Nirmala Sitharaman Paper Leak: પેપર લીક અને પરીક્ષાઓમાં ગડબડીને લઈને રાજધાની દિલ્હી સહિત દેશભરના શહેરોમાં યુવાનોનું વિરોધ પ્રદર્શન ચાલુ છે. આ દરમિયાન કેન્દ્રીય નાણાં મંત્રી નિર્મલા સીતારમણના એક નિવેદનથી રાજકીય વિવાદ ઊભો થયો છે. વિરોધ પક્ષો સાથે જ કોકરોચ જનતા પાર્ટી (સીજેપી)એ પણ તેના પર કડક પ્રતિક્રિયા આપી છે.
અહેવાલ મુજબ, ગુરુવાર (23 જુલાઈ)ના રોજ સીતારમણે કહ્યું હતું કે કેટલાક વિદ્યાર્થીઓએ પેપર લીકની ઘટનાનો લાભ લઈને વધુ મહેનત કરી.
સીતારમણે મીડિયા સાથે વાત કરતાં કહ્યું હતું, “જો સરકારે સમયસર કાર્યવાહી ન કરી હોત, સમયસર ધરપકડો ન થઈ હોત, સમયસર ફરી પરીક્ષા ન લેવાઈ હોત અને ઘટના બાદ સમયસર પરિણામ જાહેર ન કરવામાં આવ્યા હોત, તો આજે યુવાનો તે સંસ્થાઓમાં પ્રવેશ લેવા માટેની સ્થિતિમાં ન હોત, જ્યાં તેમને આગળનો અભ્યાસ કરવો છે.”
તેમણે આગળ કહ્યું, “આ બધું થઈ રહ્યું છે અને કેટલાક યુવાનો પોતે આગળ આવીને કહી રહ્યા છે કે હા, જ્યારે પેપર લીક થયું ત્યારે મને દુઃખ થયું હતું, પરંતુ બાદમાં મેં તેનો લાભ લીધો અને વધુ મહેનત કરીને તૈયારી કરી. મારું પ્રદર્શન વધુ સારું થયું અને મેં સારો દેખાવ કર્યો. એવા પણ યુવાનો છે જેમણે આ પડકારનો સામનો કર્યો અને તેમાંથી બહાર આવીને સારી સફળતા મેળવી.”
નાણાં મંત્રીના આ નિવેદન બાદ કોંગ્રેસે સોશિયલ મીડિયા મંચ એક્સ પર તીખી પ્રતિક્રિયા આપતાં તેને અસંવેદનશીલ અને બિનજવાબદાર ગણાવ્યું.
કોંગ્રેસે પોતાના પોસ્ટમાં લખ્યું, “જે પેપર લીકે 21થી વધુ બાળકોના જીવ લીધા, જેના વિરોધમાં લાખો યુવાનો આંદોલન કરી રહ્યા છે, તે જ ઘટનાના ફાયદા સરકાર ગણાવી રહી છે. આ નિવેદન એ વાતનો પુરાવો છે કે મોદી સરકાર પેપર લીક રોકવા અંગે ગંભીર નથી. આ લોકોએ દેશની શિક્ષણ વ્યવસ્થાનો કચરો કરી નાખ્યો છે.”
કોંગ્રેસ નેતા સુપ્રિયા શ્રીનેતે પણ સોશિયલ મીડિયા પોસ્ટ દ્વારા નાણાં મંત્રીની આ ટિપ્પણીઓ પર ટીકાત્મક પ્રહાર કરતાં કહ્યું કે નાણાં મંત્રી નિર્મલા જી પેપર લીકના ફાયદા ગણાવી રહ્યા છે.
બીજી તરફ, આમ આદમી પાર્ટીએ કહ્યું, “મેડમ નાણાં મંત્રીને કોઈ પરિચયની જરૂર નથી. તેઓ ફરી પાછા આવ્યા છે, આ વખતે પેપર લીક થવાના ફાયદાઓ વિશે જણાવવા.”
રાજકીય પક્ષ ઝારખંડ મુક્તિ મોર્ચા (જેએમએમ)એ પણ સીતારમણના આ નિવેદનની ટીકા કરી છે.
પાર્ટીએ પોતાના સત્તાવાર એક્સ હેન્ડલ પર લખ્યું, “પેપર લીક ભયાનક સ્વરૂપ ધારણ કરી ચૂકેલું કેન્સર છે. ઝારખંડની હેમંત સરકાર આ કેન્સરનો સંપૂર્ણ નાશ કરી રહી છે, પરંતુ ભાજપ કહે છે કે પેપર લીકના પોતાના ફાયદા છે.”
આ મુદ્દે છેલ્લા એક મહિનાથી દિલ્હીના જંતર-મંતર પર યુવાનોના પ્રદર્શનનું નેતૃત્વ કરી રહેલી કોકરોચ જનતા પાર્ટીએ નીટ પેપર લીક મામલે સીતારમણની ટિપ્પણીઓની ટીકા કરતાં તેમને આ વિવાદથી પ્રભાવિત વિદ્યાર્થીઓ પ્રત્યે “અસંવેદનશીલ” ગણાવ્યા છે.
કોકરોચ જનતા પાર્ટીના પ્રવક્તા આશુતોષ રાંકાએ ટીકાત્મક અંદાજમાં કહ્યું, “આ તર્ક પ્રમાણે તો દેશમાં બધા જ પેપર લીક થવા જોઈએ.”
પાર્ટીએ સવાલ ઉઠાવ્યો કે શું સરકાર પરીક્ષા પ્રણાલીની નિષ્ફળતાની જવાબદારી સ્વીકારવાના બદલે “પેપર લીકના ફાયદાઓનું ગુણગાન” કરી રહી છે.
ઉલ્લેખનીય છે કે શનિવાર (25 જુલાઈ)ના રોજ સીજેપી અને સરકાર વચ્ચે ત્રીજા તબક્કાની ચર્ચા પ્રસ્તાવિત છે. તે પહેલાં થયેલા બે તબક્કાની ચર્ચામાં કેટલીક માંગણીઓ પર સહમતિ બની હોવાની માહિતી સામે આવી છે.
જો કે, સીજેપીએ સરકાર સમક્ષ ત્રીજા તબક્કાની ચર્ચા પહેલાં કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગને “નોન-નેગોશિએબલ” ગણાવી છે.
પાર્ટીએ ચેતવણી આપી છે કે જો ધર્મેન્દ્ર પ્રધાન રાજીનામું નહીં આપે તો વિરોધ પ્રદર્શનને વધુ તેજ કરવામાં આવશે. તેની સાથે જ દેશભરમાં આંદોલન માટે ટૂંક સમયમાં નવા આહ્વાનની જરૂર પડી શકે છે.
