Delhi Police CPI(M) Office: ભારતીય કમ્યુનિસ્ટ પાર્ટી (માર્ક્સવાદી) એટલે કે માકપાએ મંગળવારે (28 જુલાઈ) આક્ષેપ કર્યો કે દિલ્હી પોલીસના અધિકારીઓ વિદ્યાર્થી નેતા ઓઇશી ઘોષની ધરપકડ કરવાનો પ્રયાસ કરવા માટે કોઈ પણ વિધિવત વોરંટ વિના પાર્ટી કાર્યાલયમાં ઘૂસી આવ્યા.
પીટીઆઈ અનુસાર, દિલ્હી સ્થિત પાર્ટી મુખ્યાલયમાં પોલીસ સાથે થોડો સમય ચાલેલી તનાતની બાદ પાર્ટીના સાંસદ જોન બ્રિટાસે કહ્યું, ‘દિલ્હી પોલીસ જે રીતે વર્તી રહી છે તે જોઈ હું સ્તબ્ધ અને આક્રોશિત છું. આજે દિલ્હી પોલીસના અધિકારીઓ એક રાષ્ટ્રીય પાર્ટી માકપાના કાર્યાલયમાં જબરદસ્તી ઘૂસી આવ્યા. તેઓ વિદ્યાર્થી નેતા ઓઇશી ઘોષને કસ્ટડીમાં લેવા માંગતા હતા. તેઓ જંતર-મંતર આંદોલનના મુખ્ય ચહેરાઓમાંના એક છે.’
ઓઇશી ઘોષ સ્ટુડન્ટ્સ ફેડરેશન ઓફ ઇન્ડિયાની દિલ્હી રાજ્ય સચિવ અને સંગઠનની અખિલ ભારતીય સંયુક્ત સચિવ છે. છેલ્લા કેટલાક મહિનાઓમાં તેમણે પેપર લીકના મુદ્દા સહિત અનેક વિદ્યાર્થી આંદોલનોનું નેતૃત્વ કર્યું છે. જણાવાયું કે પોલીસ સાંજે લગભગ સાડા ચાર વાગ્યે પાર્ટી કાર્યાલય પહોંચી હતી.
‘આ રાજકીય બદલો છે’
કેરળના પૂર્વ મુખ્યમંત્રી અને માકપા પોલિત બ્યુરોના સભ્ય પિનરાઈ વિજયને એક્સ પર લખ્યું, ‘સ્ટુડન્ટ્સ ફેડરેશન ઓફ ઇન્ડિયાએ તાજેતરમાં નીટ પરીક્ષા કૌભાંડ વિરુદ્ધ જંતર-મંતર ખાતે યોજાયેલા આંદોલનમાં સક્રિય ભૂમિકા ભજવી હતી. તેના તરત બાદ થયેલી આ કાર્યવાહી રાજકીય બદલા તરફ સ્પષ્ટ સંકેત કરે છે. રાજ્યની શક્તિનો આ રીતે ખુલ્લો દુરુપયોગ ભાજપના નેતૃત્વ હેઠળની કેન્દ્ર સરકારની અસહમતિ પ્રત્યે વધતી અસહિષ્ણુતાને દર્શાવે છે.’
પાર્ટીના મહાસચિવ એમ.એ. બેબીએ પણ પ્રતિક્રિયા આપતાં કહ્યું, ‘સ્ટુડન્ટ્સ ફેડરેશન ઓફ ઇન્ડિયાની નેતા ઓઇશી ઘોષને ધરપકડ કરવા માટે દિલ્હી પોલીસ દ્વારા માકપા મુખ્યાલય એકેજી ભવનમાં ઘૂસવાનો પ્રયાસ લોકશાહી ધોરણો પર એક ખતરનાક હુમલો છે.’
તેમણે એક્સ પર જાહેર કરેલા નિવેદનમાં લખ્યું, ‘માહિતી મળી છે કે છેલ્લા ઘણા દિવસોથી ઓઇશી ઘોષનો સતત પીછો કરવામાં આવી રહ્યો છે અને તેમના પર નજર રાખવામાં આવી રહી છે. આ વિદ્યાર્થી નેતાઓને ડરાવવા-ધમકાવવાનું ખુલ્લું અભિયાન છે.’
સાંજે કોકરોચ જનતા પાર્ટીના પ્રવક્તા આશુતોષ રાંકાએ પણ ઓઇશી ઘોષના સમર્થનમાં એક્સ પર લખ્યું, ‘અમારી ટીમને પરેશાન કરવાનું બંધ કરો. પોતાના વચનનો સન્માન કરો.’
તેમણે આગળ કહ્યું, ‘જો ઓઇશી ઘોષ સાથે કંઈપણ બનશે, તો સરકારને એવું આંદોલન જોવું પડશે જેવું તેમણે પહેલાં ક્યારેય જોયું નહીં હોય.’
If anything happens to @aishe_ghosh, the government will see a protest like never before.
