Gujarat Rain Forecast: ગુજરાતમાં છેલ્લા એક અઠવાડિયાથી રાજ્યના મોટા ભાગના વિસ્તારોમાં સાર્વત્રિક વરસાદ નોંધાઈ રહ્યો છે. હવામાન વિભાગની આગાહી મુજબ હાલ બંગાળની ખાડીમાં સક્રિય થયેલી વરસાદી સિસ્ટમ વધુ મજબૂત બની રહી છે. અગાઉ લો પ્રેશર તરીકે રહેલી આ સિસ્ટમ હવે વેલ માર્ક્ડ લો પ્રેશર એરિયામાં પરિવર્તિત થઈ ગઈ છે અને આગામી 12 કલાકમાં તે ડિપ્રેશનમાં ફેરવાઈ શકે તેવી શક્યતા વ્યક્ત કરવામાં આવી છે. આ સિસ્ટમ મધ્ય ભારત તરફ આગળ વધીને ગુજરાત સુધી પહોંચે તેવી સંભાવના છે, જેના કારણે 30 જુલાઈથી 2 ઑગસ્ટ દરમિયાન રાજ્યમાં ફરી એકવાર ભારે વરસાદી માહોલ સર્જાઈ શકે છે.
હાલમાં કઈ સિસ્ટમના કારણે વરસી રહ્યો છે વરસાદ?
હાલમાં ગુજરાતમાં થઈ રહેલા વરસાદ માટે માત્ર બંગાળની ખાડીની સિસ્ટમ જ જવાબદાર નથી. દક્ષિણ રાજસ્થાન ઉપર સક્રિય વરસાદી સિસ્ટમના કારણે ઉત્તર ગુજરાત અને મધ્ય ગુજરાતના અનેક વિસ્તારોમાં વરસાદ પડી રહ્યો છે. આ ઉપરાંત અરબી સમુદ્ર ઉપર સક્રિય ઓફશોર ટ્રફ અને મોન્સૂન ટ્રફ પણ રાજ્યમાં ભેજ અને વરસાદી પ્રવૃત્તિને સતત વેગ આપી રહ્યા છે.
હવામાન નિષ્ણાતોના જણાવ્યા મુજબ આ તમામ સિસ્ટમોની સંયુક્ત અસરના કારણે છેલ્લા કેટલાક દિવસોથી રાજ્યમાં અનેક વિસ્તારોમાં મધ્યમથી ભારે વરસાદ નોંધાઈ રહ્યો છે.
બંગાળની ખાડીની સિસ્ટમ બનશે વધુ મજબૂત
સેટેલાઇટ ચિત્રો મુજબ બંગાળની ખાડીમાં બનેલી વરસાદી સિસ્ટમ સતત મજબૂત બની રહી છે. આગામી કલાકોમાં તે ડિપ્રેશનનું સ્વરૂપ ધારણ કરી મધ્ય ભારતમાંથી પસાર થઈ ગુજરાત અને મહારાષ્ટ્ર તરફ આગળ વધે તેવી શક્યતા છે.
જો હાલના અનુમાન મુજબ સિસ્ટમ આગળ વધશે તો 30 જુલાઈથી 2 ઑગસ્ટ દરમિયાન ગુજરાત તેમજ મહારાષ્ટ્રના કોકણ વિસ્તારમાં ભારેથી અતિભારે વરસાદ પડી શકે છે. ખાસ કરીને દક્ષિણ અને મધ્ય ગુજરાતના વિસ્તારોમાં વરસાદનું પ્રમાણ નોંધપાત્ર રીતે વધી શકે છે.
સેટેલાઇટ ચિત્રોમાં સ્પષ્ટ દેખાઈ રહી છે વરસાદી પ્રવૃત્તિ
સેટેલાઇટ મેપમાં બંગાળની ખાડીમાં ઘેરા વાદળો અને મજબૂત વરસાદી સિસ્ટમ સ્પષ્ટપણે જોવા મળી રહી છે. આ સિસ્ટમ પશ્ચિમ દિશામાં આગળ વધી રહી હોવાથી તેની અસર આગામી દિવસોમાં ગુજરાત પર જોવા મળશે.
બીજી તરફ દક્ષિણ રાજસ્થાન ઉપર સક્રિય વરસાદી સિસ્ટમના કારણે ઉત્તર ગુજરાત, કચ્છ અને આસપાસના વિસ્તારોમાં પણ વરસાદી પ્રવૃત્તિ યથાવત્ રહેવાની શક્યતા છે.
26 જુલાઈ માટે યલો એલર્ટ
હવામાન વિભાગે 26 જુલાઈ માટે રાજ્યના અનેક જિલ્લાઓમાં યલો એલર્ટ જાહેર કર્યું છે.
ઉત્તર ગુજરાત: કચ્છ, બનાસકાંઠા, સાબરકાંઠા, મહેસાણા, પાટણ અને અરવલ્લી.
મધ્ય ગુજરાત: ગાંધીનગર, અમદાવાદ, ખેડા, આણંદ, મહીસાગર અને દાહોદ.
સૌરાષ્ટ્ર: સુરેન્દ્રનગર અને ભાવનગર.
દક્ષિણ ગુજરાત: સુરત, નવસારી, દમણ, દાદરા અને નગર હવેલી તેમજ વલસાડ.
હવામાન વિભાગના જણાવ્યા મુજબ દક્ષિણ રાજસ્થાનની સક્રિય સિસ્ટમના કારણે ઉત્તર અને મધ્ય ગુજરાતમાં કેટલાક વિસ્તારોમાં ભારે વરસાદ પડી શકે છે.
27 જુલાઈએ ક્યાં રહેશે વરસાદનું જોર?
27 જુલાઈ માટે હવામાન વિભાગે દક્ષિણ ગુજરાતના અનેક જિલ્લાઓમાં યલો એલર્ટ યથાવત્ રાખ્યું છે.
આમાં વડોદરા, છોટાઉદેપુર, ભરૂચ, નર્મદા, સુરત, તાપી, નવસારી, ડાંગ, દમણ, દાદરા અને નગર હવેલી તેમજ વલસાડનો સમાવેશ થાય છે.
ઉત્તર ગુજરાતમાં માત્ર બનાસકાંઠા અને પાટણ જિલ્લામાં યલો એલર્ટ જાહેર કરવામાં આવ્યું છે.
બાકીના સૌરાષ્ટ્ર, કચ્છ તેમજ ઉત્તર અને મધ્ય ગુજરાતના અન્ય વિસ્તારોમાં વરસાદનું પ્રમાણ થોડું ઘટી શકે છે.
30 જુલાઈથી ફરી વધી શકે વરસાદ
હવામાન વિભાગનું અનુમાન છે કે બંગાળની ખાડીમાં સક્રિય થયેલી નવી સિસ્ટમ ગુજરાત સુધી પહોંચ્યા બાદ 30 જુલાઈથી 2 ઑગસ્ટ વચ્ચે રાજ્યમાં ફરી ભારે વરસાદનું નવું ચક્ર શરૂ થઈ શકે છે.
ખાસ કરીને દક્ષિણ ગુજરાત, મધ્ય ગુજરાત અને કેટલાક ઉત્તર ગુજરાતના વિસ્તારોમાં ભારે વરસાદની શક્યતા હોવાથી સ્થાનિક વહીવટી તંત્ર અને લોકોને સાવચેત રહેવાની સલાહ આપવામાં આવી છે.
