Asian Games 2026: એશિયન ગેમ્સ 2026માં ભારતને વધુ એક ગોલ્ડ મેડલ મળ્યો છે. આ મેડલ મહિલા કબડ્ડી ટીમે અપાવ્યો છે. એશિયન ગેમ્સમાં આ ભારતનો ત્રીજો ગોલ્ડ મેડલ છે. ભારતે ઈરાનને 37-34ના અંતરથી હરાવ્યું. ભારતે આ મેચમાં પ્રથમ હાફમાં જ 22-16ની લીડ મેળવી લીધી હતી. ત્યારબાદ ઈરાનની ટીમે બીજા હાફમાં વાપસી કરવાનો ભરપૂર પ્રયાસ કર્યો. એક સમયે સ્કોર 27-26 સુધી પહોંચી ગયો હતો, પરંતુ ભારતની ખેલાડીઓએ લીડ જવા દીધી નહીં અને જોરદાર વાપસી કરીને દેશ માટે ગોલ્ડ મેડલ જીતી લીધો. ફાઇનલ મેચમાં સંજુ દેવીએ શાનદાર પ્રદર્શન કર્યું. તેમણે શાનદાર રેડ કરીને ભારતને જીત અપાવી.
ભારતને શરૂઆતથી જ ગોલ્ડ મેડલ જીતવાનું દાવેદાર માનવામાં આવી રહ્યું હતું. ટીમ ઇન્ડિયાએ અત્યાર સુધી અપરાજિત રહીને તમામ મેચ જીતી હતી. ત્યારબાદ ટીમના કોચે કહ્યું હતું કે કબડ્ડી અમારી રમત છે. આ રમત ભારતમાં જ શરૂ થઈ હતી અને તેમાં અમને કોઈ હરાવી શકે નહીં. હવે ટીમ ઇન્ડિયાએ ગોલ્ડ જીતીને પોતાના કોચના દાવાને સાચો સાબિત કર્યો છે.
એશિયન ગેમ્સમાં ભારતીય ટીમની સફર
એશિયન ગેમ્સ 2026માં ભારતીય ટીમ એક પણ મેચ હાર્યા વિના ચેમ્પિયન બની છે. ટીમ ઇન્ડિયાએ પોતાની ત્રણેય ગ્રુપ મેચ જીતી, ત્યારબાદ સેમિફાઇનલ અને ફાઇનલમાં શાનદાર જીત મેળવીને ગોલ્ડ મેડલ પોતાના નામે કર્યો. ભારતે પોતાના અભિયાનની શરૂઆત બાંગ્લાદેશ સામે 42-21ની જીત સાથે કરી હતી, ત્યારબાદ ઈરાનને 37-23થી હરાવ્યું. ત્યારબાદ જાપાન સામે 50-25થી શાનદાર જીત મેળવી અને ગ્રુપ-Aમાં ટોચ પર રહીને સેમિફાઇનલમાં સ્થાન મેળવ્યું. સેમિફાઇનલમાં ભારતે નેપાળને 48-24ના અંતરથી હરાવીને ફાઇનલમાં સ્થાન બનાવી લીધું. ત્યારબાદ ફાઇનલમાં ઈરાનને 37-34ના અંતરથી હરાવ્યું.
કબડ્ડીમાં ભારતનું પ્રભુત્વ
કબડ્ડીમાં ભારતનું પ્રભુત્વ યથાવત છે. આ રમતને 1990માં એશિયન ગેમ્સમાં સામેલ કરવામાં આવ્યા બાદથી ભારતીય પુરુષ ટીમે 9 મેડલ જીત્યા છે. તેમાં 8 ગોલ્ડ મેડલ સામેલ છે. 2018માં ભારતનો ગોલ્ડ મેડલ જીતવાનો સિલસિલો તૂટ્યો હતો, જ્યારે ટીમને બ્રોન્ઝ મેડલ મળ્યો હતો.
