Public WiFi Scam: ફ્રી Wi-Fi નો ખતરો: નકલી નેટવર્ક બનાવી હજારો લોકોનો ડેટા ચોરાયો; પબ્લિક Wi-Fi પર લોગિન વિગતો આપવાથી બચો

Public WiFi Scam: અવારનવાર લોકો એરપોર્ટ, કેફે કે માર્કેટમાં ફ્રી વાઇ-ફાઇનો ઉપયોગ કરે છે. પરંતુ ઓસ્ટ્રેલિયામાં લોકો માટે ફ્રીનું ઇન્ટરનેટ જીવનું જોખમ બની ગયું. તેનાથી માત્ર લોકો સાથે ઠગાઈ જ ન થઈ, પરંતુ મહિલાઓના ખાનગી વીડિયો પણ ચોરી લેવાયા.

હકીકતમાં, ઓસ્ટ્રેલિયામાં એક ૪૪ વર્ષના વ્યક્તિને ઘણા એરપોર્ટ પર ફર્જી (નકલી) વાઇ-ફાઇ નેટવર્ક બનાવવાના ગુનામાં સજા થઈ છે. તેણે માત્ર લોકોને છેતર્યા જ નહીં પણ મહિલાઓના ખાનગી એકાઉન્ટ હેક કરીને તેમની અંગત તસવીરો અને વીડિયો ચોર્યા હતા. આ મામલો ગયા વર્ષે એપ્રિલમાં સામે આવ્યો હતો. હવે આ ગુનાને અંજામ આપનારા વ્યક્તિને સાત વર્ષ અને ચાર મહિનાની જેલ થઈ છે.

નકલી Wi-Fi કેવી રીતે બનાવતો હતો?

રિપોર્ટ મુજબ, આરોપી એક નાનું ડિવાઇસ વાપરતો હતો, જેનું નામ ‘વાઇ-ફાઇ પાઇનેપલ’ છે. આ ડિવાઇસ પર્થ, મેલબોર્ન અને એડિલેડ એરપોર્ટ પર અને ઘરેલુ ફ્લાઇટ્સમાં કામ કરતું હતું.

કાર્યવાહી: જ્યારે કોઈ મુસાફર પોતાનો ફોન કે લેપટોપ એરપોર્ટના અસલી વાઇ-ફાઇ સાથે જોડવાનો પ્રયત્ન કરતો હતો, ત્યારે આ ડિવાઇસ તરત જ તે જ નામના નકલી નેટવર્ક બનાવી દેતું હતું. નામ બિલકુલ એક જેવું હોવાથી ફોન આપોઆપ તે નકલી નેટવર્કથી જોડાઈ જતો હતો.

લોકો પાસેથી માહિતી કેવી રીતે ચોરતો હતો?

નકલી નેટવર્કથી જોડાતા જ લોકોની સામે એક વેબપેજ ખુલતું હતું. તેમાં ઇમેઇલ કે સોશિયલ મીડિયા એકાઉન્ટથી લોગિન કરવાનું કહેવામાં આવતું હતું. જેવો કોઈ વ્યક્તિ પોતાની માહિતી નાખતો હતો, તે સીધી આરોપીના ડિવાઇસમાં જતી રહેતી હતી. આ રીતે તેણે ઘણા લોકોનો ડેટા ચોર્યો.

ચોરાયેલી માહિતીથી આરોપી મહિલાઓના ફેસબુક, ઇન્સ્ટાગ્રામ અને બીજા એકાઉન્ટમાં ઘૂસી જતો હતો. ત્યાંથી તે ખાનગી ચેટ વાંચતો હતો અને પ્રાઇવેટ તસવીરો-વીડિયો ડાઉનલોડ કરી લેતો હતો. પોલીસને તેના ડિવાઇસમાંથી હજારો એવી ખાનગી ફોટો અને વીડિયો મળ્યા.

પોલીસને કેવી રીતે ખબર પડી?

ફ્લાઇટમાં શંકા: એપ્રિલ ૨૦૨૪ માં એક ઘરેલુ ફ્લાઇટમાં ક્રૂ મેમ્બર્સને એક શંકાસ્પદ વાઇ-ફાઇ નેટવર્ક દેખાયું જે એરલાઇનના અસલી નેટવર્ક જેવું લાગતું હતું. તેમણે એરલાઇનને જણાવ્યું.
પોલીસ કાર્યવાહી: એરલાઇને ઓસ્ટ્રેલિયન ફેડરલ પોલીસ (AFP) ને જાણ કરી. જ્યારે આરોપી પર્થ એરપોર્ટ પર ઉતર્યો ત્યારે તેનો સામાન ચેક કરવામાં આવ્યો. તેના બેગમાંથી વાઇ-ફાઇ પાઇનેપલ, લેપટોપ અને મોબાઇલ ફોન મળી આવ્યા.
પુરાવાનો નાશ: ફોરેન્સિક તપાસમાં હજારો ખાનગી તસવીરો-વીડિયો, લોકોના લોગિન પાસવર્ડ અને નકલી વેબપેજના રેકોર્ડ મળ્યા. દરોડાના બીજા જ દિવસે તેણે પોતાના ક્લાઉડ સ્ટોરેજમાંથી ૧૭૫૨ ફાઇલો ડિલીટ કરવાની કોશિશ કરી, પણ સફળ ન થયો.
ચેતવણી: AFP ની કમાન્ડર રેની કોલીએ કહ્યું કે સાઇબર ક્રાઇમ આખી દુનિયામાં વધી રહ્યો છે. તેમણે લોકોને કહ્યું કે પબ્લિક વાઇ-ફાઇ વાપરતી વખતે ખૂબ સાવધાન રહો. જો કોઈ નેટવર્ક તમારી પાસેથી ઇમેઇલ કે સોશિયલ મીડિયા લોગિન માંગે તો તેને બિલકુલ ન જોડો.