Akhilesh Yadav: લખનૌ ઘટનાને લઈને અખિલેશ યાદવનો પ્રહાર, સત્તામાં આવ્યા તો કલાકારોને ફરી સન્માન અને માનદ વેતન આપવાનું વચન
Akhilesh Yadav: સમાજવાદી પાર્ટી (સપા)ના અધ્યક્ષ અખિલેશ યાદવે રવિવારે (2 ઑગસ્ટ) કહ્યું કે ભારતીય જનતા પાર્ટી (BJP) આર્થિક રીતે નબળા કલાકારોનો લાભ ઉઠાવી રહી છે અને તેમની પ્રતિભાનો ઉપયોગ રાજકીય છબી ચમકાવવા માટે કરી રહી છે.
યાદવનો ઈશારો તાજેતરની તે ઘટના તરફ હતો, જેમાં કથિત રીતે ભગવાન હનુમાનનો વેશ ધારણ કરેલા એક કલાકારને BJPના રાષ્ટ્રીય અધ્યક્ષ નિતિન નવીનની તાજેતરની લખનૌ મુલાકાત દરમિયાન તેમના રથની સામે નૃત્ય કરવા માટે મજબૂર કરવામાં આવ્યો હતો.
દ હિન્દુના અહેવાલ અનુસાર, યાદવે દાવો કર્યો કે કલાકારો આવા પાત્રો રાજકીય વિચારધારાના કારણે નહીં પરંતુ આર્થિક મજબૂરીને કારણે ભજવે છે.
રવિવારે એક્સ પર શેર કરાયેલા એક વિડિયોમાં યાદવ ભગવાન રામ અને ભગવાન હનુમાનની ભૂમિકા ભજવનારા બે રામલીલા કલાકારોને 51-51 હજાર રૂપિયાની આર્થિક સહાય આપતા જોવા મળ્યા.
તેમણે આરોપ લગાવ્યો કે BJP મૂળભૂત રીતે સર્જનાત્મકતાથી અસ્વસ્થ રહે છે, કારણ કે કલાત્મક અભિવ્યક્તિ પરંપરાઓને પડકારીને ‘સત્તા વિરોધી ભાવના’ને વધુ મજબૂત બનાવી શકે છે. તેમણે એ પણ કહ્યું કે BJP કલાકારો, લેખકો અને પત્રકારોને – જે અસહમતિના અવાજને સામે લાવી શકે છે – જાહેર મંચોથી દૂર રાખવાનો પ્રયાસ કરી રહી છે.
તેમણે કહ્યું, ‘BJPના લોકો હંમેશા સર્જનાત્મકતાના વિરોધી રહ્યા છે, કારણ કે સર્જનાત્મકતા રૂઢિઓ અને રૂઢિવાદિતાના વિરોધમાં પોતાનો નવો માર્ગ શોધે છે, જે BJPની પુરાતનપંથી અને દકિયાનૂસી વિચારસરણીને જરાય પસંદ નથી, કારણ કે તેમને સર્જનાત્મક અભિવ્યક્તિથી “સત્તા વિરોધી લહેર” વધુ મજબૂત બનવાનો ભય રહે છે.’
તેમણે કહ્યું, ‘પ્રિય કલાકારો અને સર્જકો, ભારતીય જનતા પાર્ટીએ જે રીતે એક મજબૂર અને લાચાર કલાકારની પ્રતિભાનો દુરુપયોગ પોતાના રાજકીય સ્વાર્થ માટે કર્યો છે, તે અત્યંત નિંદનીય છે. સૌ જાણે છે કે થોડા દિવસો પહેલાં BJPના રાષ્ટ્રીય અધ્યક્ષના લખનૌ આગમન સમયે તેમના રથની આગળ એક કલાકારને હનુમાનજીના સ્વરૂપમાં નૃત્ય કરાવવામાં આવ્યું હતું. જેના કારણે સમગ્ર વિશ્વના બજરંગબલીના ઉપાસકોમાં આજ સુધી ભારે આક્રોશ છે.’
યાદવે દાવો કર્યો કે જો સમાજવાદી પાર્ટી ફરી સત્તામાં આવશે, તો તે પોતાની અગાઉની સરકારની જેમ કલાકારોને યશ ભારતી સન્માન જેવા પુરસ્કારો દ્વારા ફરી સન્માનિત કરવાની પરંપરા શરૂ કરશે અને તેમને જીવનભર દર મહિને એક લાખ રૂપિયાનું માનદ વેતન પણ આપશે.
તેમણે એ પણ કહ્યું કે વર્ષ 2017માં BJP સત્તામાં આવ્યા બાદ ઉત્તર પ્રદેશમાં 26,000થી વધુ સરકારી પ્રાથમિક શાળાઓ બંધ કરી દેવામાં આવી છે. તેમના જણાવ્યા મુજબ માર્ચ 2017 સુધી રાજ્યમાં 1,13,938 સરકારી પ્રાથમિક શાળાઓ હતી, જેની સંખ્યા હવે નોંધપાત્ર રીતે ઘટી ગઈ છે.
યાદવે આરોપ લગાવ્યો કે આ પગલું PDA (પછાત, દલિત અને અલ્પસંખ્યક) વર્ગના બાળકોને શિક્ષણથી વંચિત કરવાનો પ્રયાસનો એક ભાગ છે.
