India Electric Two Wheeler Sales: જુલાઈમાં ઇલેક્ટ્રિક ટૂ-વ્હીલર બજારમાં જબરદસ્ત વૃદ્ધિ, ઓલા ઇલેક્ટ્રિકને મોટો ફટકો
India Electric Two Wheeler Sales: ભારતમાં ઇલેક્ટ્રિક ટૂ-વ્હીલર્સની માંગ ઝડપથી વધી રહી છે. જુલાઈ મહિનામાં ઇલેક્ટ્રિક ટૂ-વ્હીલરનું રજિસ્ટ્રેશન વાર્ષિક ધોરણે 80% વધીને 1,95,446 યુનિટ્સ પર પહોંચ્યું છે. ગયા વર્ષે આ જ મહિનામાં વેચાણ ઘણું ઓછું હતું, જેના મુકાબલે આ વર્ષે મોટો ઉછાળો જોવા મળ્યો છે. જૂન મહિના (1,94,940 યુનિટ્સ) ની સરખામણીએ જુલાઈમાં બજારમાં સ્થિરતા જળવાઈ રહી હતી. કુલ ટૂ-વ્હીલર બજારમાં ઇલેક્ટ્રિક વ્હીકલ્સનો હિસ્સો જૂનના 10.6% થી વધીને જુલાઈમાં 11.1% થઈ ગયો છે. આવો જાણીએ કે કઈ કંપની નંબર-1 રહી અને કોનું પ્રદર્શન કેવું રહ્યું.
ટીવીએસ મોટર નંબર-1 પર યથાવત્
ટીવીએસ મોટરે પોતાનું પ્રથમ સ્થાન જાળવી રાખ્યું છે. ઓટોકાર પ્રોફેશનલના અહેવાલ મુજબ કંપનીએ જુલાઈ 2026માં 53,031 યુનિટ્સનું વેચાણ કર્યું, જે ગયા વર્ષના આ જ મહિનામાં વેચાયેલા 23,581 યુનિટ્સની સરખામણીએ બમણાથી પણ વધુ છે. કંપનીનો માર્કેટ શેર વધીને 27.1% થયો છે.
બજાજ ઓટો બીજા સ્થાને
જુલાઈ 2026માં બજાજ ઓટો 43,817 રજિસ્ટ્રેશન સાથે બીજા સ્થાને રહ્યું. તેના વેચાણમાં વાર્ષિક ધોરણે 113%નો જબરદસ્ત વધારો નોંધાયો છે અને માર્કેટ શેર વધીને 22.4% થયો છે.
એથર એનર્જી ત્રીજા સ્થાને
જુલાઈ મહિનામાં એથર એનર્જીએ 29,301 યુનિટ્સનું વેચાણ કર્યું, જે ગયા વર્ષની સરખામણીએ 64% વધુ છે. જોકે, જૂન મહિનાની સરખામણીએ તેના વેચાણમાં 7%નો ઘટાડો નોંધાયો છે અને તેનો માર્કેટ શેર 15.0% રહ્યો છે.
હીરો મોટોકોર્પ ચોથા સ્થાને
હીરો મોટોકોર્પે પણ પોતાની સ્થિતિ મજબૂત બનાવી છે. જુલાઈ 2026માં કંપનીનું વેચાણ લગભગ બમણું થઈને 21,506 યુનિટ્સ પર પહોંચ્યું, જ્યારે ગયા વર્ષે આ આંકડો 10,835 યુનિટ્સ હતો. કંપનીનો માર્કેટ શેર 11.0% રહ્યો છે.
ઓલા ઇલેક્ટ્રિકના વેચાણમાં ઘટાડો
ઓલા ઇલેક્ટ્રિક એકમાત્ર એવી મોટી કંપની રહી જેના વેચાણમાં ઘટાડો નોંધાયો છે. ઓલાના વેચાણમાં વાર્ષિક ધોરણે 27% અને માસિક ધોરણે 17%નો ઘટાડો નોંધાયો અને વેચાણ ઘટીને 13,520 યુનિટ્સ પર આવી ગયું. કંપનીનો માર્કેટ શેર ઝડપથી ઘટીને 6.9% રહ્યો, જ્યારે ગયા વર્ષે તે 17.0% હતો.
તે ઉપરાંત જુલાઈ 2026માં ગ્રીવ્સ ઇલેક્ટ્રિકે 9,768 યુનિટ્સ, રિવર મોબિલિટીએ 5,791 યુનિટ્સ અને બીગોસ ઓટોએ 5,353 યુનિટ્સનું વેચાણ નોંધાવ્યું.
ભારતનું ઇલેક્ટ્રિક ટૂ-વ્હીલર બજાર
ભારતનું ઇલેક્ટ્રિક ટૂ-વ્હીલર બજાર ઝડપથી વિકસી રહ્યું છે, જ્યાં ટીવીએસ અને બજાજ જેવી જૂની અને વિશ્વસનીય કંપનીઓએ પોતાની પકડ વધુ મજબૂત બનાવી છે. ઉપરાંત અન્ય કંપનીઓ પણ સારું પ્રદર્શન કરી રહી છે. જુલાઈમાં કુલ ઇલેક્ટ્રિક ટૂ-વ્હીલર વેચાણમાં 82%થી વધુ હિસ્સો માત્ર ટોપ-5 કંપનીઓનો રહ્યો. ચાલુ નાણાકીય વર્ષ (એફવાય27) ના પ્રથમ ચાર મહિનામાં ઇલેક્ટ્રિક ટૂ-વ્હીલરનું કુલ રજિસ્ટ્રેશન વાર્ષિક ધોરણે 71% વધીને 7,20,730 યુનિટ્સ સુધી પહોંચી ગયું છે.
