Car AC Cooling Tips: જેમ જેમ ગરમી નજીક આવી રહી છે, તેમ તેમ ગાડીઓમાં એર કંડિશનર એટલે કે ACની જરૂરિયાત પણ વધવા લાગી છે. કેબિનને ઠંડુ રાખવા માટે આપણે એસીનો ઉપયોગ કરીએ છીએ. પરંતુ, ઘણી વખત લોકો ઉનાળામાં ફરિયાદ કરે છે કે તેમની કારનું AC બરાબર ઠંડક નથી કરી રહ્યું. ગરમી વધવાની સાથે આ સમસ્યા સામાન્ય બની જાય છે. જોકે, ઘણીવાર સમસ્યા એસીમાં નથી હોતી, પરંતુ લોકોની તેને વાપરવાની રીતમાં હોય છે. ઘણીવાર લોકો એવી કેટલીક ભૂલો કરે છે જેના કારણે કારનું એસી બરાબર કૂલિંગ કરી શકતું નથી. ચાલો તમને આવી 5 ભૂલો વિશે જણાવીએ, જેથી તમે તેને સુધારી શકો અને ભીષણ ગરમીમાં કારનું એસી સાથ ન છોડે.
કારમાં બેસતાની સાથે જ ACને ફૂલ સ્પીડ પર ચલાવવું
અહેવાલ મુજબ, તડકામાં ઉભેલી કારની અંદરની હવા ખૂબ જ ગરમ થઈ જાય છે. જો તમે તરત જ AC ને ફૂલ પર ચલાવશો, તો કોમ્પ્રેસર પર ઘણું દબાણ આવશે અને ઠંડક મોડી થશે. નિષ્ણાતોનું કહેવું છે કે કારમાં બેસતાની સાથે જ પહેલા કાચ નીચે કરી દો જેથી ગરમ હવા બહાર નીકળી જાય. આના થોડી વાર પછી AC ચલાવો, આનાથી કેબિન જલ્દી ઠંડુ થશે.
રીસર્ક્યુલેશન મોડનો ઉપયોગ ન કરવો
ઘણા લોકો બહારની હવાને અંદર આવવા દે છે. બપોરની ગરમીમાં બહારની ગરમ હવાને વારંવાર ઠંડી કરવી AC માટે મુશ્કેલ હોય છે. જોકે, સાચી રીત એ છે કે શરૂઆતમાં ગરમ હવાને બહાર કાઢ્યા પછી રીસર્ક્યુલેશન મોડ ઓન કરી દેવો જોઈએ. આનાથી કારની અંદરની ઠંડી હવા જ અંદર ફરતી રહેશે અને કૂલિંગ જળવાઈ રહેશે.
કેબિન એર ફિલ્ટરની સફાઈ ન કરવી
જેમ ઘરના ACની જાળી ગંદી થઈ જાય છે, તેમ કારના એર ફિલ્ટરમાં ધૂળ જામી જાય છે. આનાથી હવાનો પ્રવાહ ઓછો થઈ જાય છે. તેથી કેબિન એર ફિલ્ટરની સફાઈ જરૂરી છે. સર્વિસ સમયે એર ફિલ્ટર ચોક્કસ સાફ કરાવો અથવા બદલો. જો તમે ધૂળવાળી જગ્યાએ રહો છો, તો તેને જલ્દી ચેક કરાવતા રહો.
રેગ્યુલર સર્વિસ ન કરાવવી
લોકો અવારનવાર ત્યાં સુધી મિકેનિક પાસે નથી જતા જ્યાં સુધી AC સંપૂર્ણપણે કામ કરવાનું બંધ ન કરી દે. આનાથી ધીરે ધીરે ગેસ લીક થતો રહે છે અથવા સ્પેરપાર્ટ્સ ઘસાઈ જાય છે. જો તમને થોડી પણ તકલીફ જણાય તો મિકેનિકને જરૂર બતાવો. સૌથી સારી રીત એ છે કે ઉનાળાની શરૂઆતમાં જ ACની સર્વિસ કરાવી લો. આનાથી નાના-મોટા લીકેજ સમયસર પકડાઈ જાય છે અને પછીથી મોટો ખર્ચ થતો નથી.
તડકામાં પાર્કિંગની ખોટી આદત
ઉનાળામાં કારને તડકામાં ઉભી રાખવાનું ટાળો. સીધા તડકામાં ઉભેલી કાર ભઠ્ઠીની જેમ તપવા લાગે છે. કાળા રંગનું ઈન્ટિરિયર તો વધુ ગરમી શોષે છે. તેથી હંમેશા કારને છાયડામાં અથવા કવર્ડ પાર્કિંગમાં પાર્ક કરો. વિન્ડશીલ્ડ પર સનશેડ લગાવો. સાથે જ કાચને થોડાક ખુલ્લા પણ છોડી દો જેથી હવા પસાર થતી રહે.
