અમદાવાદ, 23 જાન્યુઆરી: કેન્દ્રીય ગૃહમંત્રી અમિત શાહે ગુરુવારે જણાવ્યું હતું કે નરેન્દ્ર મોદી સરકારે કલમ 370 દૂર કરવા સહિત “લગભગ તમામ” બાકી રહેલા વૈચારિક કાર્યો પૂર્ણ કરી લીધા છે અને તે પોતાના ત્રીજા કાર્યકાળમાં પણ તે જ માર્ગ પર આગળ વધશે.
ભારતીય જનતા પાર્ટી (ભાજપ) ના વરિષ્ઠ નેતા અહીં ગુજરાત યુનિવર્સિટી કેમ્પસમાં ‘હિન્દુ આધ્યાત્મિક અને સેવા મેળા’નું ઉદ્ઘાટન કર્યા પછી લોકોને સંબોધિત કરી રહ્યા હતા.
શાહે દાવો કર્યો હતો કે એક સમય હતો જ્યારે હિન્દુઓ પોતાના દેશમાં પોતાની ઓળખ જાહેર કરવામાં અચકાતા હતા. તેમણે કહ્યું, “દસ વર્ષમાં પરિસ્થિતિઓ બદલાઈ ગઈ છે. હવે અમારી વિચારધારા મુજબ, લગભગ તમામ બાકી રહેલા કામ પૂર્ણ થઈ ગયા છે, પછી ભલે તે જમ્મુ અને કાશ્મીરમાંથી કલમ 370 દૂર કરવાનું હોય, અયોધ્યામાં રામ મંદિરનું નિર્માણ હોય, ટ્રિપલ તલાક નાબૂદ કરવાનું હોય કે પછી સમાન નાગરિક સંહિતા (UCC) લાગુ કરવાનું હોય.
ભલે રાષ્ટ્રીય સ્તરે સમાન નાગરિક સંહિતા લાગુ કરવામાં આવી નથી, પરંતુ ભાજપ શાસિત રાજ્ય ઉત્તરાખંડે તેનો અમલ કર્યો છે અને શાહે ગયા મહિને રાજ્યસભામાં કહ્યું હતું કે તેનો અમલ તમામ રાજ્યોમાં કરવામાં આવશે.
અહીં પોતાના ભાષણમાં શાહે કહ્યું કે મોદી સરકારે આ અધૂરા કામો દસ વર્ષમાં પૂર્ણ કર્યા છે જ્યારે પાછલી સરકારોએ 70 વર્ષ સુધી તેમને હાથ પણ લગાવ્યો ન હતો.
તેમણે કહ્યું કે મોદી સરકાર તેના ત્રીજા કાર્યકાળમાં પણ આ દિશામાં આગળ વધશે.
તેમણે એમ પણ કહ્યું કે “૧૭૦ દેશોએ યોગનો સ્વીકાર કર્યો છે તે ગર્વની વાત છે”. કેન્દ્રીય મંત્રીએ કહ્યું, “G-20 સમિટ દરમિયાન, વિશ્વભરના નેતાઓ અહીં આવ્યા હતા અને મહાત્મા ગાંધીને શ્રદ્ધાંજલિ આપી હતી, જે એક અમારા માટે પણ ગર્વની વાત છે.
હિન્દુ આધ્યાત્મિક સેવા મેળા વિશે વાત કરતા શાહે કહ્યું કે હિન્દુ મંદિરો અને સંગઠનોએ આદિવાસીઓને શિક્ષિત કરવા અથવા લાખો ગરીબ નાગરિકોને આરોગ્યસંભાળ પૂરી પાડવા સહિત વિવિધ રીતે સમાજની સેવા કરી છે, પરંતુ તેમણે ક્યારેય તેમના કાર્યનો પ્રચાર કર્યો નથી.
તેમણે આ કાર્યક્રમ દ્વારા તમામ સેવાલક્ષી હિન્દુ સંગઠનોને એક છત નીચે લાવવા બદલ રાષ્ટ્રીય સ્વયંસેવક સંઘ (RSS)નો આભાર માન્યો.
શાહે જણાવ્યું હતું કે સેવા મેળામાં સમાજના કલ્યાણ માટે કામ કરતી હિન્દુ સંસ્થાઓના લગભગ 200 સ્ટોલ છે, જેમાં 18મી સદીમાં ઇન્દોર રાજ્યના શાસક મહારાણી અહલ્યાબાઈ હોલકરને સમર્પિત એક સ્ટોલનો પણ સમાવેશ થાય છે.