Stop harassing our team. Honour your words. https://t.co/bjfwqueVe1
— Ashutosh Ranka (@AshutoshRanka) July 28, 2026
કોકરોચ જનતા પાર્ટીના સ્થાપક અભિજીત દીપકેએ એક્સ પર લખ્યું, ‘જો પોલીસ દ્વારા વિદ્યાર્થીઓને પરેશાન કરવાનું ચાલુ રહેશે, તો કોકરોચ જનતા પાર્ટી ટૂંક સમયમાં એક મોટા શાંતિપૂર્ણ આંદોલનનું આહ્વાન કરશે. સરકારે વિદ્યાર્થીઓને નિશાન બનાવવાનું અને તેમની વિરુદ્ધ અભિયાન ચલાવવાનું તરત જ બંધ કરવું જોઈએ.’
જોન બ્રિટાસે ધરપકડની પ્રક્રિયા પર ઉઠાવ્યા સવાલ
બ્રિટાસે આક્ષેપ કર્યો કે પોલીસ સાથે અનેક અધિકારીઓ આવ્યા હતા, જેમાં ઓછામાં ઓછા એક અધિકારી સાદા કપડાંમાં હતા અને ખાનગી વાહનમાં આવ્યા હતા. તેમણે કહ્યું કે પોલીસ ઓઇશી ઘોષની ધરપકડ માટે કોઈ વોરંટ હોવાનો દાવો કરી રહી હતી, પરંતુ તેની કોઈ નકલ તેમને બતાવવામાં આવી નહોતી.
બ્રિટાસના જણાવ્યા મુજબ, પોલીસનું કહેવું હતું કે વોરંટની માહિતી ફોન પર આપી દેવામાં આવી હતી, જ્યારે કાયદા મુજબ તેની વિધિવત જાણ વ્યક્તિગત રીતે કરવી જરૂરી છે.
તેમણે એ પણ આક્ષેપ કર્યો કે પોલીસ અધિકારીઓએ ન તો પોતાની સ્પષ્ટ ઓળખ આપી અને ન તો તેમની વર્દી પર નામની પટ્ટી લગાવવામાં આવી હતી. બ્રિટાસે કહ્યું કે જ્યારે આ અંગે પ્રશ્ન પૂછવામાં આવ્યો ત્યારે પોલીસકર્મીઓ ગભરાઈ ગયા અને ત્યાંથી ચાલ્યા ગયા.
તેમણે કહ્યું, ‘સરકાર એવો સંદેશ આપવા માંગે છે કે વિદ્યાર્થી આંદોલનમાં જોડાયેલા દરેક વ્યક્તિને, ખાસ કરીને તેના નેતાઓને, ઉઠાવી લેવામાં આવશે.’
માકપાએ પણ એક્સ પર લખ્યું, ‘વિદ્યાર્થીઓની વાજબી ચિંતાઓનું સમાધાન કરવાને બદલે રાજ્ય પોલીસ શક્તિનો ઉપયોગ કરીને અસહમતિના અવાજને ડરાવવા, દબાવવા અને ગુના તરીકે રજૂ કરવામાં વ્યસ્ત છે.’
બ્રિટાસે કહ્યું, ‘મને સંપૂર્ણ વિશ્વાસ છે કે ઉપરથી આદેશ મળ્યા વિના દિલ્હી પોલીસ માકપાના કાર્યાલયમાં પ્રવેશી શકતી નહોતી. આખા દેશને ખબર હોવી જોઈએ કે દિલ્હી પોલીસ કેવી રીતે વર્તી રહી છે.’
માકપા દ્વારા એક્સ પર શેર કરવામાં આવેલા એક વિડિયોમાં બ્રિટાસ પોલીસ અધિકારીઓને પૂછતા જોવા મળે છે કે, ‘તેમને કોઈ રાજકીય પક્ષના કાર્યાલયમાં આ રીતે ઘૂસવાની હિંમત કોણે આપી?’
Delhi Police forcibly entered the CPI(M) Headquarters, AKG Bhavan, in an attempt to arrest SFI leader @aishe_ghosh.
The illegal attempt was firmly resisted by CPI(M) Rajya Sabha MP @JohnBrittas, who forcefully intervened to stop the police from carrying out this unlawful action. pic.twitter.com/PMr1jgxsmn
— CPI (M) (@cpimspeak) July 28, 2026
સુપ્રીમ કોર્ટના નિર્ણય અને બીએનએસએસના ઉલ્લંઘનનો આક્ષેપ
પછી એક્સ પર કરવામાં આવેલી બીજી પોસ્ટમાં બ્રિટાસે આક્ષેપ કર્યો કે ઓઇશી ઘોષને ધરપકડ કરવાનો પ્રયાસ કરતી વખતે દિલ્હી પોલીસે સુપ્રીમ કોર્ટના ડીકે બસુ વિરુદ્ધ પશ્ચિમ બંગાળ રાજ્ય (1997)ના નિર્ણય અને ભારતીય નાગરિક સુરક્ષા સંહિતા (બીએનએસએસ)નું ઉલ્લંઘન કર્યું.
તેમણે કહ્યું કે 1997ના આ નિર્ણયમાં સ્પષ્ટ કરવામાં આવ્યું હતું કે કોઈપણ વ્યક્તિને ધરપકડ કરનાર પોલીસ અધિકારી પાસે સ્પષ્ટ અને દેખાય તેવી ઓળખ તેમજ નામની પટ્ટી હોવી ફરજિયાત છે. બીએનએસએસની કલમ 36 પણ આ જ સિદ્ધાંતને પુનરાવર્તિત કરે છે.
