Surat Municipal Corporation Results: ગુજરાતના શહેરી રાજકારણમાં સુરત હંમેશા ભારતીય જનતા પાર્ટી માટે મજબૂત કિલ્લો રહ્યો છે, જે ૨૦૨૬ના પરિણામોમાં વધુ મજબૂત બનીને ઉભર્યો છે. છેલ્લા ત્રણ દાયકાથી સુરત પર શાસન કરી રહેલી ભાજપને સુરતીઓએ ફરી એકવાર સત્તાની ચાવી સોંપી છે. અગાઉની ચૂંટણીમાં આમ આદમી પાર્ટીએ જે રીતે દેખાવ કર્યો હતો તેના કારણે રસાકસીની અપેક્ષા હતી, પરંતુ પરિણામોમાં ‘આપ’ ના ગાજ્યા ઢોલ વાગ્યા નથી. જનતાએ વિકાસના મુદ્દે ભાજપ પર અતૂટ ભરોસો મૂકીને વિરોધ પક્ષોના સૂપડા સાફ કરી દીધા છે.
ભાજપની ઐતિહાસિક જીત અને વિપક્ષનું ધોવાણ
સુરત મહાનગરપાલિકાની કુલ ૧૨૦ બેઠકો માટે થયેલા મતદાન બાદ જે ચિત્ર સામે આવ્યું છે તે ભાજપ માટે રેકોર્ડબ્રેક છે. ભાજપે ૧૨૦ માંથી ૧૧૫ બેઠકો પર પ્રચંડ વિજય મેળવીને વિરોધ પક્ષોને નામશેષ કરી દીધા છે. ૨૦૨૧ માં ૨૭ બેઠકો જીતનાર આમ આદમી પાર્ટી આ વખતે માત્ર ૪ બેઠકો પર સમેટાઈ ગઈ છે, જ્યારે કોંગ્રેસ માંડ ૧ બેઠક જીતવામાં સફળ રહી છે. વોર્ડ નંબર ૪ અને વોર્ડ નંબર ૧૬ જેવા વિસ્તારોમાં ભાજપે ‘આપ’ પાસેથી બેઠકો છીનવીને પૂરી પેનલ વિજયી બનાવી છે.
‘આપ’ ના દિગ્ગજ નેતાઓની આંચકાજનક હાર
આ ચૂંટણીમાં આમ આદમી પાર્ટીના મોટા માથાઓને જનતાએ નકારી દીધા છે. પક્ષના પ્રદેશ મહામંત્રી મનોજ સોરઠીયાને વોર્ડ નંબર ૪ માં હારનો સામનો કરવો પડ્યો છે, જ્યાં ભાજપની આખી પેનલ ભવ્ય રીતે જીતી છે. તેવી જ રીતે, મનપાના વિરોધ પક્ષના નેતા પાયલ સાકરીયા પણ વોર્ડ નંબર ૧૬ માં પોતાની બેઠક બચાવી શક્યા નથી. પોતાની હાર સ્વીકારતા પાયલ સાકરીયાએ જણાવ્યું હતું કે તેમની મહેનતમાં કચાસ રહેતા આ પરિણામ આવ્યું છે અને તેઓ આગામી સમયમાં ફરી જનતા વચ્ચે જઈને મહેનત કરશે.
વોર્ડ નંબર ૩ માં ભાજપનો દબદબો અને ઉજવણી
એક તરફ જ્યારે વિપક્ષના દિગ્ગજો હાર્યા છે, ત્યારે બીજી તરફ ભાજપમાં નવા ચહેરાઓનો વિજય થયો છે. વોર્ડ નંબર ૩ માં ભાજપનો જબરદસ્ત પ્રભાવ જોવા મળ્યો છે, જ્યાં અલ્પેશ કથીરિયાના પત્ની કાવ્યા કથીરિયાએ જંગી મતોથી જીત મેળવી છે. આ વોર્ડમાં ભાજપની આખી પેનલ વિજેતા જાહેર થતા જ કાર્યકરોમાં ભારે ઉત્સાહ જોવા મળ્યો હતો. એકંદરે સુરતના પરિણામોએ સાબિત કરી દીધું છે કે ભાજપે પોતાની વ્યૂહરચના અને સંગઠન શક્તિથી સુરતને ગુજરાતનું અજેય કેન્દ્ર બનાવી દીધું છે.
