Kharaghoda Agariya Land Protest: સમગ્ર ગુજરાતમાં સૌથી વધુ મીઠું પકવતા સુરેન્દ્રનગર જિલ્લાના ખારાઘોડા રણ વિસ્તારમાં અગરિયાઓ અને તંત્ર વચ્ચે મોટો વિવાદ છેડાયો છે. સરકારી સંસ્થા હિન્દુસ્તાન સોલ્ટ લિમિટેડ દ્વારા કેન્દ્ર સરકારના ટેન્ડર હેઠળ ખારાઘોડા-દેહગામ વચ્ચેની ૫૦૦૦ એકર કિંમતી જમીન ‘પ્રજ્ઞાનાભ બ્રોકર એલએલપી’ નામની ખાનગી કંપનીને વાર્ષિક માત્ર ૩ કરોડ રૂપિયાના ભાડાથી ફાળવી દેવામાં આવી છે. આ જમીન મળતા જ કંપનીએ ગ્રીન એનર્જી સોલર પ્લાન્ટ અને કેમિકલ પ્રોજેક્ટ માટે ગેરકાયદેસર ઊંચા પાળા બાંધવાનું શરૂ કરી દીધું છે. જેના કારણે ૫૦૦ થી વધુ સ્થાનિક અગરિયાઓના રણમાં જવાના પરંપરાગત રસ્તાઓ બંધ થઈ ગયા છે અને ચોમાસાના વરસાદી પાણીના કુદરતી વહેણ પણ અવરોધાયા છે.
ઘુડખર અભયારણ્ય અને અગરિયાઓની રોજીરોટી સામે મોટું સંકટ
કંપનીની આ આડેધડ કામગીરીના કારણે વર્ષોથી રણમાં પરસેવો પાડી મીઠું પકવતા ગરીબ અગરિયા પરિવારોના અસ્તિત્વ અને રોજગારી સામે મોટો સવાલ ઊભો થયો છે. અગરિયાઓનો દાવો છે કે આ ખોટા નિર્ણયથી સરકારને પણ દર વર્ષે ૪૦૦ થી ૫૦૦ કરોડ રૂપિયાનું આર્થિક નુકસાન વેઠવું પડશે. વધુમાં, આ સંવેદનશીલ રણ વિસ્તાર વિશ્વપ્રસિદ્ધ ઘુડખર અભયારણ્ય (Wild Ass Sanctuary) હેઠળ આવતો હોવાથી ત્યાં કંપની દ્વારા કરાતા ફેન્સિંગ અને વાડના કારણે વન્યપ્રાણીઓના મુક્ત હલનચલનને ભારે નુકસાન થઈ રહ્યું છે, જે પર્યાવરણની દ્રષ્ટિએ અત્યંત જોખમી સાબિત થઈ શકે છે.
ધારાસભ્ય અને પૂર્વ ધારાસભ્ય મેદાને, હાલ કામગીરી અસ્થાયી બંધ
આ ગંભીર જનસમસ્યાને લઈને રાજકારણ પણ ગરમાયું છે. પૂર્વ ધારાસભ્ય નૌશાદ સોલંકીએ (Naushad Solanki) ચીમકી આપી છે કે જો કેન્દ્ર સરકાર હિન્દુસ્તાન સોલ્ટ અને સંબંધિત ખાનગી કંપનીને રણમાંથી બહાર નહીં કાઢે તો સમગ્ર રાજ્યમાં અગરિયાઓનું મોટું આંદોલન છેડાશે. બીજી તરફ, પાટડીના વર્તમાન ધારાસભ્ય પી.કે. પરમારે (P.K. Parmar) પીડિત અગરિયાઓની રૂબરૂ મુલાકાત લીધી હતી અને કલેક્ટર સમક્ષ રજૂઆત કરીને હાલ પૂરતું આ કામ અસ્થાયી ધોરણે બંધ કરાવી દીધું છે. તેમણે પ્રોજેક્ટ કાયમી રદ કરવા માટે ગાંધીનગર મંત્રીઓ સુધી રજૂઆત કરવાની ખાતરી આપી છે.
ન્યાયની માંગ સાથે ૨૩ જૂને પાટડી પ્રાંત કચેરીનો ઘેરાવ કરાશે
પોતાની હક્કની જમીન અને ન્યાય મેળવવા માટે ખારાઘોડા પ્રાથમિક શાળા ખાતે અગરિયાઓનું એક મોટું લોક સંમેલન યોજાયું હતું, જેમાં આરપારની લડાઈ લડવાનું આયોજન કરાયું છે. અગરિયા સંગઠનોએ વહીવટી તંત્રને ખુલ્લી ચેતવણી આપી છે કે જો આગામી બે દિવસમાં તેમની જમીન અને રસ્તાઓ ખુલ્લા કરવામાં નહીં આવે, તો આગામી ૨૩ જૂનના રોજ હજારોની સંખ્યામાં અગરિયાઓ એકઠા થઈને પાટડી પ્રાંત અધિકારીની કચેરીનો પ્રચંડ ઘેરાવ કરશે અને ઉગ્ર આંદોલન કરશે.
