US Syria Airstrikes: અમેરિકા અને સહયોગી સેનાઓએ સીરિયામાં મોટા પાયે હુમલા કર્યા છે. વેનેઝુએલા બાદ આ વર્ષે અમેરિકાની આ બીજી મોટી કાર્યવાહી છે. અમેરિકી સેન્ટ્રલ કમાન્ડે આ અંગે જાણકારી આપતા જણાવ્યું કે આ હુમલાઓમાં આતંકવાદી સંગઠન ઇસ્લામિક સ્ટેટ (IS) ના ઠેકાણાઓને નિશાન બનાવવામાં આવ્યા છે. આ હુમલા ‘ઓપરેશન હોકઆઈ સ્ટ્રાઈક’ નો ભાગ છે, જે ૧૩ ડિસેમ્બરે સીરિયામાં અમેરિકી સેના પર ઇસ્લામિક સ્ટેટના ઘાતક હુમલાના જવાબમાં કરવામાં આવ્યા છે. સેન્ટ્રલ કમાન્ડે જણાવ્યું કે રાષ્ટ્રપતિ ડોનાલ્ડ ટ્રમ્પે શનિવારે આ હુમલાના નિર્દેશ આપ્યા હતા. નિવેદનમાં કહેવામાં આવ્યું છે કે આ હુમલા આતંકવાદ સામે લડવા અને આ વિસ્તારમાં અમેરિકી અને સહયોગી સેનાઓની રક્ષા કરવાના પ્રયાસરૂપે કરવામાં આવ્યા છે.
ઇસ્લામિક સ્ટેટના આતંકવાદીઓએ ૧૩ ડિસેમ્બરે સીરિયામાં અમેરિકી સેનાના ઠેકાણા પર હુમલો કર્યો હતો. જેમાં બે અમેરિકી સૈનિકો અને એક અમેરિકી દુભાષિયા સહિત ત્રણ લોકો માર્યા ગયા હતા. અમેરિકી સેન્ટ્રલ કમાન્ડે X પર જારી કરેલા નિવેદનમાં કહ્યું, અમારો સંદેશ સ્પષ્ટ છે- જો તમે અમારા સૈનિકોને નુકસાન પહોંચાડશો, તો અમે તમને શોધી કાઢીશું અને દુનિયામાં ગમે ત્યાં મારી નાખીશું. ભલે તમે ન્યાયથી બચવા માટે ગમે તેટલા પ્રયત્નો કરો.
જોર્ડને પણ હુમલામાં લીધો ભાગ
અહેવાલમાં અધિકારીને ટાંકીને જણાવવામાં આવ્યું છે કે અમેરિકા અને તેની સહયોગી સેનાઓએ આ ઓપરેશનમાં ૩૫ થી વધુ ઠેકાણાઓ પર ૯૦ થી વધુ હથિયારો છોડ્યા હતા. આ ઓપરેશનમાં ૨૦ થી વધુ વિમાનોએ ભાગ લીધો હતો. હુમલામાં F-15E, A-10, AC-130J, MQ-9 (ડ્રોન) અને જોર્ડનના F-16 જેવા વિમાનો સામેલ થયા હતા. હુમલો કઈ જગ્યાએ કરવામાં આવ્યો અને તેમાં કેટલા આતંકીઓ માર્યા ગયા, તે અંગે માહિતી સ્પષ્ટ નથી.
અમેરિકી સંરક્ષણ મંત્રી પીટ હેગસેથે શનિવારે X પર સૈન્ય કાર્યવાહી વિશે લખતા કહ્યું, અમે ક્યારેય ભૂલીશું નહીં અને ક્યારેય પાછા હટીશું નહીં. ટ્રમ્પ પ્રશાસને ડિસેમ્બરમાં ઓપરેશન હોકઆઈ સ્ટ્રાઈકની જાહેરાત કરી હતી, જ્યારે સીરિયામાં સ્થિત પાલ્યામરામાં ઇસ્લામિક સ્ટેટના એક બંદૂકધારીએ ઘાત લગાવીને બે અમેરિકી સૈનિકો અને એક અમેરિકી નાગરિક દુભાષિયા કોન્ટ્રાક્ટરની હત્યા કરી હતી.
