Visa Launches Payment Passkey: દેશમાં ઓનલાઈન ટ્રાન્ઝેક્શનનું ચલણ વધવાની સાથે જ તેની સાથે જોડાયેલા ફ્રોડ પણ ઝડપથી વધી રહ્યા છે. તેનું એક મોટું કારણ ઓટીપી (OTP) સાથે જોડાયેલા ફ્રોડ છે. પરંતુ દેશમાં પાસવર્ડ અને ઓટીપીનો દોર જલ્દી જ પૂરો થવાનો છે. ડિજિટલ પેમેન્ટ કંપની વિઝાએ ભારતમાં પોતાનું ‘પેમેન્ટ પાસકી’ (VPP) સોલ્યુશન લોન્ચ કરી દીધું છે.
આ ઓનલાઈન કાર્ડ પેમેન્ટ માટે એક વૈકલ્પિક ઓથેન્ટિકેશન રીત છે, જે વન-ટાઈમ પાસવર્ડ (OTP) પરની નિર્ભરતાને ઘટાડે છે. આ સોલ્યુશન આઈડીએફસી (IDFC) ફર્સ્ટ બેંક સાથે પહેલા બેંકિંગ પાર્ટનર તરીકે શરૂ થયું છે. હાલમાં તે મિન્ટ્રા, પેટીએમ, મેકમાઈટ્રિપ, ટાટા સ્ટારબક્સ, રિલાયન્સ ડિજિટલ અને ઈટસ્યોર જેવા પસંદગીના મર્ચન્ટ્સના યુઝર્સ માટે ઉપલબ્ધ છે.
વિઝાના ઈન્ડિયા અને સાઉથ એશિયા હેડ સુરેશ સેઠીએ ગુરુવારે કહ્યું કે કંપનીએ ભારતમાં પોતાનું પેમેન્ટ પાસકી (Passkey) સમાધાન લોન્ચ કર્યું છે. ગ્રાહકો હવે તેમના મોબાઈલના ફિંગરપ્રિન્ટ અથવા ફેસ રિકગ્નિશનથી પેમેન્ટ કરી શકશે. તેનાથી ઓટીપી ચોરી દ્વારા થતા ફ્રોડથી સુરક્ષા મળશે. હવે પાસવર્ડ અને ઓટીપીનો જમાનો જૂનો થઈ ગયો છે.
આરબીઆઈ (RBI) ફ્રેમવર્કને અનુરૂપ
ફાસ્ટ આઈડેન્ટિટી ઓનલાઈન (FIDO) ઓથેન્ટિકેશન સ્ટાન્ડર્ડ પર બનેલું વિઝા પેમેન્ટ પાસકી કાર્ડધારકોને તેમના ડિવાઈસના નેટિવ સિક્યોરિટી ફીચર્સ જેવા કે ફિંગરપ્રિન્ટ, ફેશિયલ રિકગ્નિશન, પિન, પાસવર્ડ અથવા પેટર્નનો ઉપયોગ કરીને ટ્રાન્ઝેક્શનને ઓથેન્ટિકેટ કરવાની સુવિધા આપે છે. કંપનીએ કહ્યું કે આ સુવિધા આરબીઆઈના ફ્રેમવર્કને અનુરૂપ છે. કેન્દ્રીય બેંકે ડિજિટલ પેમેન્ટ ટ્રાન્ઝેક્શન માટે વૈકલ્પિક ઓથેન્ટિકેશન રીતો પર સપ્ટેમ્બર ૨૦૨૫માં ફ્રેમવર્ક જારી કર્યું હતું.
વિઝાએ આ સોલ્યુશનને જસપે (Juspay), વિબમો (Wibmo), રેઝરપે (Razorpay), પેયુ (PayU), પાઈન લેબ્સ (Pine Labs), બિલડેસ્ક (BillDesk), એમ૨પી ફિનટેક (M2P Fintech) અને પેટીએમ પેમેન્ટ્સ સર્વિસીસ જેવા પેમેન્ટ અને ફિનટેક પાર્ટનર્સ સાથે પણ ઈન્ટિગ્રેટ કર્યું છે. કંપનીનો દાવો છે કે આ ટેક્નોલોજીથી પેમેન્ટ સક્સેસ રેટમાં સુધારો થવા અને ઓનલાઈન ટ્રાન્ઝેક્શન પૂર્ણ કરવા માટે જરૂરી સ્ટેપ્સની સંખ્યા ઘટવાની આશા છે.
શું થશે ફાયદો?
સેઠીએ કહ્યું, ‘વિઝા પેમેન્ટ પાસકી સાથે, અમે લોકોને બાયોમેટ્રિક્સ, પિન, પાસવર્ડ અથવા પેટર્ન જેવા જાણીતા ડિવાઈસ-આધારિત અનુભવો દ્વારા કાર્ડ પેમેન્ટને ઓથેન્ટિકેટ કરવામાં સક્ષમ બનાવી રહ્યા છીએ. આ રીતે અમે ડિજિટલ કોમર્સને સુરક્ષિત, વધુ સમાવેશી અને ઉપયોગમાં સરળ બનાવવામાં મદદ કરી રહ્યા છીએ.’
