Deepthi Jeevanji Gold Medal: ભારતની પેરા એથ્લીટ દીપ્તિ જીવાંજીએ 2026 એશિયન પેરા ગેમ્સમાં મહિલાઓની 400 મીટર T20 સ્પર્ધામાં ગોલ્ડ મેડલ જીત્યો છે. દીપ્તિએ આ રેસ 56.36 સેકન્ડમાં પૂરી કરીને એશિયન પેરા ગેમ્સનો નવો રેકોર્ડ બનાવ્યો. જાપાનની નીના કાનોએ 58.92 સેકન્ડ સાથે સિલ્વર અને અકાને કાટોએ 1 મિનિટ 0.26 સેકન્ડ સાથે બ્રોન્ઝ મેડલ જીત્યો. પેરિસ પેરાલિમ્પિકમાં કાંસ્ય ચંદ્રક જીતી ચૂકેલી દીપ્તિની આ સિદ્ધિએ તેમને ફરી એકવાર ચર્ચામાં લાવી દીધાં છે.
દીપ્તિ જીવાંજીનો જન્મ 27 સપ્ટેમ્બર 2003ના રોજ તેલંગાણાના વારંગલ જિલ્લાના કલેંડા ગામમાં થયો હતો. તેમનો પરિવાર આર્થિક રીતે નબળો હતો. તેમનાં માતા-પિતા ખેતી અને ખેતરોમાં મજૂરી કરીને પરિવારનું ગુજરાન ચલાવતાં હતાં. દીપ્તિ બાળપણથી જ દોડવામાં ઝડપી હતાં. ગામની શાળામાં રમતગમતની પ્રવૃત્તિઓ દરમિયાન સૌપ્રથમ શારીરિક શિક્ષણના શિક્ષક બિયાનિ વેંકટેશ્વરાલુનું ધ્યાન તેમની પ્રતિભા પર ગયું. તેમણે દીપ્તિની દોડવાની ક્ષમતાને ઓળખી અને તેમને 100 મીટર તથા 200 મીટરની દોડની પ્રેક્ટિસ કરાવવાનું શરૂ કર્યું.
2019માં ચમકી કિસ્મત
2019માં રાજ્યસ્તરીય ઍથ્લેટિક્સ સ્પર્ધા દરમિયાન ભારતીય રમતગમત પ્રાધિકરણના કોચ એન રમેશે દીપ્તિને જોઈ હતી. તેમને લાગ્યું કે આ ખેલાડી આંતરરાષ્ટ્રીય સ્તરે પ્રદર્શન કરવાની ક્ષમતા ધરાવે છે. રમેશે તેમના પરિવારને દીપ્તિને હૈદરાબાદમાં તાલીમ માટે મોકલવા પ્રોત્સાહિત કર્યો. અહીંથી દીપ્તિની કારકિર્દીને નવી દિશા મળી. દીપ્તિ જીવાંજીને બૌદ્ધિક દિવ્યાંગતા છે. આ એવી દિવ્યાંગતા નથી, જે કોઈ અકસ્માત અથવા રમત દરમિયાન થયેલી ઈજાને કારણે થઈ હોય. પ્રકાશિત અહેવાલો અનુસાર, તેઓ જન્મથી જ આ સ્થિતિ ધરાવતાં હતાં અને બાદમાં તેમની બૌદ્ધિક દિવ્યાંગતાનું મૂલ્યાંકન કરવામાં આવ્યું હતું.
બાળપણમાં લોકો તેમની મજાક ઉડાવતા હતા
બૌદ્ધિક દિવ્યાંગતા વ્યક્તિની શીખવાની, માહિતી સમજવાની, સંવાદ કરવાની અને રોજિંદાં કામ સ્વતંત્ર રીતે કરવાની ક્ષમતાને અસર કરી શકે છે. જોકે, તેની અસર દરેક વ્યક્તિમાં અલગ-અલગ હોય છે. દીપ્તિના બાળપણમાં તેમના ચહેરા અને વર્તનને લઈને ગામના કેટલાક લોકો તેમની મજાક પણ ઉડાવતા હતા. તેમનાં માતા-પિતા માટે પણ શરૂઆતનો સમય સરળ નહોતો. પરંતુ પરિવાર અને પ્રશિક્ષકોના સહયોગથી દીપ્તિએ રમતમાં પોતાની પ્રતિભા નિખારી અને આંતરરાષ્ટ્રીય સ્તરે ભારતનું નામ રોશન કર્યું.
APG 2026 | Result | Para Athletics
Women’s 400m T20 – Heats
GAMES RECORD SMASHED!
Deepthi Jeevanji (TOPS) topped the heats with a stunning 57.57s!
She shattered the previous Games Record of 58.69s to secure her place in the final.
