Lenskart Controversy Religious Symbols: આઈવેર કંપની લેન્સકાર્ટ એક નવા વિવાદમાં ફસાઈ ગઈ છે. હવે કંપનીના એક પૂર્વ કર્મચારી હોવાનો દાવો કરતા યુવકે આરોપ લગાવ્યો છે કે ધાર્મિક પ્રતીકો હટાવવાનો ઇનકાર કરવા પર તેને નોકરીમાંથી કાઢી મૂકવામાં આવ્યો હતો. પોતાની જાતને કંપનીના પૂર્વ કર્મચારી ગણાવતા જીલ સોઘાસિયાએ એક વીડિયો જાહેર કરીને દાવો કર્યો છે કે કંપનીએ તેને પોતાની શિખા (ચોટલી) કાપવા, ઓમનું ટેટૂ ભૂંસવા અને તિલક હટાવવા માટે કહ્યું હતું. જ્યારે તેણે આવું કરવાની ના પાડી, ત્યારે તેને નોકરીમાંથી કાઢી મૂકવામાં આવ્યો. આ આરોપ એવા સમયે સામે આવ્યો છે જ્યારે કંપનીમાં ડ્રેસ કોડને લઈને પહેલાથી જ વિવાદ ચાલી રહ્યો છે.
ડૉ. આનંદ રંગનાથને શેર કર્યો વીડિયો
ડૉ. આનંદ રંગનાથને જીલ સોઘાસિયાનો આ વીડિયો પોતાના એક્સ (X) એકાઉન્ટ પર શેર કર્યો છે. તેમણે આ વીડિયો શેર કરતા લખ્યું કે, “મને @Lenskart_com તરફથી પોતાની શિખા કાપવા અને તિલક હટાવવાનો આદેશ આપવામાં આવ્યો. જ્યારે મેં આવું કરવાની ના પાડી, તો મને નોકરીમાંથી કાઢી મૂકવામાં આવ્યો. – જીલ સોઘાસિયા. આ તદ્દન ભેદભાવ અને કટ્ટરતા છે, જે કોઈ આંતરિક મેમોનું પાલન કરવાથી ક્યાંય આગળની વાત છે.” તેમણે પિયુષ બંસલને ટેગ કરતા આગળ લખ્યું કે શ્રી સોઘાસિયાને પરત બોલાવવા જોઈએ અને તેમને ફરીથી નોકરી પર રાખવા જોઈએ.
I was ordered by @Lenskart_com to cut my shikha and remove my tilak. When I refused to do so, I was fired. – Zeel Soghasia
This is blatant discrimination and bigotry that goes beyond adhering to some internal memo. Mr Soghasia must be recalled and reinstated. @peyushbansal pic.twitter.com/V4UANQE2Q1
— Anand Ranganathan (@ARanganathan72) April 18, 2026
સોઘાસિયાએ લગાવ્યા આ આરોપો
ગુજરાતના સુરતના રહેવાસી સોઘાસિયાએ વીડિયોમાં જણાવ્યું કે તેમને ૧૦ ડિસેમ્બર ૨૦૨૫ના રોજ કંપની તરફથી કોલ આવ્યો હતો. મને તે સમયે એવું નહોતું કહેવામાં આવ્યું કે ચોટલી અને તિલક ન રાખી શકાય. મને કહેવામાં આવ્યું કે મુંબઈમાં ટ્રેનિંગ થશે. મને કહેવામાં આવ્યું કે ટ્રેનિંગ હેડ નરગીસ તમને ટ્રેનિંગ આપશે. નરગીસે મને કહ્યું કે પ્રોગ્રામ ચાલુ રાખવા માટે ગ્રૂમિંગ સ્ટાન્ડર્ડ્સનું પાલન કરવું જરૂરી છે. તેમણે દાવો કર્યો કે તેમની ના પાડવાને કારણે તેમને પ્રોગ્રામમાંથી હટાવી દેવામાં આવ્યા.
“વાયરલ થઈ રહેલો દસ્તાવેજ ટ્રેનિંગની એક જૂની નોંધ હતી. આ કંપનીની એચઆર (HR) ની નીતિ નથી. આમાં ભૂલથી બિંદી/તિલકનો ઉલ્લેખ કરવામાં આવ્યો હતો, જેને પહેલાથી જ હટાવી દેવામાં આવ્યો હતો.” – પિયુષ બંસલ
પિયુષ બંસલે આપી હતી સ્પષ્ટતા
જણાવી દઈએ કે લેન્સકાર્ટના એક આંતરિક દસ્તાવેજમાં ઓફિસના ડ્રેસ કોડ સાથે જોડાયેલા નિર્દેશો આપવામાં આવ્યા હતા. આ દસ્તાવેજને લઈને ત્યારે મોટો વિવાદ ઊભો થયો, જ્યારે લોકોએ જણાવ્યું કે તેમાં કામના સ્થળે બિંદી અને તિલક લગાવવાની મનાઈ છે, જ્યારે હિજાબ પહેરવાની પરવાનગી આપવામાં આવી છે. જેમ જેમ આ વિવાદ વધતો ગયો, લેન્સકાર્ટના ફાઉન્ડર અને સીઈઓ પિયુષ બંસલે સ્પષ્ટતા આપી કે આ નીતિ દસ્તાવેજ ખોટો હતો અને તે કંપનીની વર્તમાન ગાઈડલાઈન્સને દર્શાવતો નથી.
