US Public Charge Rule: અમેરિકામાં ગ્રીન કાર્ડ મેળવવાની ઇચ્છા ધરાવતા ભારતીય વર્કર્સ માટે મહત્વના સમાચાર છે. રાષ્ટ્રપતિ ડોનાલ્ડ ટ્રમ્પની સરકાર દ્વારા ગ્રીન કાર્ડને લઈને નવો નિયમ લાગુ કરવામાં આવ્યો છે. અમેરિકામાં પરમેનન્ટ રેસિડન્સી/ગ્રીન કાર્ડ માટે અરજી કરનારા વિદેશી નાગરિકોને હવે Medicaid, Food Stamps, Tuition Assistance અથવા Free School Lunch Program જેવા સરકારી લાભોનો ઉપયોગ કરવા બદલ અરજી નામંજૂર કરવામાં આવી શકે છે.
સરળ ભાષામાં કહીએ તો હવે જો તમે સરકારી મદદ લીધી હોય, તો તમારી અરજી નામંજૂર થઈ શકે છે. ટ્રમ્પ સરકારનો વિસ્તૃત ‘Public Charge’ નિયમ લાગુ થઈ ગયો છે. આ નિયમ ઇમિગ્રેશન અધિકારીઓને એ બાબત પર વિચાર કરવાની મંજૂરી આપે છે કે કોઈ અરજદાર દ્વારા સરકારી સહાયનો ઉપયોગ એ દર્શાવે છે કે તે ભવિષ્યમાં સરકારી મદદ પર નિર્ભર રહેવાની શક્યતા ધરાવે છે કે નહીં.
સરકારે નવા નિયમ અંગે શું કહ્યું છે?
- Department of Homeland Security (DHS)એ કહ્યું છે કે આ નિયમ દર્શાવે છે કે અમેરિકામાં રહેતા બિન-નાગરિકોએ પોતાના પર નિર્ભર રહેવું જોઈએ.
- સરકારે કહ્યું છે કે બિન-નાગરિકો કોઈપણ રીતે કરદાતાઓના નાણાંથી મળતા સરકારી લાભો પર નિર્ભર રહી શકે નહીં.
- DHSના એક પોલિસી ડોક્યુમેન્ટમાં કહેવામાં આવ્યું છે કે, ‘અમેરિકામાં રહેતા પ્રવાસીઓએ આત્મનિર્ભર હોવું જોઈએ અને સરકારી લાભોથી ઇમિગ્રેશનને પ્રોત્સાહન મળવું જોઈએ નહીં.’
- ગ્રીન કાર્ડ કોઈ પ્રવાસીને કાયદેસર રીતે કાયમી નિવાસનો દરજ્જો આપે છે અને અમેરિકન નાગરિકતા ઇચ્છતા લોકો માટે તે સામાન્ય રીતે જરૂરી હોય છે.
નિયમની શું અસર થશે?
Public Chargeનો નિયમ ઇમિગ્રેશન અધિકારીઓને એ નક્કી કરવાનો અધિકાર આપે છે કે કોઈ અરજદાર દ્વારા Food Stamps જેવી સુવિધાઓનો ઉપયોગ એ દર્શાવે છે કે તે ક્યારેય સરકારી મદદ પર નિર્ભર થઈ શકે છે કે નહીં. વિવેચકોએ ચેતવણી આપી છે કે સ્પષ્ટ માર્ગદર્શિકા ન હોવાથી અધિકારીઓ પોતાની રીતે નિર્ણય લઈ શકે છે. તેમનું એવું પણ કહેવું છે કે નિયમના કારણે બિન-નાગરિક પરિવારો એવા સરકારી કાર્યક્રમોનો લાભ લેતા ખચકાઈ શકે છે, જેના માટે તેઓ કાયદેસર રીતે પાત્ર છે.
નવા નિયમમાં શું બદલાયું છે?
અમેરિકામાં 1882થી Public Charge પોલિસી અમલમાં છે. ઇમિગ્રેશન અધિકારીઓ લાંબા સમયથી એ બાબતનું મૂલ્યાંકન કરતા આવ્યા છે કે કોઈ અરજદાર સરકારી સહાય પર નિર્ભર થઈ શકે છે કે નહીં. આ માટે તેઓ અરજદારના સ્વાસ્થ્ય, નાણાકીય સ્થિતિ અને કૌશલ્યને ધ્યાનમાં લે છે. અગાઉ માત્ર ડાયરેક્ટ કેશ પેમેન્ટ, જેમ કે અપંગતા આવક, અને લાંબા સમય સુધી હોસ્પિટલમાં દાખલ રહેવાને જ ગ્રીન કાર્ડની અરજી નામંજૂર કરવાનો આધાર માનવામાં આવતો હતો.
નવો નિયમ આ મૂલ્યાંકનનો વ્યાપ વધારીને તેમાં અનેક નોન-કેશ બેનિફિટ્સને પણ સામેલ કરે છે. આ નિયમ અમેરિકન નાગરિકો અને કાયદેસર રીતે પરમેનન્ટ રેસિડેન્ટના નજીકના પરિવારના સભ્યો પર લાગુ થાય છે, જેમાં બાળકો, જીવનસાથી અને મંગેતરનો સમાવેશ થાય છે. સ્કિલ વર્કર્સ પણ તેના દાયરામાં આવે છે.
