Parliament Budget Session 2026: સંસદના બજેટ સત્રમાં લોકસભામાં મંગળવારે પણ ગૃહની કાર્યવાહી દરમિયાન હંગામો થયો હતો. રાહુલ ગાંધીએ મંગળવારે લદ્દાખ સરહદ વિવાદનો મુદ્દો ઉઠાવ્યો હતો, જ્યારે ચેર (પીઠ) તરફથી વારંવાર માત્ર ‘પ્રામાણિક સ્ત્રોત’ રજૂ કરવાની વાત કહેવામાં આવી હતી. વિપક્ષી સાંસદોએ ભારત-ચીન મુદ્દે ગૃહને ગેરમાર્ગે દોરવાનો આરોપ લગાવીને કેન્દ્ર સરકાર પર હુમલો ચાલુ રાખ્યો હતો. આ સાથે જ વિપક્ષી સાંસદોએ ચેરના નિર્ણયોનો વિરોધ ચાલુ રાખ્યો અને માંગ કરી કે વિપક્ષના નેતાને આ મુદ્દે બોલવાની પરવાનગી આપવામાં આવે. વિપક્ષી સભ્યો પોડિયમમાં ચેરની નજીક પહોંચી ગયા હતા.
‘યાર’ કહેવા બદલ વિપક્ષી સભ્યોને ઠપકો
લોકસભાની કાર્યવાહી દરમિયાન ચેર પર કૃષ્ણ પ્રસાદ તેન્નટી હાજર હતા. રાહુલ ગાંધીના ભાષણને લઈને ઇન્ડિયા (INDIA) બ્લોકના સાંસદો અને ટ્રેઝરી બેન્ચના સાંસદો વચ્ચેની ઉગ્ર ચર્ચા વચ્ચે, ચેરપર્સન કૃષ્ણ પ્રસાદ તેન્નટીએ એક સાંસદને ચેરને ‘યાર’ કહીને સંબોધવા બદલ ઠપકો આપ્યો હતો. તેન્નટીએ કહ્યું કે આ ‘યાર’ શું છે? તમે ચેરને ‘યાર’ કહીને સંબોધિત કરી શકો નહીં. આ સંસદ છે, આ લોકસભા છે, તમે ચેરને આ રીતે સંબોધિત ન કરી શકો. ચેરે કહ્યું કે મેં વિપક્ષના નેતાને રાષ્ટ્રપતિના અભિભાષણ પર બોલવા માટે વારંવાર વિનંતી કરી હતી.
વિપક્ષી સભ્યોનો બોલવાનો ઇનકાર
ત્યારબાદ, તેમણે આગામી સ્પીકર સમાજવાદી પાર્ટીના સાંસદ નરેશ ઉત્તમ પટેલને બોલાવ્યા હતા. જોકે, પટેલે બોલવાની મનાઈ કરી દીધી હતી. તેમણે વિપક્ષના અન્ય સ્પીકરોને બોલાવ્યા, પરંતુ તમામે બોલવાનો ઇનકાર કરી દીધો હતો. સતત સૂત્રોચ્ચાર અને હંગામા વચ્ચે ટીડીપી (TDP) સાંસદ જીએમ હરીશ બાલાયોગી રાષ્ટ્રપતિના અભિભાષણ પર આભાર પ્રસ્તાવ પર બોલવા માટે ઊભા થયા હતા. ગૃહમાં જ્યારે હંગામો ન અટક્યો, ત્યારે ગૃહને બપોરે ૩:૦૦ વાગ્યા સુધી સ્થગિત કરી દેવામાં આવ્યું હતું.
