Iran Unrest: ઈરાનમાં સત્તાવિરોધી પ્રદર્શનોને કચડી નાખવા માટે ખામેનેઈ શાસને દમનના તમામ સંભવ રસ્તાઓ અપનાવ્યા છે. પ્રદર્શન કરનારા સેંકડો લોકોને ફાંસી આપવામાં આવે તેવી શક્યતા છે, જ્યારે હજારો લોકોની ધરપકડ પણ કરવામાં આવી છે. આ દરમિયાન ટ્રમ્પ પ્રશાસને દાવો કર્યો છે કે ઈરાનમાં આવતીકાલે થનારી 800 ફાંસીની સજાઓના અમલ પર રોક લગાવી દેવામાં આવી છે.
વ્હાઈટ હાઉસના પ્રેસ સેક્રેટરી કેરોલિન લેવિટે ઈરાનના મુદ્દે નિવેદન જાહેર કર્યું હતું. તેમણે કહ્યું, ‘રાષ્ટ્રપતિ ડોનાલ્ડ ટ્રમ્પ અને તેમની ટીમે ઈરાની શાસનને એવો સંદેશ આપ્યો છે કે જો હત્યાઓ ચાલુ રહેશે તો તેના ગંભીર પરિણામો આવશે.’ તેમણે વધુમાં ઉમેર્યું કે રાષ્ટ્રપતિ ટ્રમ્પને આજે જાણવા મળ્યું છે કે આવતીકાલે થનારી 800 ફાંસીની સજાઓ અટકાવી દેવામાં આવી છે.
શું ઈરાન પર અમેરિકી હુમલો ટળી ગયો?
કેરોલિન લેવિટે જણાવ્યું છે કે રાષ્ટ્રપતિ ટ્રમ્પ અને તેમની ટીમ આ સ્થિતિ પર ખૂબ જ બારીકાઈથી નજર રાખી રહી છે અને રાષ્ટ્રપતિ પાસે તમામ વિકલ્પો ખુલ્લા છે.
ચાર અખાતી દેશોની મુત્સદ્દીગીરી (ડિપ્લોમેસી) બાદ અમેરિકી રાષ્ટ્રપતિ ડોનાલ્ડ ટ્રમ્પે તેહરાન પર હાલમાં હુમલો ન કરવાની વાત કહી છે.
ઈરાને પોતાનું હવાઈ ક્ષેત્ર (Airspace) પણ ફરીથી ખોલી દીધું છે. આ કારણોસર ઈરાન પર હુમલો ટળી ગયો હોવાની વાતને બળ મળ્યું છે.
અમેરિકા અને ઈરાન વચ્ચે કોણે કરાવી સમજૂતી?
અખાતી દેશો સાઉદી અરેબિયા, કતાર, ઓમાન અને ઈજિપ્ત (મિસ્ર) એ અમેરિકા અને ઈરાન વચ્ચે વાતચીતનો રસ્તો ખોલ્યો છે. લગભગ 48 કલાકના પ્રયત્નો બાદ અમેરિકી રાષ્ટ્રપતિ ટ્રમ્પે ઈરાન પરના સંભવિત હુમલાને ટાળી દીધો છે. નોંધનીય છે કે અમેરિકી રાષ્ટ્રપતિ ડોનાલ્ડ ટ્રમ્પે ગુરુવારે કહ્યું હતું કે હાલમાં ઈરાન પર હુમલો કરવામાં આવશે નહીં. તેમણે એમ પણ કહ્યું કે ઈરાનમાં હિંસાની ઘટનાઓમાં થોડો ઘટાડો થયો છે.
