NCERT Judicial Corruption Controversy: સુપ્રીમ કોર્ટે NCERT ધોરણ 8ના જ્યુડિશિયલ કરપ્શન (ન્યાયિક ભ્રષ્ટાચાર) વાળા કન્ટેન્ટ પર ગંભીર ચિંતા વ્યક્ત કરી છે. CJI સૂર્યકાંતે જણાવ્યું છે કે તેમણે આ બાબતની નોંધ લીધી છે અને તેઓ પોતે જ કાર્યવાહી કરી શકે છે. તેમણે કહ્યું, ‘હું કોઈને પણ સંસ્થાને બદનામ કરવાની મંજૂરી નહીં આપું. કાયદો પોતાનું કામ કરશે.’ આ મામલાને અદાલતમાં વરિષ્ઠ વકીલ કપિલ સિબ્બલ અને અભિષેક મનુ સિંઘવીએ CJI સામે રજૂ કર્યો હતો. તેમણે કહ્યું કે તેઓ એ વાતથી વ્યથિત છે કે શાળાના વિદ્યાર્થીઓને આવી સામગ્રી ભણાવવામાં આવી રહી છે.
‘કોઈને સંસ્થાને બદનામ નહીં કરવા દઈએ’
સિબ્બલે અદાલતને વિનંતી કરી કે આ મામલે સ્વતઃ સંજ્ઞાન (Suo Motu) લેવામાં આવે. આના પર મુખ્ય ન્યાયાધીશ સૂર્યકાંતે કહ્યું કે તેઓ આ મુદ્દાથી વાકેફ છે અને તેમને આ સંબંધમાં અનેક કોલ અને સંદેશાઓ મળ્યા છે. CJIએ સ્પષ્ટ શબ્દોમાં કહ્યું, ‘હું કોઈને પણ આ સંસ્થાને બદનામ કરવાની પરવાનગી નહીં આપું. મને ખબર છે કે આની સાથે કેવી રીતે પતાવટ કરવી.’
‘યોગ્ય પગલાં લેવામાં આવશે’
સુપ્રીમ કોર્ટે આ મામલાને ગંભીરતાથી લીધો છે અને યોગ્ય કાર્યવાહી કરવાનું આશ્વાસન આપ્યું છે. CJIએ કહ્યું, ‘આ એક આયોજિત અને વિચારેલો પ્રયાસ જણાય છે. હું આનાથી વધુ કંઈ કહેવા માંગતો નથી.’ આ ઉપરાંત CJIએ આ મુદ્દો તેમના ધ્યાને લાવવા બદલ સિબ્બલ અને સિંઘવીનો આભાર વ્યક્ત કર્યો હતો. મામલાને લઈને આગળ શું કાર્યવાહી થશે, તેના પર અદાલત તરફથી સંકેત આપવામાં આવ્યો છે કે યોગ્ય પગલાં લેવામાં આવશે.
શું છે મામલો?
આ વિવાદ NCERT ના ધોરણ 8 ના સામાજિક વિજ્ઞાનના પુસ્તક સાથે જોડાયેલો છે. આ પુસ્તકના એક પ્રકરણમાં ‘ન્યાયપાલિકામાં ભ્રષ્ટાચાર’ સેક્શન ઉમેરવામાં આવ્યો છે. આ મામલે સુપ્રીમ કોર્ટે સ્વતઃ સંજ્ઞાન લીધું છે.
