મુંબઈ, 12 જાન્યુઆરી: કેન્દ્રીય મંત્રી નીતિન ગડકરીએ રવિવારે મહારાષ્ટ્રના શિરડીમાં આયોજિત ભારતીય જનતા પાર્ટી (BJP) ના સંમેલનમાં અભિનેત્રી કંગના રનૌતની ફિલ્મ ‘ઇમર્જન્સી’ ની પ્રશંસા કરી.
ભાજપના સાંસદ અને અભિનેત્રી રનૌતે એક દિવસ પહેલા નાગપુરમાં ગડકરી માટે ફિલ્મ ‘ઇમર્જન્સી’નું ‘સ્પેશિયલ સ્ક્રીનિંગ’નું આયોજન કર્યું હતું.
શિરડીમાં ભાજપના કાર્યકરોને સંબોધતા ગડકરીએ કહ્યું, “આ એક સુંદર ફિલ્મ છે જે દર્શાવે છે કે કટોકટી ક્યારે અને કેવી રીતે લાદવામાં આવી હતી અને તે દરમિયાન આપણા કાર્યકરોએ કેવા સંઘર્ષનો સામનો કરવો પડ્યો હતો.”
તેમણે કહ્યું, “ઘણા લોકોને આંતરિક સુરક્ષા કાયદા હેઠળ જેલમાં મોકલવામાં આવ્યા હતા અને તેમને ઘણું સહન કરવું પડ્યું હતું. એવી આગાહી કરવામાં આવી હતી કે જનસંઘનો અંત આવશે, પરંતુ અમે તેનાથી વિપરીત સાબિત કર્યું.
ભાજપના સાંસદ કંગના રનૌત દ્વારા દિગ્દર્શિત ફિલ્મ “ઇમર્જન્સી” માં અભિનેતા અનુપમ ખેર પણ જોવા મળશે. વિવાદોથી ઘેરાયેલી આ ફિલ્મ 17 જાન્યુઆરીએ સિનેમાઘરોમાં રિલીઝ થશે.
ફિલ્મ ‘ઇમર્જન્સી’ની વાર્તા ભૂતપૂર્વ વડા પ્રધાન સ્વર્ગસ્થ ઇન્દિરા ગાંધી દ્વારા ૧૯૭૫ થી ૧૯૭૭ દરમિયાન તેમના વડા પ્રધાનપદના કાર્યકાળ દરમિયાન લાદવામાં આવેલી ૨૧ મહિનાની કટોકટી પર આધારિત છે.
