Gujarat Local Body Elections: ગુજરાત રાજ્યમાં ૨૬મી એપ્રિલ, રવિવારના રોજ યોજાનારી સ્થાનિક સ્વરાજ્યની ચૂંટણીમાં આ વખતે ઐતિહાસિક મતદાન થવાની શક્યતા સેવાઈ રહી છે. વર્ષ ૨૦૨૧માં છ મ્યુનિસિપલ કોર્પોરેશનોમાં સરેરાશ ૪૬.૧% જેટલું સામાન્ય મતદાન નોંધાયું હતું, પરંતુ આ વખતે જનતામાં જોવા મળી રહેલો જાગૃતિનો માહોલ અને બદલાયેલા રાજકીય સમીકરણોને જોતા આ આંકડો વધવાની પૂરેપૂરી સંભાવના છે. શહેરોથી લઈને ગ્રામ્ય વિસ્તારો સુધીના મતદારોમાં અનેરો ઉત્સાહ છે અને લોકો પોતાના મતાધિકારનો ઉપયોગ કરવા સજ્જ બન્યા છે.
મતદારયાદીનું શુદ્ધિકરણ અને ડિજિટાઈઝેશન
આ વખતે મતદાનની ટકાવારી વધવા પાછળનું એક મુખ્ય ટેકનિકલ કારણ ‘SIR’ દ્વારા કરવામાં આવેલી મતદારયાદીની સઘન કામગીરી છે. ચૂંટણી પંચે રાજ્યમાં દોઢ મહિના સુધી ઝુંબેશ ચલાવીને અંદાજે ૭૩.૭૩ લાખ ડુપ્લીકેટ અથવા સ્થાનાંતરિત થયેલા મતદારોના નામ યાદીમાંથી કમી કર્યા છે. આ શુદ્ધિકરણ બાદ રાજ્યમાં હવે કુલ ૪.૩૪ કરોડ જેટલા નોંધાયેલા મતદારો છે. ૫૧ હજાર જેટલા બીએલઓએ ઘરે-ઘરે જઈને મતદારોના મેપિંગ અને ડિજિટાઈઝેશનની કામગીરી પૂર્ણ કરી છે, જેનાથી મતદાન પ્રક્રિયા વધુ પારદર્શક અને સચોટ બનશે.
ત્રિપાંખિયો જંગ અને ભાજપ-કોંગ્રેસ-આપ વચ્ચે ટક્કર
ગુજરાતના રાજકારણમાં આ વખતે ભાજપ, કોંગ્રેસ અને આમ આદમી પાર્ટી વચ્ચે જોરદાર ત્રિપાંખિયો જંગ ખેલાઈ રહ્યો છે. ૨૦૨૧ની ચૂંટણી બાદ વિરોધ પક્ષ તરીકે આમ આદમી પાર્ટીનું વર્ચસ્વ નોંધપાત્ર રીતે વધ્યું છે, જેણે ભાજપ અને કોંગ્રેસ બંનેની ચિંતામાં વધારો કર્યો છે. આ વખતે ૭૦૦થી વધુ બેઠકો બિનહરીફ થઈ હોવા છતાં, બાકીની બેઠકો પર રસાકસીનો માહોલ છે. ભાજપ માટે આ ચૂંટણી પ્રતિષ્ઠાનો જંગ છે, કારણ કે અનેક વિસ્તારોમાં સત્તાધારી પક્ષના ઉમેદવારોએ પ્રજાના ઉગ્ર વિરોધ અને રોષનો સામનો કરવો પડ્યો છે.
લોકરોષ અને જનતાના બદલાયેલા મિજાજ પર નજર
ચૂંટણી પ્રચાર દરમિયાન અનેક કિસ્સાઓ એવા બન્યા છે જેમાં જનતાએ ઉમેદવારોને ભગાડ્યા હોય અથવા તેમની પાસે જૂના કામોનો હિસાબ માંગ્યો હોય. જે પ્રજા અગાઉ મૌન રહેતી હતી, તે હવે ખુલ્લેઆમ પોતાનો અસંતોષ વ્યક્ત કરી રહી છે. આ લોકરોષ મતદાનના દિવસે ઈવીએમમાં કેવો દેખાય છે તેના પર સૌની નજર છે. ૨૦૨૧ના આંકડા મુજબ સુરત અને રાજકોટ જેવા શહેરોમાં નવી પાર્ટીઓને મળેલા મતોએ સમીકરણો બદલ્યા હતા, ત્યારે આ વખતે રેકોર્ડ બ્રેક મતદાન કોની તરફેણમાં જાય છે અને કોના પત્તા કાપે છે તે જોવું રસપ્રદ રહેશે.
2021માં યોજાયેલ કોર્પોરેશનની ચૂંટણીની ટકાવારી :
| કોર્પોરેશન | ભાજપ | કોંગ્રેસ | આપ | અન્ય |
| સુરત મ્યુનિસિપલ કોર્પોરેશન | 48.93% | 18.6% | 28.47% | 4% |
| અમદાવાદ મ્યુનિસિપલ કોર્પોરેશન | 54.57% | 29.26% | 6.99% | 9.18% |
| વડોદરા મ્યુનિસિપલ કોર્પોરેશન | 57.1% | 34.98% | 2.81% | 5.11% |
| ભાવનગર મ્યુનિસિપલ કોર્પોરેશન | 52.72% | 32.97% | 6.99% | 7.32% |
| જામનગર મ્યુનિસિપલ કોર્પોરેશન | 50.68% | 32.97% | 8.41% | 7.94% |
| રાજકોટ મ્યુનિસિપલ કોર્પોરેશન | 53.7% | 24.81% | 17.4% | 4.09% |
| ગાંધીનગર મ્યુનિસિપલ કોર્પોરેશન | 46.49% | 28.02% | 21.77% | 3.72% |
