Money Lessons for Middle Class: આજની દોડધામભરી જિંદગીમાં લોકો માટે પૈસા બચાવવા કરતાં વધુ કમાવાનું મહત્વ વધી ગયું છે. મધ્યમ વર્ગના લોકો કેટલીક આદતોના કારણે પૈસા બચાવી શકતા નથી. પરંતુ નિષ્ણાતોના મતે, કેટલીક સરળ વાતો અપનાવીને મધ્યમ વર્ગના લોકો પણ સંપન્ન બની શકે છે. હા, તે માટે કેટલીક જૂની નાણાકીય શિખામણોનું પાલન કરવું જરૂરી છે.
ચાર્ટર્ડ એકાઉન્ટન્ટ નિતિન કૌશિકે સોશિયલ મીડિયા પ્લેટફોર્મ X પર એક પોસ્ટ દ્વારા ભારતીય મધ્યમ વર્ગની કેટલીક એવી શિખામણો વિશે જણાવ્યું, જે આજના ઝડપી યુગમાં પણ મહત્વપૂર્ણ છે. તેમણે લખ્યું કે, “મેં મારા પિતાને હંમેશા કહેતા સાંભળ્યું છે કે પૈસા બતાવવા માટે નહીં, સંભાળવા માટે હોય છે.”
નિતિન કૌશિક કહે છે કે જે બાબતો તેમને પહેલાં જૂની લાગતી હતી, એ જ સાચી સમૃદ્ધિનું આધાર બની. તેમના મુજબ, અનુકૂલન અને અનુશાસન જ સફળતાની ચાવી છે. દેખાવ માટેનું ધન થોડા સમય માટે હોય છે, પરંતુ ધીરજથી વધારેલું ધન ટકાઉ હોય છે.
તેમણે ઉમેર્યું કે પહેલાંના સમયમાં મધ્યમ વર્ગના લોકો પૈસાનો દેખાવ કરતા ન હતા. મોંઘી કાર કે ઘડિયાળ બતાવવાની ફેશન નહોતી. તેમનો ધ્યેય હતો આર્થિક શાંતિ મેળવવાનો, EMIના બોજ તળે દબાવાનો નહીં. એ જ કારણે આજે પણ અનેક મધ્યમ વર્ગના પરિવારો એવા લોકો કરતાં વધુ શાંતિથી ઊંઘી શકે છે, જેઓની આવક તેમની કરતાં દસ ગણી વધારે છે.
સરળ અને અસરકારક સિદ્ધાંત
કૌશિક જણાવે છે કે પહેલાનો એક સરળ પણ અસરકારક નિયમ હતો – એ જ ખરીદો, જેનો આખો પૈસો તમે તરત આપી શકો. અનાવશ્યક કર્જથી બચવું, ક્રેડિટ કાર્ડનો ઓછો ઉપયોગ કરવો અને તાત્કાલિક આનંદની બદલે ધીરજ રાખવી — આ આદતો અનેક પરિવારોને આર્થિક મુશ્કેલીઓથી બચાવતી હતી.
તેમણે વધુમાં જણાવ્યું કે સોનું અને જમીન જેવી પરંપરાગત વસ્તુઓમાં રોકાણ ફક્ત નફા માટે નહીં, પણ ભાવનાત્મક અને સામાજિક સુરક્ષાના માટે કરવામાં આવતું હતું. થોડાં સોનાના સિક્કા આત્મવિશ્વાસ આપતા હતા, લાલચ નહીં. જમીનનો માલિક બનવું માત્ર સંપત્તિનું મૂલ્ય નહીં, પણ માન અને સ્થિરતાનું પ્રતિક હતું.
આજના યુગમાં બદલાઈ ગયેલી પ્રાથમિકતાઓ
આજના સમયમાં લોકો સંપત્તિ કરતાં વધુ લિક્વિડિટી (તાત્કાલિક ઉપલબ્ધ નાણાં) અને કેશ ફ્લો (પૈસાના પ્રવાહ)ને વધુ મહત્વ આપે છે. પરંતુ કૌશિકના મતે, જૂની શિખામણોનો સાર આજેય એટલો જ અસરકારક છે. તેઓ કહે છે કે આ શિખામણોનો હેતુ તમને એક રાતમાં ધનિક બનાવવાનો નહોતો, પરંતુ એ સુનિશ્ચિત કરવાનું હતું કે તમે ક્યારેય ગરીબ ન બનો.
