Giriraj Singh on Mehbooba Mufti: કલમ 370ને લઈને રાજકીય ઘર્ષણ તેજ, મહેબૂબા મુફ્તીની માંગ પર ગિરિરાજ સિંહનો આકરો જવાબ
Giriraj Singh on Mehbooba Mufti: જમ્મુ-કાશ્મીરમાંથી કલમ 370 હટાવાયા આજે સાત વર્ષ પૂર્ણ થયા છે. તેની પૂર્વ સંધ્યાએ PDP પ્રમુખ મહેબૂબા મુફ્તીએ વિરોધ પ્રદર્શન કર્યું હતું. તેને લઈને હવે ભારતીય જનતા પાર્ટીના સાંસદ ગિરિરાજ સિંહે મહેબૂબા મુફ્તી પર પ્રહાર કર્યો છે.
ગિરિરાજ સિંહે પત્રકારો સાથે વાતચીત દરમિયાન કહ્યું, “મહેબૂબા મુફ્તી તો આતંકવાદી છે. હું તેમને આતંકવાદી એટલા માટે કહી રહ્યો છું કારણ કે તેમણે આતંકવાદીઓનો સાથ આપ્યો છે. થોડો સમય તેઓ અમારી સાથે રહ્યા, અમે બધું સુધારવાનો પ્રયાસ કર્યો. પરંતુ તેઓ સુધર્યા નહીં, તેથી અમે તેમને છોડી દીધા. આજનો દિવસ ભારતના ઇતિહાસમાં જેમ આપણે 26 જાન્યુઆરી અને 15 ઑગસ્ટ ઉજવીએ છીએ, તેમ જ એક મહાન દિવસ છે.”
ગિરિરાજ સિંહે વધુમાં કહ્યું, “સરદાર પટેલના સપનાઓને, ભારતના અસંખ્ય લોકોના સપનાઓને, જેમાં અમે કહેતા હતા કે એક દેશ, બે નિશાન અને બે પ્રધાન નહીં ચાલે. પ્રધાનમંત્રી નરેન્દ્ર મોદીના નેતૃત્વમાં 5 ઑગસ્ટ 2019ના રોજ દેશના ગૃહમંત્રી અમિત શાહે તે કાર્ય પૂર્ણ કર્યું. હવે એક દેશ, એક નિશાન, એક પ્રધાન અને એક વિધાન છે અને હવે કોઈ પણ તેને સમાપ્ત કરી શકશે નહીં.”
મહેબૂબા મુફ્તીએ કર્યો હતો કૅન્ડલ માર્ચ
ઉલ્લેખનીય છે કે પીપલ્સ ડેમોક્રેટિક પાર્ટી (PDP)ના પ્રમુખ મહેબૂબા મુફ્તીએ મંગળવારે શ્રીનગરમાં કલમ 370 હટાવ્યાની સાતમી વર્ષગાંઠ પહેલાં કૅન્ડલ લાઇટ વિરોધ પ્રદર્શન કર્યું હતું.
તેમણે આરોપ લગાવ્યો કે BJPના નેતૃત્વવાળી સરકારે જમ્મુ-કાશ્મીરનો વિશેષ દરજ્જો છીનવી લીધો છે અને કલમ 370 તથા 35Aને ફરીથી લાગુ કરવાની માંગ કરી હતી.
5 ઑગસ્ટે પ્રસ્તાવિત વિરોધ પ્રદર્શન અંગે વાત કરતાં મહેબૂબા મુફ્તીએ કહ્યું, “PDP અને અમારો સમાજ મળીને સંઘર્ષ કરશે. કાશ્મીર મુદ્દાના ઉકેલ સાથે અમે કલમ 370 અને 35Aનો મુદ્દો તેમજ દેશભરની વિવિધ જેલોમાં બંધ કેદીઓની મુક્તિનો મુદ્દો પણ ઉઠાવીશું.”
મહેબૂબા મુફ્તીએ વધુમાં કહ્યું, “જો આ સરકાર કહે છે કે પરિસ્થિતિમાં સુધારો થયો છે, તો અમે તેમને કહીશું કે તેઓ સેનાને નાગરિક વિસ્તારોમાંથી હટાવીને ફરી કેમ્પોમાં મોકલે. મુઝફ્ફરાબાદ અને રાવલકોટ માર્ગો પર ફરી વેપાર શરૂ કરવામાં આવે, જે અગાઉ ખુલ્લા હતા. કાશ્મીરના લોકો બંને તરફ મુશ્કેલીમાં છે. બે દિવસ પહેલાં છત્તીસગઢના બે મજૂરોની ગોળી મારીને હત્યા કરવામાં આવી હતી અને હજારો લોકોને ઓવર ગ્રાઉન્ડ વર્કર્સના નામે જેલમાં બંધ કરવામાં આવી રહ્યા છે.”
‘કલમ 370 માત્ર એક કલમ નહોતું’ – મહેબૂબા મુફ્તી
મહેબૂબા મુફ્તીએ જણાવ્યું કે કલમ 370 માત્ર એક બંધારણીય જોગવાઈ નહોતી, પરંતુ તે જમ્મુ-કાશ્મીરના લોકોની ઓળખ અને અધિકારોનું પ્રતિક હતું.
તેમણે કહ્યું, “કલમ 370 માત્ર એક કલમ નહોતું. તે અમારી ઓળખ, અમારું સન્માન, અમારો ગૌરવ અને અમારી જમીન તથા નોકરીઓની સુરક્ષા હતી. તેમણે અમને સંપૂર્ણપણે નિષ્ક્રિય બનાવી દીધા છે. પરંતુ આ સમય હંમેશા રહેશે નહીં. આ એક કાળી રાત છે, કારણ કે એક ષડયંત્ર રચવામાં આવ્યું અને સંસદમાં ભારે બહુમતનો ઉપયોગ કરીને ભારતના બંધારણમાં ફેરફાર કરવામાં આવ્યો.”
તેમણે વધુમાં કહ્યું, “અમને જે કંઈ મળ્યું હતું તે આ દેશના બંધારણમાંથી મળ્યું હતું, ચીન અથવા પાકિસ્તાનમાંથી નહીં. અમે પ્રેમ અને કેટલીક શરતો સાથે ભારતમાં જોડાયા હતા, પરંતુ બધું જ બરબાદ કરી દેવામાં આવ્યું.”
ઉમર અબ્દુલ્લાએ પણ લગાવ્યા હતા આરોપ
જમ્મુ-કાશ્મીરના મુખ્યમંત્રી ઉમર અબ્દુલ્લાએ શનિવારે રાજ્યના પૂર્વ મુખ્યમંત્રી મહેબૂબા મુફ્તી અને તેમની પાર્ટી PDP પર મોટો પ્રહાર કર્યો હતો.
તેમણે ફરી એકવાર કલમ 370ના સમાપન મુદ્દે PDP-BJP સરકાર પર સવાલ ઉઠાવ્યા અને જણાવ્યું કે રાજ્યનો વિશેષ દરજ્જો સમાપ્ત કરવામાં PDPએ BJPને મદદ કરી હતી.
