California Education System: અમેરિકાના સૌથી અમીર રાજ્ય કેલિફોર્નિયાએ તેના શિક્ષણ પ્રણાલીમાં ફેરફાર કર્યા છે. નવા વર્ષ સાથે કેલિફોર્નિયામાં શિક્ષણ પ્રણાલીના નવા કાયદા લાગુ થઈ ગયા છે. આ નવા કાયદાઓમાં વિદ્યાર્થીઓની ગોપનીયતા, ઇતિહાસ શિક્ષણ અને ભેદભાવથી સુરક્ષા જેવા મહત્વપૂર્ણ મુદ્દાઓ સામેલ કરવામાં આવ્યા છે. ચાલો જાણીએ એ ચાર મુખ્ય કાયદાઓ વિશે, જે જાન્યુઆરી 2025માં લાગુ કરવામાં આવ્યા છે.
LGBTQ+ વિદ્યાર્થીઓની ગોપનીયતા
1 જાન્યુઆરી, 2025થી ‘અસેમ્બલી બિલ 1995’ (SAFETY Act) લાગુ થયો છે. આ કાયદા દ્વારા LGBTQ+ વિદ્યાર્થીઓની ગોપનીયતાનું રક્ષણ કરવામાં આવશે. આ કાયદા દ્વારા, શાળાના સ્ટાફને માતાપિતાને બાળકની જાતિ ઓળખ વિશે જણાવવા માટે દબાણ કરી શકાશે નહીં. આ કાયદો એટલા માટે લાવવામાં આવ્યો છે કારણ કે કેટલીક શાળાઓમાં આવી નીતિઓ લાવવાની તૈયારીઓ કરવામાં આવી હતી, જેમાં શિક્ષકોએ વાલીઓને જણાવવું પડશે કે તેમના બાળકો પોતાને કઈ જાતિ તરીકે વર્ણવે છે.
મૂળ અમેરિકન લોકોનો ઇતિહાસ શીખવવો
કેલિફોર્નિયામાં ‘અસેમ્બલી બિલ 1821’ લાગુ કરવામાં આવ્યું છે, જેના હેઠળ હવે શાળાઓએ મૂળ અમેરિકન લોકોનો ઇતિહાસ શીખવવો ફરજિયાત બન્યું છે. ઇતિહાસ ભણાવતી વખતે તેમાં કોઈ ફેરફાર કે કાપકૂપ નહીં કરાય. આ કાયદા હેઠળ, કેલિફોર્નિયા જ્યારે તેના ઇતિહાસ-સામાજિક વિજ્ઞાનના કોર્સને અપડેટ કરશે, ત્યારે તેને સ્પેનિશ કોલોનીયલિઝમ અને ‘ગોલ્ડ રશ’ દરમિયાન મૂળ અમેરિકનના અનુભવોને વધુ સારું દર્શાવવા માટે રાજ્યની જનજાતિઓની સલાહ લેવી ફરજિયાત હશે.
મેન્ડેઝ વર્સેસ વેસ્ટમિન્સ્ટરને કોર્સમાં સમાવેશ કરવો
કેલિફોર્નિયાના શૈક્ષણિક માળખામાં વધુ એક ફેરફાર ‘અસેમ્બલી બિલ 1805’ દ્વારા કરવામાં આવ્યો છે. આ કાયદા અંતર્ગત રાજ્યના ઇતિહાસ-સામાજિક વિજ્ઞાનના કોર્સમાં ઐતિહાસિક કેસ મેન્ડેઝ વર્સેસ વેસ્ટમિન્સ્ટર સ્કૂલ ડિસ્ટ્રિક્ટનો સમાવેશ કરવો ફરજિયાત બન્યો છે. 1945ના આ કેસે ઓરેન્જ કાઉન્ટી સ્કૂલોમાં મેક્સિકન-અમેરિકન બાળકોના ભેદભાવને પડકાર્યો હતો, જે જાહેર શાળાઓમાં ભેદભાવ પર રાજ્યસ્તરીય પ્રતિબંધ લાવનારો પહેલો નિર્ણય હતો. નવા કાયદા હેઠળ કેલિફોર્નિયાના વિદ્યાર્થીઓ હવે આ મહત્વપૂર્ણ કેસનો અભ્યાસ કરશે.
હેરસ્ટાઇલ પર આધારિત ભેદભાવથી રક્ષણ
કેલિફોર્નિયામાં ‘અસેમ્બલી બિલ 1815’ લાગુ કરવામાં આવ્યું છે, જે હેરસ્ટાઇલના આધારે ભેદભાવ સામે સુરક્ષા આપે છે. CROWN Act દ્વારા અગાઉથી જ કાર્યસ્થળ અને શાળાઓમાં હેરસ્ટાઇલના આધારે ભેદભાવ પર પ્રતિબંધ છે. પરંતુ આ કાયદાએ સ્પષ્ટ કર્યું છે કે હવે યુવાનોના ખેલકૂદમાં પણ આ નિયમ લાગુ થશે. આ કાયદા દ્વારા જાતિભેદની કાનૂની વ્યાખ્યાને વિસ્તૃત કરવામાં આવી છે, જેમાં ફક્ત ઐતિહાસિક નહીં પણ સાંસ્કૃતિક જોડાણો પણ શામેલ છે, જેમકે બ્રેડ્સ, લોક્સ અને ટ્વિસ્ટ્સ.
