Brain Stroke Prevention: બ્રેઈન સ્ટ્રોક દુનિયામાં મૃત્યુ અને વિકલાંગતાના મોટા કારણોમાંનું એક છે. આ બધાની વચ્ચે સારી ખબર એ છે કે આશરે ૮૦ ટકા સ્ટ્રોકના કેસો પર રોક લગાવી શકાય છે. તાજેતરમાં સામે આવેલા ત્રણ અલગ-અલગ વૈજ્ઞાનિક અભ્યાસોમાં સ્ટ્રોકનું જોખમ ઘટાડવાના ત્રણ અસરકારક રસ્તાઓ સામે આવ્યા છે. જેમાં મેડિટેરેનિયન ડાયેટ, શિંગલ્સ (હર્પીઝ ઝોસ્ટર) ની રસી અને અસુન્ડેક્સિયન નામની નવી દવા સામેલ છે.
જ્યારે મગજ સુધી લોહી પહોંચવાનું બંધ થઈ જાય છે અથવા મગજની કોઈ રક્તવાહિનીમાંથી લોહી વહેવા લાગે છે ત્યારે સ્ટ્રોક આવે છે. આનાથી મગજના કોષો ઝડપથી નષ્ટ થવા લાગે છે. જો સમયસર સારવાર ન મળે તો દર્દીનું મૃત્યુ પણ થઈ શકે છે અથવા શરીરનો કોઈ ભાગ હંમેશા માટે કામ કરવાનું બંધ કરી શકે છે.
શિંગલ્સની રસીથી હૃદય અને મગજની સુરક્ષા
એક અન્ય અભ્યાસમાં જાણવા મળ્યું કે શિંગલ્સની રસી લગાવનાર લોકોમાં સ્ટ્રોક અને હૃદય સાથે જોડાયેલી ગંભીર સમસ્યાઓનું જોખમ ઓછું જોવા મળ્યું. આ અભ્યાસમાં આશરે ૫.૫ લાખ લોકોને સામેલ કરવામાં આવ્યા હતા. જોકે, વૈજ્ઞાનિકોએ કહ્યું કે આ પ્રાથમિક અભ્યાસ છે અને તેનાથી હજુ એ સાબિત નથી થતું કે માત્ર રસી જ જોખમ ઘટાડે છે. છતાં નિષ્ણાતોનું કહેવું છે કે ૫૦ વર્ષ કે તેથી વધુ ઉંમરના લોકોને શિંગલ્સની રસી લગાવવાની સલાહ આપવામાં આવે છે.
બીજી વાર સ્ટ્રોકથી બચાવી શકે છે નવી દવા અસુન્ડેક્સિયન
ન્યૂ ઈંગ્લેન્ડ જર્નલ ઓફ મેડિસિનમાં પ્રકાશિત એક અભ્યાસ અનુસાર, અસુન્ડેક્સિયન નામની નવી દવા તે લોકોમાં બીજી વાર સ્ટ્રોક આવવાનું જોખમ ઘટાડી શકે છે, જેમને પહેલા ઈસ્કેમિક સ્ટ્રોક અથવા ટ્રાન્ઝિયન્ટ ઈસ્કેમિક એટેક (TIA) થઈ ચૂક્યો છે. આ દવા શરીરમાં લોહીના ગંઠાવાની પ્રક્રિયાને ઘટાડે છે અને ફરીથી સ્ટ્રોકનું જોખમ ઓછું થઈ શકે છે. જોકે, આ દવા હજુ બધા દર્દીઓ માટે નિયમિત સારવારનો ભાગ બની નથી. તેનો ઉપયોગ ડૉક્ટરની સલાહ પર જ કરવો જોઈએ.
ફળો, શાકભાજી અને ઓલિવ ઓઈલ લેનારાઓમાં સ્ટ્રોકનું જોખમ ઓછું
ન્યુરોલોજી ઓપન એક્સેસમાં પ્રકાશિત એક અભ્યાસમાં ૧.૦૫ લાખથી વધુ લોકોના ખાનપાનનું વિશ્લેષણ કરવામાં આવ્યું. તેમાં જાણવા મળ્યું કે મેડિટેરેનિયન ડાયેટ અપનાવનારી મહિલાઓમાં સ્ટ્રોકનું જોખમ ઓછું હતું. આ આહારમાં મુખ્યત્વે તાજા ફળો અને શાકભાજી, આખા અનાજ, કઠોળ, સૂકો મેવો અને બીજ, ઓલિવ ઓઈલ અને ઓમેગા-૩ થી ભરપૂર માછલી સામેલ છે. સંશોધકો અનુસાર, આ આહાર બ્લડ પ્રેશર, બ્લડ શુગર, ખરાબ કોલેસ્ટ્રોલ અને શરીરની સોજાને કાબૂમાં કરવામાં મદદ કરે છે. આનાથી સ્ટ્રોકનું જોખમ ઘટે છે.
બ્લડ પ્રેશર અને શુગરની નિયમિત તપાસ કરાવો
નિષ્ણાતોના મતે હાઈ બ્લડ પ્રેશર સ્ટ્રોકનું સૌથી મોટું કારણ છે. આ સિવાય ડાયાબિટીસ, ધૂમ્રપાન, સ્થૂળતા, શારીરિક પ્રવૃત્તિનો અભાવ, અસંતુલિત ખાનપાન અને વધેલું કોલેસ્ટ્રોલ પણ સ્ટ્રોકનું જોખમ વધારે છે. નિષ્ણાતોની સલાહ છે કે સ્ટ્રોકથી બચવા માટે રોજ ફળો અને લીલા શાકભાજી ખાઓ, મીઠું અને તળેલી વસ્તુઓ ઓછી કરો. બ્લડ પ્રેશર અને શુગરની નિયમિત તપાસ કરાવો. ધૂમ્રપાન અને તમાકુથી દૂર રહો. રોજ ૩૦ મિનિટ વ્યાયામ કરો. ૫૦ વર્ષથી વધુ ઉંમરના લોકો ડૉક્ટરની સલાહ પર શિંગલ્સ રસીની જાણકારી મેળવે, જેમને પહેલા સ્ટ્રોક આવી ચૂક્યો છે, તેઓ દવાઓ ક્યારેય ન છોડે અને નિયમિત ફોલો-અપ કરાવતા રહે.
