Ducati Superleggera V4 Centenario: ઈટાલીની પ્રખ્યાત મોટરસાયકલ કંપની ડુકાટી (Ducati) એ પોતાની ૧૦૦મી વર્ષગાંઠ નિમિત્તે અત્યાર સુધીની સૌથી એડવાન્સ અને હલકી રોડ-લીગલ બાઈક રજૂ કરી છે. આ બાઈકનું નામ સુપરલેગેરા V4 સેન્ટેનારિયો (Superleggera V4 Centenario) છે અને તેમાં અનેક અનોખા ફીચર્સ આપવામાં આવ્યા છે. આ એક રોડ-લીગલ રેસિંગ બાઈક છે, એટલે કે તમે તેને શહેરના સામાન્ય રસ્તાઓ પર ચલાવી શકો છો. તેની કિંમત દોઢ કરોડથી પણ વધુ છે. ચાલો તમને તેની ખૂબીઓ વિશે વિગતવાર જણાવીએ.
વજનમાં એટલી હલકી કે વિશ્વાસ ન આવે
સામાન્ય રીતે સુપરબાઈક્સ ઘણી ભારે હોય છે. પરંતુ, આ બાઈક સાથે એવું નથી. આ બાઈક ઘણી લાઈટવેઈટ છે, જેનાથી લોકો તેને આરામથી ચલાવી શકે છે. આ બાઈકનું કુલ વજન માત્ર ૧૬૭ કિલોગ્રામ છે. આ મોટરસાયકલ ડુકાટીની જ બીજી એક બાઈક Panigale V4 R કરતા પણ લગભગ ૨૨ કિલો હલકી છે. તેને હલકી બનાવવા માટે તેના ચેસિસ, મડગાર્ડ, ટેન્ક કવર અને સીટ બેઝમાં પણ કાર્બન ફાઈબરનો ઉપયોગ કરવામાં આવ્યો છે.
દુનિયામાં પહેલી કાર્બન-સિરામિક બ્રેક્સવાળી બાઈક
આ દુનિયાની પહેલી એવી રસ્તા પર ચાલતી બાઈક છે જેમાં કાર્બન-સિરામિક બ્રેકિંગ સિસ્ટમ આપવામાં આવી છે. સામાન્ય રીતે આ ટેકનોલોજી માત્ર ફોર્મ્યુલા ૧ કાર અથવા રેસિંગ બાઈક્સમાં જ જોવા મળે છે. પહેલીવાર આ કોઈ મોટરસાયકલમાં આપવામાં આવી છે. આ બ્રેક્સ ખૂબ જ ગરમ થવા છતાં પણ પકડ છોડતી નથી અને બાઈકને સુરક્ષિત રીતે રોકી શકે છે.
સસ્પેન્શન અને ચેઈન
કંપનીએ આ મોટરસાયકલમાં Öhlins NPX 25/30 કાર્બન ફોર્ક્સ સસ્પેન્શન આપ્યા છે, જે ઉબડ-ખાબડ રસ્તાઓ અને તેજ સ્પીડ પર પણ બાઈકને સ્ટેબલ રાખે છે. આમાં DID ERV7 ચેઈનનો ઉપયોગ થયો છે, જે રેસિંગ દરમિયાન પડતા ભારે દબાણને સરળતાથી સહન કરી શકે છે અને જલ્દી ખરાબ થતી નથી.
માત્ર ગણ્યાગાંઠ્યા લોકો પાસે હશે આ બાઈક
દુનિયામાં આ બાઈક માત્ર ગણ્યાગાંઠ્યા લોકો પાસે જ હશે. ડુકાટી આ ખાસ મોડેલના માત્ર ૫૦૦ યુનિટ્સ જ બનાવશે. આ ઉપરાંત ૧૦૦ અત્યંત ખાસ ટ્રાઈકલર (Tricolore) વેરિઅન્ટ પણ તૈયાર કરવામાં આવશે. દરેક બાઈક પર કંપનીના ખાસ સાઈનવાળી પ્લેટ લાગેલી હશે, જે તેને એક વિશિષ્ટ બાઈક બનાવે છે.
કિંમત અને ડિલિવરી
ડુકાટીની આ બાઈક ઘણી મોંઘી પણ છે. તેની કિંમત $૧૬૫,૦૦૦ (ભારતીય રૂપિયામાં આશરે ₹૧.૫૨ કરોડ) થી શરૂ થાય છે. બાઈક ખરીદનારા ગ્રાહકોને લિમિટેડ એડિશન રાઈડિંગ જેકેટ અને હેલ્મેટ પણ સાથે મળશે. તેની ડિલિવરી આવતા વર્ષે એટલે કે ૨૦૨૭ ના પ્રથમ ત્રિમાસિક ગાળાથી શરૂ થશે.
