Manavadar Anti Encroachment Drive: જૂનાગઢ જિલ્લાના માણાવદર પંથકમાં સરકારી મિલકતો અને જાહેર રસ્તાઓ પર વર્ષોથી જમાવી દેવાયેલા ગેરકાયદેસર દબાણો સામે વહીવટી તંત્રે આખરે કડક વલણ અપનાવ્યું છે. આગામી ચોમાસાની ઋતુને ધ્યાનમાં રાખીને તેમજ ટ્રાફિકની જટિલ સમસ્યાનો કાયમી ઉકેલ લાવવા માટે મામલતદાર, નગરપાલિકા, સિટી સર્વે અને માર્ગ-મકાન વિભાગે સંયુક્ત રીતે બુલડોઝર એક્શન શરૂ કર્યું છે. આ મેગા ડિમોલિશન ઝુંબેશના કારણે જાહેર માર્ગો પર ગેરકાયદે સામ્રાજ્ય ઊભું કરનારા તત્વો અને દબાણકારોમાં ભારે ફફડાટ વ્યાપી ગયો છે.
જૂનાગઢથી પોરબંદર હાઈવે પર અકસ્માતો રોકવા માટે તંત્રએ લીધા આકરા એક્શન
માણાવદરના મામલતદાર મહેશ શુક્લાએ આ ઓપરેશન અંગે વિગતો આપતાં જણાવ્યું હતું કે, જૂનાગઢથી પોરબંદર જવા માટેનો રાજ્ય અને રાષ્ટ્રીય ધોરીમાર્ગ માણાવદર શહેર તેમજ બાટવા પંથકમાંથી પસાર થાય છે. દરરોજ સેંકડો એસટી બસો અને નાના-મોટા ખાનગી વાહનો આ રસ્તાનો ઉપયોગ કરે છે. જોકે, હાઈવેની બંને બાજુએ મોટા પાયે પાકા અને કાચા દબાણો થઈ જતાં વાહનોની ભારે ગીચતા સર્જાતી હતી. ભૂતકાળમાં આ દબાણોના કારણે કમનસીબ અકસ્માતો પણ સર્જાયા છે. આ પરિસ્થિતિને સુધારવા અને માર્ગો વધુ પહોળા કરવા માટે આ સંયુક્ત ડિમોલિશન હાથ ધરવામાં આવ્યું છે.
બસ સ્ટેશન, સિનેમા ચોક અને ગાયત્રી મંદિર વિસ્તાર દબાણમુક્ત કરાયા
આ મેગા ડ્રાઈવ અંતર્ગત સરકારી ટીમોએ સૌથી પહેલા એવા વિસ્તારોને ટાર્ગેટ કર્યા છે જ્યાં આખો દિવસ ભારે ટ્રાફિક જામની સમસ્યા રહે છે. માણાવદર શહેરના મુખ્ય બસ સ્ટેશન વિસ્તાર, વ્યસ્ત સિનેમા ચોક અને ગાયત્રી મંદિર ચોક કે જ્યાંથી ભારે વાહનો પસાર થાય છે, ત્યાંથી જેસીબી મશીનો ફેરવીને પાકા ઓટલા, કેબિનો અને ગેરકાયદે શેડ તોડી પાડવામાં આવ્યા છે. બસ સ્ટેન્ડ નજીક રસ્તા નડતર દબાણો દૂર થતાં જ આખો હાઈવે એકદમ ખુલ્લો અને કટોકટી રહિત જોવા મળ્યો હતો.
બે-બે વખત સરકારી નોટિસો આપવા છતાં દબાણ ન હટાવતા ચાલ્યું બુલડોઝર
તંત્ર દ્વારા આ આકરી કાર્યવાહી સીધેસીધી કરવામાં આવી નથી, પરંતુ નિયમોનુસાર પૂરતી તક આપવામાં આવી હતી. વહીવટી તંત્ર દ્વારા નગરપાલિકાની મિલકતો અને જાહેર માર્ગો પર દબાણ કરનારા આસામીઓને અગાઉ બે વખત કાયદેસરની નોટિસો પાઠવવામાં આવી હતી. આ નોટિસ મળ્યા બાદ કેટલાક શાણા નાગરિકોએ પોતાના દબાણો જાતે જ હટાવી લીધા હતા, પરંતુ જે લોકોએ બે-બે નોટિસોને સરેઆમ ઘોળીને પી જવાનું વલણ રાખ્યું હતું, તેમની સામે ચારેય સરકારી વિભાગોએ પોલીસ પ્રોટેક્શન સાથે એક્શન લીધા છે.
આગામી ૨૪ કલાક સુધી પણ ડિમોલિશનની આ કડક ઝુંબેશ ચાલુ રહેવાની પૂરી સંભાવના
પોલીસ બંદોબસ્ત સાથે ગુરુવારથી શરૂ થયેલી આ દબાણ હટાવો ઝુંબેશ હજુ લાંબી ચાલે તેવા એંધાણ છે. મુખ્ય બજારો અને હાઈવેને સંપૂર્ણપણે ટ્રાફિકમુક્ત કરવા માટે શુક્રવાર સાંજ સુધી એટલે કે આગામી ૨૪ કલાક સુધી આ ઓપરેશન સતત ચાલુ રાખવામાં આવશે. તંત્રના આ કડક વલણથી સમગ્ર માણાવદરમાં વ્યાપારીઓ અને દબાણકારોમાં ચર્ચા જાગી છે, જ્યારે વાહનચાલકો અને સામાન્ય જનતાએ રસ્તાઓ પહોળા થવાની આ કામગીરીને ખુલ્લા મનથી આવકારી છે.
