Home Loan Tips: તહેવારોની મોસમ ચાલી રહી છે. આ દરમિયાન ઘણા લોકો દિવાળી સુધીમાં પોતાના નવા ઘર અથવા ફ્લેટમાં રહેવા જવાની યોજના બનાવી રહ્યા છે. સમયની સાથે મિલકતની વધતી કિંમતો વચ્ચે લોકોને હોમ લોનની જરૂર પડે છે. આ માટે તેઓ અનેક બેંકોની યાદી તપાસે છે અને જાણવાનો પ્રયાસ કરે છે કે કઈ બેંકમાં સૌથી સસ્તી હોમ લોન મળી રહી છે. આ માટે તેઓ બેંકોના વ્યાજદર સહિતની અન્ય જરૂરી બાબતો પણ તપાસે છે.
જોકે, માત્ર સસ્તી લોન જ યોગ્ય લોન હોતી નથી. હોમ લોન લેતી વખતે તમારે બીજી ઘણી બાબતોનું પણ ધ્યાન રાખવું પડે છે. અહીં અમે આવી 4 બાબતો જણાવી રહ્યા છીએ, જે હોમ લોન લેતાં પહેલાં તમારા માટે ઉપયોગી થઈ શકે છે. ચાલો, જાણીએ.
હોમ લોન લેતાં પહેલાં કઈ બાબતોનું ધ્યાન રાખવું?
જ્યારે પણ તમે હોમ લોન લેવાનું વિચારો છો, ત્યારે સૌથી પહેલાં યોગ્ય હોમ લોન આપનાર એટલે કે ધિરાણકર્તા કેવી રીતે પસંદ કરવો તેનું આયોજન કરો છો. ચાલો જાણીએ કે હોમ લોન અને ધિરાણકર્તા પસંદ કરતી વખતે કઈ બાબતોનું ધ્યાન રાખવું ખૂબ જ જરૂરી છે.
લોનની રકમ
સૌથી પહેલાં લોનની રકમ એટલે કે પૈસાની વાત કરીએ. તમામ બેંકો ગ્રાહકની આવકના આધારે એકસરખી લોનની રકમ આપતી નથી. લોન માટેની પાત્રતા નક્કી કરવા અલગ-અલગ બેંકોનાં પોતાનાં માપદંડો અને નિયમો હોય છે. સ્વાભાવિક છે કે તમે એવા ધિરાણકર્તાની પસંદગી કરવા ઇચ્છશો, જે તમારી જરૂરિયાત પ્રમાણે લોનની રકમ આપી શકે.
વ્યાજદર
કોઈપણ પ્રકારની લોન માટે વ્યાજદર ખૂબ મહત્ત્વનો હોય છે. જો વ્યાજદર વધારે હોય, તો તમારે દર મહિને વધુ EMI ચૂકવવી પડે છે. તેથી બજારમાં ઉપલબ્ધ શ્રેષ્ઠ વ્યાજદરો વિશે ચોક્કસ માહિતી મેળવો. ઓછા વ્યાજદરને કારણે તમારે ઓછી EMI ચૂકવવી પડે છે.
જો તમે ફ્લોટિંગ રેટ પર લોન લીધી હોય, તો એ પણ ધ્યાનમાં રાખવું જોઈએ કે સમયાંતરે વ્યાજદરમાં ફેરફાર થઈ શકે છે, જેની અસર તમારી EMI પર પડશે. વ્યાજદરમાં થોડો વધારો થવાનો અર્થ એ છે કે તમારે દર મહિને થોડાક સો અથવા હજાર રૂપિયા વધારે ચૂકવવા પડી શકે છે. બજારમાં વ્યાજદર ઘટે ત્યારે ધિરાણકર્તા ગ્રાહકોને તેનો લાભ કેટલી વાર આપે છે તે પણ તપાસો.
ફી અને દંડ
કેટલાક ધિરાણકર્તા અથવા બેંકો ઓછા વ્યાજદરની લાલચ આપી શકે છે, પરંતુ તેમની શરતો અને ફી વધારે હોઈ શકે છે. તેથી લોન લેતાં પહેલાં અરજી ફી, પ્રોસેસિંગ ફી, સ્વિચિંગ ચાર્જ, કાનૂની ચાર્જ, મિલકતના મૂલ્યાંકનનો ચાર્જ અને સમય પહેલાં લોનની ચુકવણી કરવા પર લાગતો દંડ જેવી જરૂરી બાબતો તપાસી લેવી જોઈએ.
ગ્રાહક સેવા
છેલ્લે ગ્રાહક સેવાની વાત કરીએ. લોન લેનાર અને બેંક વચ્ચેનો સંબંધ 10થી 15 વર્ષ સુધી ચાલે છે. તેથી ધિરાણકર્તા સારી ગ્રાહક સેવા આપે અને પોતાના ગ્રાહકોને સંપૂર્ણપણે સંતુષ્ટ રાખે તે ખૂબ જરૂરી છે. આથી કોઈપણ બેંક પાસેથી હોમ લોન લેતાં પહેલાં તેની ગ્રાહક સેવા કેવી છે તે તપાસી લેવું જોઈએ.
હોમ લોન સંબંધિત મહત્ત્વના પ્રશ્નો અને જવાબો
1. હોમ લોન લેતાં પહેલાં કઈ બાબતોનું ધ્યાન રાખવું?
હોમ લોન લેતાં પહેલાં બેંક, વ્યાજદર, ફી અને ગ્રાહક સેવા સહિતની અન્ય બાબતોને ધ્યાનમાં રાખો.
2. હોમ લોન પર વ્યાજદર વધે તો શું થાય?
હોમ લોન પર વ્યાજદર વધે તો લોનની EMI વધી શકે છે.
3. ફ્લોટિંગ રેટ ક્યારે પસંદ કરી શકાય?
જ્યારે તમને લાગે કે વ્યાજદરમાં ઘટાડો થઈ શકે છે, ત્યારે તમે ફ્લોટિંગ રેટ પસંદ કરી શકો છો.
4. ફિક્સ્ડ લોન રેટ ક્યારે પસંદ કરવો જોઈએ?
જ્યારે તમને લાગે કે વ્યાજદરમાં વધારો થઈ શકે છે, ત્યારે તમારે ફિક્સ્ડ લોન રેટ પસંદ કરવો જોઈએ.
5. રેપો રેટ શું છે?
રેપો રેટ એ વ્યાજદર છે, જેના આધારે ભારતીય રિઝર્વ બેંક દેશની વ્યાપારી બેંકોને લોન આપે છે.
