સ્કોટ બેસેન્ટે જણાવ્યું છે કે ઈરાન યુદ્ધને ફંડ આપવા માટે પૈસાની કોઈ અછત નથી. તેમનું નિવેદન એવા સમયે આવ્યું છે જ્યારે યુદ્ધના મોંઘા ખર્ચને લઈને અમેરિકામાં ચિંતા વધી રહી છે. બીજી તરફ, ટ્રમ્પ વહીવટીતંત્ર સંરક્ષણ ખર્ચ માટે કોંગ્રેસ પાસેથી 200 અબજ ડોલરની વધારાની રકમ માંગવાની તૈયારી કરી રહ્યું છે. ઈરાન વિરુદ્ધ અમેરિકાની જંગ જલ્દી ખતમ થતી જણાય રહી નથી. આ બાબતે અમેરિકી લોકોમાં મોંઘવારીનો ડર સતાવવા લાગ્યો છે.
બેસેન્ટે ટેક્સ વધારવાનો કર્યો ઇનકાર
‘મીટ ધ પ્રેસ’ કાર્યક્રમમાં બોલતા બેસેન્ટે લોકોને ભરોસો અપાવવાનો પ્રયાસ કર્યો કે યુદ્ધને કારણે ટેક્સ નહીં વધે. તેમણે કહ્યું કે અમેરિકી સરકાર યુદ્ધ ચાલુ રાખવા માટે આર્થિક રીતે સક્ષમ છે. બેસેન્ટે કહ્યું, ‘અમારી પાસે આ યુદ્ધ માટે પૂરતું ધન છે.’ કોંગ્રેસ પાસેથી ફંડિંગની વિનંતીને તેમણે યુદ્ધ અભિયાન માટે જરૂરી નહીં, પરંતુ પૂરક (Supplementary) ગણાવી.
તેમણે આગળ કહ્યું કે વધુ ફંડ માંગવાનો હેતુ એ સુનિશ્ચિત કરવાનો છે કે આવનારા મહિનાઓમાં સેના સંપૂર્ણ રીતે તૈયાર રહે. બેસેન્ટે યુદ્ધનો ખર્ચ ઉઠાવવા માટે ટેક્સ વધારવાની શક્યતાનો ઇનકાર કર્યો. જોકે, તેમણે એ ન જણાવ્યું કે યુદ્ધ માટે વધારાનો ખર્ચ ક્યાંથી આવશે. ખાસ કરીને ફંડિંગની પ્રસ્તાવિત વિનંતીને પહેલાથી જ વિરોધનો સામનો કરવો પડી રહ્યો છે.
ટ્રમ્પની ધમકીને ગણાવી સાચી
બેસેન્ટે ઈરાનમાં અમેરિકી સૈન્ય કાર્યવાહીનો બચાવ કરતા કહ્યું કે ક્યારેક તણાવ ઓછો કરવા માટે તમારે તણાવ વધારવો પડે છે. તેમણે ટ્રમ્પની કડક ભાષાનો બચાવ કર્યો અને કહ્યું કે ઈરાનીઓ માત્ર આ જ ભાષા સમજે છે. અમેરિકી રાષ્ટ્રપતિ ટ્રમ્પે શનિવારે ધમકી આપી હતી કે જો ઈરાને 48 કલાકમાં સ્ટ્રેટ ઓફ હોર્મુઝને નહીં ખોલ્યું, તો તેના વિવિધ પાવર પ્લાન્ટ્સ પર હુમલો કરીને તેને તબાહ કરી દેવામાં આવશે.
ઈરાન યુદ્ધ અમેરિકા માટે ઘણું મોંઘું
ઈરાન યુદ્ધને લઈને જે પ્રારંભિક રિપોર્ટ્સ આવી રહ્યા છે, તેનાથી ખબર પડે છે કે આ અમેરિકા માટે સૌથી મોંઘા સૈન્ય અભિયાનોમાંનું એક બની રહ્યું છે. અધિકારીઓએ સંકેત આપ્યો છે કે યુદ્ધના શરૂઆતના તબક્કામાં જ અબજો ડોલર ખર્ચ થઈ ચૂક્યા છે. આ યુદ્ધની આર્થિક અસર આખી દુનિયા પર દેખાવવા લાગી છે. હોર્મુઝ સંકટને કારણે તેલની કિંમતો સતત વધી રહી છે. અમેરિકી લોકો પર પણ આની સીધી અસર થઈ રહી છે. જેના કારણે ટ્રમ્પ વહીવટીતંત્ર પર દબાણ વધી ગયું છે.
