Gujarat DGP KLN Rao Kutch Visit: ગુજરાતના પોલીસ મહાનિર્દેશક (DGP) નો કાર્યભાર સંભાળ્યા બાદ ડૉ. કે.એલ.એન. રાવ હવે રાજ્યના પ્રવાસે છે. અમદાવાદ અને વડોદરામાં મોટી બેઠકો બાદ તેઓ રાજ્યના સૌથી મોટા જિલ્લા કચ્છની મુલાકાતે પહોંચ્યા હતા. અહીં DGPનો અનોખો અંદાજ સામે આવ્યો છે. તેમણે પાકિસ્તાનની અત્યંત નજીક આવેલા આ જિલ્લામાં સરહદી સુરક્ષા વ્યવસ્થાની સમીક્ષા કરી હતી. તેમણે કચ્છના મુખ્ય મથક ભુજથી 108 કિલોમીટર દૂર જખૌના દરિયા કિનારે તિરંગો લહેરાવ્યો હતો. DGPએ તિરંગાને ભારતની સરહદના છેવાડાના સ્થળે લહેરાવ્યો હતો, જ્યાંથી નીલો દરિયો માત્ર થોડા ડગલાં દૂર છે. કચ્છમાં સેના અને પોલીસના જવાનો અત્યંત કઠિન સંજોગોમાં દેશની સુરક્ષા સુનિશ્ચિત કરે છે.
Hoisted the tricolour at Jakhau Beach with our security forces, honoring their courage, service, and unwavering commitment to the nation. pic.twitter.com/P7w1rc0tLx
— DGP Gujarat (@dgpgujarat) February 24, 2026
કોસ્ટ ગાર્ડ સાથે કરી પેટ્રોલિંગ
DGPએ સ્થાનિક પોલીસ અધિકારીઓ સાથે મળીને તિરંગાને સલામી આપી હતી. DGPએ પોતાના પ્રવાસમાં બોર્ડર સિક્યોરિટી અને ઇન્ટર-એજન્સી કોઓર્ડિનેશન પર ભાર મૂક્યો હતો. તેમણે ક્રાઇમ કોન્ફરન્સ અને NCORD બેઠકમાં ડ્રગ્સ, ઘૂસણખોરી અને માછીમારોના મુદ્દાઓનો રિવ્યુ કર્યો હતો. આ બધા સિવાય તેમણે નલિયા પોલીસ સ્ટેશનને દત્તક લીધું અને 5 લાખ રૂપિયાની ગ્રાન્ટ આપવાની જાહેરાત કરી. DGPએ રાજ્ય પોલીસના સર્વોચ્ચ પદ પર બિરાજમાન હોવા છતાં કોસ્ટ ગાર્ડ અને BSF સાથે જોઈન્ટ પેટ્રોલિંગ કર્યું હતું. કે.એલ.એન. રાવ ગુજરાત કેડરના 1992 બેચના અધિકારી છે. તેઓ હાલમાં ઇન્ચાર્જ DGP છે. મૂળ તેલંગાણાના વતની એવા કે.એલ.એન. રાવ CID ક્રાઇમ અને રેલવેની જવાબદારી સાથે રાજ્યની તમામ જેલોના વડા પણ છે.
લોકોની ફરિયાદો પણ સાંભળી
આ પ્રવાસ હેઠળ DGP કે.એલ.એન. રાવે નલિયા પોલીસ સ્ટેશનની મુલાકાત લીધી હતી અને તેને દત્તક લેવાની જાહેરાત કરી હતી. તેમણે પોલીસ સ્ટેશનના આધુનિકીકરણ અને સુવિધાઓ માટે 5 લાખ રૂપિયા આપવાની પણ જાહેરાત કરી હતી. ગયા વર્ષે નલિયા પોલીસ સ્ટેશન ખૂબ ચર્ચામાં આવ્યું હતું, જ્યારે ગેંગસ્ટર લોરેન્સ બિશ્નોઈ વિરુદ્ધ પાકિસ્તાનથી ડ્રગ્સના મોટા જથ્થા સાથે જોડાયેલો કેસ આ જ પોલીસ સ્ટેશનમાં નોંધાયો હતો. આ ઉપરાંત, તેમણે પોલીસ અધિકારીઓ, જવાનો અને સ્થાનિક નાગરિકો સાથે ‘બડા ખાના’ યોજીને સૌનો ઉત્સાહ વધાર્યો અને જનતાની સમસ્યાઓ સાંભળી હતી.
