India Slams Pakistan UN: ‘આતંકની ફેક્ટરી’ પાકિસ્તાન વધુ એક વખત બેનકાબ થયું છે. ભારતે સંયુક્ત રાષ્ટ્ર (UN) માં પાકિસ્તાનની લુચ્ચાઈઓની પોલ ખોલી દીધી છે. ન્યૂયોર્કમાં સંયુક્ત રાષ્ટ્રમાં ભારતના કાયમી પ્રતિનિધિ પાર્વથાનેની હરીશે જણાવ્યું કે હું આજે પાકિસ્તાન દ્વારા કરવામાં આવેલી પાયાવિહોણી અને અયોગ્ય ટિપ્પણીઓનો જવાબ આપવા માટે બંધાયેલો છું.
ભારતીય વિસ્તારો પર કબજો કરવાનું સપનું
સંયુક્ત રાષ્ટ્રમાં ભારતના કાયમી પ્રતિનિધિએ આગળ કહ્યું કે ભારત તથ્યોને સ્પષ્ટ કરવા માંગે છે. સ્વતંત્ર ભારતે પોતાની સફરની શરૂઆત પાકિસ્તાનના સીમાપારના આક્રમણનો સામનો કરીને કરી હતી. પાકિસ્તાન તે ભારતીય વિસ્તારો પર કબજો કરવા માંગતું હતું, જે સંપૂર્ણ, કાયદેસર અને અફર જોડાણ પછી ભારતનો હિસ્સો બની ચૂક્યા હતા.
પાકિસ્તાને ભારત વિરુદ્ધ છેડ્યું યુદ્ધ
પાર્વથાનેની હરીશે પાકિસ્તાનનો આતંકવાદી ચહેરો ખુલ્લો પાડતા કહ્યું કે પાકિસ્તાને ભારત વિરુદ્ધ કેટલાય યુદ્ધ છેડીને અને કોઈ પણ ઉશ્કેરણી વિના આક્રમણ કરીને, સીમાપાર આતંકવાદને સતત પોષણ આપીને, સાર્વભૌમત્વ, પ્રાદેશિક અખંડિતતા અને શાંતિપૂર્ણ સહ-અસ્તિત્વના સિદ્ધાંતોનું ઉલ્લંઘન કર્યું છે.
ચીનની મુલાકાતે ગયા હતા પાકિસ્તાની વડાપ્રધાન
જણાવી દઈએ કે તાજેતરમાં જ પાકિસ્તાની વડાપ્રધાન શહબાઝ શરીફ ચીનની મુલાકાતે પહોંચ્યા હતા. અહીં તેમણે ચીનના રાષ્ટ્રપતિ શી જિનપિંગ સાથે મુલાકાત કરી. પાકિસ્તાન અને ચીનના નેતાઓ વચ્ચે થયેલી મુલાકાત પછી બંને દેશોએ સંયુક્ત નિવેદન જાહેર કર્યું, જેમાં ભારતના કેન્દ્રશાસિત પ્રદેશ જમ્મુ અને કાશ્મીરનો વગર કારણે ઉલ્લેખ કરવામાં આવ્યો હતો.
વિદેશ મંત્રાલયે આપ્યો હતો જડબાતોડ જવાબ
ભારતના વિદેશ મંત્રાલયે આનો જડબાતોડ જવાબ આપ્યો હતો. વિદેશ મંત્રાલયના પ્રવક્તા રણધીર જાયસવાલે કહ્યું હતું કે ચીન અને પાકિસ્તાન વચ્ચેના સંયુક્ત નિવેદનમાં કેન્દ્રશાસિત પ્રદેશ જમ્મુ અને કાશ્મીરના વગર કારણે કરાયેલા ઉલ્લેખને ભારત સ્પષ્ટ રીતે ફગાવી દે છે. ભારતનું વલણ હંમેશાં એકસરખું રહ્યું છે અને સંબંધિત પક્ષો આ વાત સારી રીતે જાણે છે. જમ્મુ અને કાશ્મીર તથા લદ્દાખ કેન્દ્રશાસિત પ્રદેશો ભારતના અવિભાજ્ય અને અતૂટ અંગ રહ્યા છે, વર્તમાનમાં પણ છે અને હંમેશાં રહેશે. કોઈ અન્ય દેશને આના પર ટિપ્પણી કરવાનો અધિકાર નથી.
