કર્ણાટકમાં પરિવહન વિભાગ દ્વારા ઓલા-ઉબર સામે વધારાનું ભાડું વસૂલવા બદલ 292 કેસ નોંધાયા.
Monday, 19 September 2022
છેલ્લા કેટલાક સમયથી ઓલા અને ઉબર સામે લોકોને ભાડા અંગે વિવિધ ફરિયાદો અને શિકાયતો જોવા મળી રહી છે, ઘણી વખત ઓલા અને ઉબર માં રાઈડ બુક કરતા પીક-અપ લોકેશન સીધું હોવા છતાંય ગૂગલ મેપ માં એ લોકેશન આડુ-અવળું કરીને તેને લોન્ગ ડિસ્ટન્સ બનાવવામાં આવે છે. જેનાથી મુસાફરીના સમય માં વધારો તો થાય છે તેમજ રાઈડનું ભાડું પણ વધી જાય છે. કર્ણાટક પરિવહન વિભાગ આ મુદ્દાને લઈને એકશનમાં આવ્યું છે.
બેંગલુરુમાં, લોકોએ મુખ્ય પ્રધાન તેમજ સરકારી અધિકારીઓને ઇમેઇલ દ્વારા ફરિયાદો મોકલી હતી, જેના પગલે કર્ણાટક પરિવહન વિભાગે શહેરના વિવિધ વિસ્તારોમાં મુસાફરો પાસેથી વધારાનું ભાડું વસૂલતી કંપનીઓ અને ડ્રાઇવરોને ઓળખવા માટે એક ઝુંબેશ શરૂ કરી હતી.
કર્ણાટકના પરિવહન વિભાગના અધિકારીઓને બેંગલુરુમાં કેબ ઓપરેટરો, ઓલા-ઉબર અને અન્યો સામે વધુ પડતા ભાડા વસૂલવા બદલ 292 ફરિયાદો મળી છે.એક અહેવાલ મુજબ, મુસાફરો પાસેથી વધુ પડતા ભાડા વસૂલવાની આ ફરિયાદોને કારણે શુક્રવારે પરિવહન વિભાગે ઓલા, ઉબર અને અન્ય ઓપરેટરો સામે ઝુંબેશ શરૂ કરી હતી.ટ્રાન્સપોર્ટ કમિશનર ટીએચએમ કુમારે જણાવ્યું હતું કે ઓવરચાર્જિંગ માટે 292 કેસ નોંધાયા છે.
રિપોર્ટમાં જણાવવામાં આવ્યું છે કે મુસાફરોએ આ મામલે અન્ય સરકારી અધિકારીઓને તેમજ ખુદ મુખ્યમંત્રીને ઈમેલ દ્વારા ફરિયાદો મોકલી હતી. આ પછી, વાહનવ્યવહાર વિભાગે શહેરના વિવિધ વિસ્તારોમાં આવા ઓપરેટરો અને ડ્રાઇવરોને ઓળખવા માટે ઝુંબેશ શરૂ કરી હતી.કમિશનરે કહ્યું, “સામાન્ય લોકો ફરિયાદ કરે છે કે ઓલા અને ઉબર જેવા જૂથો વધારાનું ભાડું વસૂલ કરે છે. ભૂતકાળમાં, રાજ્ય સરકારે ટેક્સી સંચાલકોને લાગુ પડતા ભાડા નક્કી કર્યા હતા. તેઓએ સરકાર દ્વારા નિર્ધારિત સ્લેબ મુજબ ભાડું નક્કી કરવાનું હોય છે.
શહેરમાં ટેક્સી પર નિર્ભર મુસાફરોની ફરિયાદ છે કે ઓપરેટરો દ્વારા વસૂલવામાં આવતા ભાડામાં ભારે વધારો થયો છે.
એક રહેવાસીએ જણાવ્યું કે, “મહિનાઓમાં શહેરમાં મુસાફરી કરવી ખૂબ મોંઘી થઈ ગઈ છે. આ એપ્સ પર ત્રણ કિલોમીટર સુધીનું ભાડું 100 રૂપિયા સુધી જણાવવામાં આવી રહ્યું છે. એરપોર્ટ અથવા અન્ય કોઈ જગ્યાએ લાંબા અંતરની મુસાફરી કરવી ખૂબ મોંઘી બની ગઈ છે.
અન્ય એક મુસાફરે કહ્યું, “બસ સ્ટેન્ડ અથવા એરપોર્ટથી ટેક્સી બુક કરાવવી ખૂબ મોંઘી થઈ ગઈ છે. અગાઉના વર્ષોની સરખામણીમાં રાહ જોવાનો સમય ઘણો લાંબો છે. એવી ઘણી ઘટનાઓ છે જ્યારે ડ્રાઇવરો મુસાફરી દરમિયાન એસી ચાલુ કરતા નથી અને તેઓ ટોલ રોડ પર ગયા વિના ગેરકાયદેસર રીતે ટોલ ફી વસૂલ કરે છે. લોકોએ સોશિયલ મીડિયા પર આ એપ્સ વિરુદ્ધ તેમના અનુભવો પણ શેર કર્યા છે.જોઈન્ટ કમિશનર કેટી હાલસ્વામીએ જણાવ્યું હતું કે વધારાનું ભાડું વસૂલવાના પ્રથમ ગુના માટે ડ્રાઈવર પર 500 રૂપિયાનો દંડ લાદવામાં આવે છે.”અમે ટેક્સી જૂથોને તેમના જવાબો માંગવા માટે નોટિસ પણ મોકલીશું,” તેમણે કહ્યું. તેમના જવાબના આધારે વિભાગ આગળની કાર્યવાહી કરશે.
બીજી તરફ ડ્રાઇવરોનું કહેવું છે કે ભાડામાં વધારો કરવા છતાં તેમની કમાણી યથાવત છે.
એક ડ્રાઇવરે જણાવ્યું હતું કે, “રોગચાળા પછી નાણાકીય મુશ્કેલીઓને કારણે લોન ચૂકવવામાં નિષ્ફળ જતાં હજારો ડ્રાઇવરોએ તેમના વાહનો ગુમાવ્યા હતા. આનાથી રસ્તાઓ પર ચાલતી ટેક્સીઓની સંખ્યામાં ઘટાડો જોવા મળ્યો છે. જોકે કંપનીઓએ ભાડું વધાર્યું છે પરંતુ તેનો કોઈ ફાયદો થયો નથી. દરેક પ્રવાસ માટે 30 ટકાથી વધુ કમિશન લેવામાં આવે છે.તેમણે વધુમાં કહ્યું, “અમે ઇંધણ ખર્ચ, વાહનની જાળવણી અને અન્ય જીવન ખર્ચને પહોંચી વળવાની સ્થિતિમાં પણ નથી. આ સાથે વિભાગે ગેરકાયદેસર રીતે બાઇક ટેક્સી ચલાવવાની પરવાનગી આપી છે. જેના કારણે શહેરના ટેક્સી અને ઓટો ચાલકો પર વિપરીત અસર પડી છે.
