Surat Ragging Case: ડૉ. હર્ષ પંડ્યાના મોત બાદ રેગિંગનો ખુલાસો, 4 ડૉક્ટરો સામે કડક કાર્યવાહી
Surat Ragging Case: સુરતની ન્યૂ સિવિલ હોસ્પિટલના હોસ્ટેલમાં રહેતા ડૉ. હર્ષ પંડ્યાના આત્મહત્યાના મામલે એક અત્યંત ચોંકાવનારો ખુલાસો થયો છે. આ સંવેદનશીલ મામલાની તપાસ દરમિયાન રેગિંગના ગંભીર આક્ષેપો સામે આવ્યા બાદ હોસ્પિટલ અને મેડિકલ કોલેજ પ્રશાસને અત્યંત કડક વલણ અપનાવ્યું છે.
જુનિયર વિદ્યાર્થીઓની લેખિત ફરિયાદોને સાચી માનતાં પ્રશાસને 4 સિનિયર રેસિડેન્ટ ડૉક્ટરોને તાત્કાલિક અસરથી 6 મહિના માટે સસ્પેન્ડ કરી દીધા છે.
એન્ટી રેગિંગ કમિટીની તપાસમાં થયો ખુલાસો
મળતી માહિતી અનુસાર, કોલેજની એન્ટી રેગિંગ કમિટીએ મોડી રાત સુધી સઘન તપાસ કરી અને અંદાજે 9 જુનિયર વિદ્યાર્થીઓની રૂબરૂ પૂછપરછ કરી. આ પૂછપરછ દરમિયાન જુનિયર વિદ્યાર્થીઓએ સિનિયરોના ત્રાસજનક વર્તન અને રેગિંગની ઘટનાઓ અંગે કમિટી સમક્ષ લેખિતમાં પોતાની આપવીતી નોંધાવી.
હોસ્પિટલ અને હોસ્ટેલમાંથી હકાલપટ્ટી, શૈક્ષણિક કામગીરી પર પણ પ્રતિબંધ
જુનિયર વિદ્યાર્થીઓના આક્ષેપોની ગંભીરતાને ધ્યાનમાં રાખીને કોલેજ કાઉન્સિલે તાત્કાલિક શિસ્તભંગની કાર્યવાહી કરવાનો નિર્ણય લીધો. જેમને સસ્પેન્ડ કરવામાં આવ્યા છે તે 4 સિનિયર ડૉક્ટરોમાં ડૉ. નિરાલી વસાવા, ડૉ. અનુજ માહેશ્વરી, ડૉ. દીક્ષિતાબેન સેસરિયન અને ડૉ. હિના ભૂતનો સમાવેશ થાય છે.
ચારેય આરોપી ડૉક્ટરો પર 6 મહિના સુધી પ્રતિબંધ
આ ચારેય આરોપી ડૉક્ટરો સામે કાર્યવાહી કરતાં આગામી 6 મહિના સુધી તેમને હોસ્પિટલની કામગીરી સંભાળવા, હોસ્ટેલમાં રહેવા અને કોઈપણ પ્રકારની શૈક્ષણિક પ્રવૃત્તિઓ (Teaching Activity)માં ભાગ લેવા પર સંપૂર્ણ પ્રતિબંધ મૂકી દેવામાં આવ્યો છે. સસ્પેન્શનના આ સમયગાળા દરમિયાન તેઓ કોઈપણ ક્લાસ અથવા કોલેજની પ્રવૃત્તિનો ભાગ બની શકશે નહીં.
વિભાગ પ્રમુખો સામે પણ કાર્યવાહી
આ સમગ્ર ઘટનાક્રમમાં પ્રશાસને માત્ર આરોપી વિદ્યાર્થીઓ સામે જ નહીં, પરંતુ બેદરકારી દાખવનારા જવાબદાર ફેકલ્ટી સભ્યો સામે પણ કડક કાર્યવાહી કરી છે. કોલેજ પ્રશાસને માઇક્રોબાયોલોજી વિભાગના પ્રમુખ ડૉ. સુમૈયા મુલ્લા ઉપરાંત ડૉ. સંગીતા રાજદે, ડૉ. યોગિતા મિસ્ત્રી અને ડૉ. લતિકા પુરોહિતને કારણ દર્શાવો (Show Cause) નોટિસ ફટકારી છે.
કોલેજ કાઉન્સિલ દ્વારા આ સમગ્ર કાર્યવાહીના અહેવાલને મંજૂરી આપીને રાજ્ય સરકારને પણ સત્તાવાર રીતે સોંપી દેવામાં આવ્યો છે.
શું રેગિંગના કારણે જ ડૉ. હર્ષે આત્મઘાતી પગલું ભર્યું?
હાલમાં સૌથી મોટો પ્રશ્ન એ ઊભો થઈ રહ્યો છે કે શું ડૉ. હર્ષ પંડ્યાના અકાળે થયેલા મૃત્યુ પાછળ આ જ રેગિંગ મુખ્ય કારણ હતું. જોકે, કોલેજ પ્રશાસન અને આંતરિક તપાસ દળે સ્પષ્ટ કર્યું છે કે રેગિંગના આ આક્ષેપોની હકીકત અને આત્મહત્યા વચ્ચેના સીધા સંબંધ અંગેનો અંતિમ નિષ્કર્ષ પોલીસ તપાસ પૂર્ણ થયા બાદ જ સ્પષ્ટ થઈ શકશે.
આવનારા દિવસોમાં આ મામલે પોલીસમાં ઔપચારિક ફરિયાદ નોંધાવાની સંપૂર્ણ શક્યતા છે.
