Made in India Semiconductor Chip: રાષ્ટ્રપિતા મહાત્મા ગાંધીએ રેંટિયાની તાકાતથી સ્વદેશીને મજબૂત બનાવ્યું હતું. ગુજરાતમાં ટૂંક સમયમાં આ ઇતિહાસ ફરીથી દોહરાવવામાં આવશે જ્યારે પ્રધાનમંત્રી નરેન્દ્ર મોદી પહેલી મેડ ઇન ઇન્ડિયા સેમિકન્ડક્ટર ચિપ લોન્ચ કરશે. પ્રધાનમંત્રી નરેન્દ્ર મોદીના ઇઝરાયેલ પ્રવાસ બાદ દેશને આ ભેટ મળી શકે છે. ઉલ્લેખનીય છે કે ભારતે ગુજરાતના સાણંદમાં પ્રમુખ રીતે અમેરિકન કંપની માઇક્રોન ટેકનોલોજી (Micron Technology) સાથે મળીને સેમિકન્ડક્ટર એસેમ્બલિંગ અને ટેસ્ટિંગ પ્લાન્ટ સ્થાપિત કર્યો છે, જે ભારતની પહેલી મોટી સેમિકન્ડક્ટર યુનિટ છે. ઉચ્ચ પદસ્થ અધિકારીઓના જણાવ્યા અનુસાર પીએમ મોદી આ મોટી ભેટ દેશને આપશે. આ ટેકનોલોજીના ક્ષેત્રમાં ભારતની મોટી છલાંગ સુનિશ્ચિત કરશે. ભારત સેમિકન્ડક્ટર ઉત્પાદનના ક્ષેત્રમાં આત્મનિર્ભર થવાની દિશામાં પગલાં વધારશે.
મહાત્મા મંદિરમાં સેમિકનેક્ટ 3.0
ગુજરાત સરકાર આગામી ૧ માર્ચ, ૨૦૨૬ના રોજ ગાંધીનગર સ્થિત મહાત્મા મંદિરમાં સેમિકનેક્ટ કોન્ફરન્સ ૨૦૨૬ની ત્રીજી આવૃત્તિની યજમાની કરશે. આ કાર્યક્રમમાં ગુજરાતના મુખ્યમંત્રી ભૂપેન્દ્ર પટેલ, કેન્દ્રીય ઇલેક્ટ્રોનિક્સ અને ઇન્ફોર્મેશન ટેકનોલોજી (IT), રેલવે અને માહિતી તથા પ્રસારણ મંત્રી અશ્વિની વૈષ્ણવ, ગુજરાતના ગૃહ રાજ્યમંત્રી હર્ષ સંઘવી અને વિજ્ઞાન અને ટેકનોલોજી મંત્રી અર્જુન મોઢવાડિયાની ઉપસ્થિતિમાં આ કોન્ફરન્સનું ઉદ્ઘાટન કરવામાં આવશે. આ કાર્યક્રમ બે દિવસ ચાલશે. આ કોન્ફરન્સની થીમ ‘ગુજરાત : ઇન્ડિયાઝ ગેટવે ટુ સિલિકોન’ (ગુજરાત : સિલિકોન માટે ભારતનું પ્રવેશદ્વાર) છે, જે ભારતના સેમિકન્ડક્ટર ઇકોસિસ્ટમના પ્રમુખ કેન્દ્ર તરીકે સ્થાપિત થવાની રાજ્યની મહત્વાકાંક્ષાને પ્રતિબિંબિત કરે છે. સૂત્રોના જણાવ્યા અનુસાર પીએમ મોદી ઇઝરાયેલથી પરત ફરીને સાણંદમાં બનીને તૈયાર થયેલી પહેલી મેડ ઇન ઇન્ડિયા સેમિકન્ડક્ટર દેશને સમર્પિત કરશે.
કાર્યક્રમની ટૂંક સમયમાં જાહેરાત શક્ય
એવી શક્યતા વ્યક્ત કરવામાં આવી રહી છે કે ટૂંક સમયમાં પ્રધાનમંત્રી નરેન્દ્ર મોદીના કાર્યક્રમની સત્તાવાર જાહેરાત થઈ શકે છે. પહેલા પીએમ મોદીના ગુજરાત પ્રવાસ માટે ૨૩ ફેબ્રુઆરીની તારીખ સામે આવી હતી. ત્યારબાદ ૨૮ ફેબ્રુઆરીએ આવવાની વાત કહેવામાં આવી હતી. પીએમ મોદી પોતાના પ્રવાસમાં અમદાવાદમાં આવતા સાણંદમાં એક સેમિકન્ડક્ટર મેન્યુફેક્ચરિંગ ફેસિલિટીનું ઉદ્ઘાટન કરી શકે છે. આ પ્રવાસ દરમિયાન પ્રધાનમંત્રી દેશની પહેલી દેશમાં બનેલી સેમિકન્ડક્ટર ચિપ પણ લોન્ચ કરી શકે છે. પીએમ મોદી ૨૭ ફેબ્રુઆરીએ ઇઝરાયેલથી પરત ફરશે. પીએમ મોદીના આ પ્રવાસને ઘણો મહત્વનો માનવામાં આવી રહ્યો છે કારણ કે રાજ્યમાં આગામી થોડા જ દિવસોમાં મહાનગરપાલિકા, નગરપાલિકા, જિલ્લા પંચાયત અને તાલુકા પંચાયતની ચૂંટણીઓ પણ યોજાવાની છે.
