મુંબઈ, 13 ડિસેમ્બર, ભારતીય રિઝર્વ બેંક (RBI) ને એક ધમકીનો ઈ-મેલ મળ્યો છે જેમાં દાવો કરવામાં આવ્યો છે કે દક્ષિણ મુંબઈમાં તેની ઈમારતમાં ‘IED’ (ઈમ્પ્રુવાઇઝ્ડ એક્સપ્લોઝિવ ડિવાઈસ) લગાવવામાં આવ્યું છે. એક પોલીસ અધિકારીએ શુક્રવારે આ જાણકારી આપી.
તેમણે જણાવ્યું કે ગુરુવારે આ સંદેશ આરબીઆઈ ગવર્નરના સત્તાવાર ઈમેલ એડ્રેસ પર મોકલવામાં આવ્યો હતો, ત્યારબાદ આ બેંકના અધિકારીઓએ પોલીસને જાણ કરી હતી.
તેમણે કહ્યું કે હજુ સુધી ઈ-મેલ મોકલનારની ઓળખ થઈ નથી.
પોલીસ અધિકારીએ કહ્યું કે આરબીઆઈ બિલ્ડિંગની તપાસ કરવામાં આવી હતી પરંતુ હજુ સુધી કંઈપણ શંકાસ્પદ મળ્યું નથી.
તેમણે કહ્યું કે રશિયન ભાષામાં લખેલા આ ‘ઈ-મેલ’માં પ્રેષકે દાવો કર્યો છે કે ઈમારતમાં ‘આઈઈડી’ બોમ્બ મૂકવામાં આવ્યો છે અને તે પાંચ દિવસમાં રિમોટથી સક્રિય થઈ જશે.
પ્રેષકે આરબીઆઈ ગવર્નરને ‘બ્રધરહુડ મૂવમેન્ટ ફોર યુક્રેન’માં જોડાવા માટે પણ આહ્વાન કર્યું છે.
પોલીસ અધિકારીએ કહ્યું કે દક્ષિણ મુંબઈના રમાબાઈ આંબેડકર માર્ગ પોલીસ સ્ટેશનમાં આ અંગે કેસ નોંધવામાં આવ્યો છે અને તેની તપાસ કરવામાં આવી રહી છે.