Another proud moment for India as Deepthi continues to shine on the global stage! The final is scheduled for 20 October 2026 at 6:53 AM IST.
#TeamIndia #TOPSAthlete #ParaAthletics #Cheer4Bharat #praise4para
— SAI Media (@Media_SAI) October 19, 2026
400 મીટર T20 કેટેગરી શું છે?
દીપ્તિ જીવાંજી મહિલાઓની 400 મીટર T20 સ્પર્ધામાં ભાગ લે છે. પેરા ઍથ્લેટિક્સમાં T20 વર્ગ બૌદ્ધિક દિવ્યાંગતા ધરાવતા ખેલાડીઓ માટે નક્કી કરવામાં આવ્યો છે. આ વર્ગમાં ખેલાડીઓની પાત્રતા નક્કી કરવા માટે નિર્ધારિત માપદંડો હેઠળ મૂલ્યાંકન કરવામાં આવે છે. આ વર્ગીકરણ જરૂરી છે, જેથી ખેલાડીઓ સંબંધિત સ્પર્ધામાં નિષ્પક્ષ અને સમાન નિયમો હેઠળ મુકાબલો કરી શકે. 400 મીટરની દોડમાં ખેલાડીએ ટ્રૅકનો એક આખો ચક્કર લગાવવો પડે છે. તેમાં ઝડપની સાથે યોગ્ય ગતિનું વિતરણ, સહનશક્તિ અને રેસ દરમિયાન પોતાની ઊર્જાનું સંચાલન કરવું પણ જરૂરી છે.
2023માં પણ એશિયન પેરા ગેમ્સમાં ગોલ્ડ જીત્યો હતો
દીપ્તિ જીવાંજી માટે એશિયન પેરા ગેમ્સમાં ગોલ્ડ જીતવો કોઈ નવી સિદ્ધિ નથી. તેમણે 2023માં ચીનના હાંગઝોઉમાં યોજાયેલી એશિયન પેરા ગેમ્સમાં પણ મહિલાઓની 400 મીટર T20 સ્પર્ધામાં સુવર્ણ ચંદ્રક જીત્યો હતો. તે સમયે તેમણે 56.69 સેકન્ડનો સમય નોંધાવીને ગેમ્સ રેકોર્ડ અને એશિયન રેકોર્ડ બનાવ્યો હતો. ત્યારબાદ તેમણે 2024માં જાપાનના કોબેમાં યોજાયેલી વિશ્વ પેરા ઍથ્લેટિક્સ ચૅમ્પિયનશિપમાં મહિલાઓની 400 મીટર T20 સ્પર્ધામાં 55.07 સેકન્ડનો સમય નોંધાવીને વિશ્વ રેકોર્ડ બનાવ્યો અને ગોલ્ડ મેડલ જીત્યો. આ પ્રદર્શને તેમને વિશ્વસ્તરે ઓળખ અપાવી.
પેરિસ પેરાલિમ્પિકમાં પણ કાંસ્ય ચંદ્રક જીત્યો
દીપ્તિએ પેરિસ પેરાલિમ્પિક 2024માં મહિલાઓની 400 મીટર T20 સ્પર્ધામાં કાંસ્ય ચંદ્રક પોતાના નામે કર્યો હતો. તેમણે ફાઇનલમાં 55.82 સેકન્ડનો સમય નોંધાવ્યો હતો. આ સિદ્ધિ સાથે દીપ્તિ પેરાલિમ્પિકમાં ઍથ્લેટિક્સનો ચંદ્રક જીતનારી ભારતની અગ્રણી ખેલાડીઓમાં સામેલ થઈ ગઈ હતી. વિશ્વ ચૅમ્પિયન બન્યા બાદ પેરાલિમ્પિક મંચ પર ચંદ્રક જીતવો તેમની કારકિર્દીનો વધુ એક મોટો પડાવ હતો. દીપ્તિએ 2026 એશિયન પેરા ગેમ્સમાં 56.36 સેકન્ડનો સમય નોંધાવીને મહિલાઓની 400 મીટર T20 સ્પર્ધામાં સુવર્ણ ચંદ્રક જીત્યો. આ વખતે પણ તેમણે ગેમ્સ રેકોર્ડ બનાવ્યો અને જાપાનની બંને પ્રતિસ્પર્ધીઓને પાછળ છોડી દીધી. 2023ની એશિયન પેરા ગેમ્સમાં ગોલ્ડ, 2024ની વિશ્વ ચૅમ્પિયનશિપમાં વિશ્વ રેકોર્ડ સાથે ગોલ્ડ અને પેરિસ પેરાલિમ્પિકમાં કાંસ્ય ચંદ્રક જીત્યા બાદ હવે 2026માં એશિયન પેરા ગેમ્સનો વધુ એક સુવર્ણ ચંદ્રક તેમના નામે થયો છે.
