Bangladesh vs Australia: 54 રનમાં આખી ટીમ ઓલઆઉટ, એક જ બોલરે લીધા 8 વિકેટ, બાંગ્લાદેશે કર્યું સંપૂર્ણ સમર્પણ
Bangladesh vs Australia: બાંગ્લાદેશ સામે ડાર્વિનમાં યોજાનારી આગામી પ્રથમ ટેસ્ટ મેચ પહેલાં ઓસ્ટ્રેલિયાના બોલિંગ આક્રમણનો આત્મવિશ્વાસ ઊંચો દેખાઈ રહ્યો છે. ક્રિકેટ ઓસ્ટ્રેલિયા XI સામે રમાયેલી ત્રણ દિવસીય પ્રેક્ટિસ મેચમાં બાંગ્લાદેશની બેટિંગ પત્તાના મહેલની જેમ ધરાશાયી થઈ ગઈ. બીજી ઇનિંગ્સમાં આખી ટીમ માત્ર 54 રનમાં ઓલઆઉટ થઈ ગઈ, જેના કારણે તેમને એક ઇનિંગ્સ અને 38 રનથી શરમજનક પરાજયનો સામનો કરવો પડ્યો. આ મુકાબલાએ ટેસ્ટ શ્રેણી પહેલાં મહેમાન ટીમની તૈયારીઓની હકીકત ઉજાગર કરી દીધી.
કેમ્પબેલ થોમ્પસને લીધી 8 વિકેટ
ક્રિકેટ ઓસ્ટ્રેલિયા XIની આ એકતરફી જીતના સૌથી મોટા હીરો 22 વર્ષીય યુવા ઝડપી બોલર કેમ્પબેલ થોમ્પસન રહ્યા. દક્ષિણ ઓસ્ટ્રેલિયાના આ ડાબોડી પેસરે પોતાની ઘાતક બોલિંગથી બાંગ્લાદેશના બેટિંગ ક્રમને સંપૂર્ણ રીતે ધ્વસ્ત કરી નાખ્યો. થોમ્પસને માત્ર 25 રન આપીને 8 વિકેટ પોતાના નામે કરી. શુક્રવારે સાંજે બે વિકેટ ઝડપી લીધા બાદ તેમણે શનિવારે સવારે વધુ છ વિકેટ લઈને ઘાતક બોલિંગનું પ્રદર્શન કર્યું, જેના કારણે બાંગ્લાદેશે સવારના સેશનમાં માત્ર 35 રન ઉમેર્યા અને પોતાની 8 વિકેટ ગુમાવી.
અજાણ્યા બોલરે બાંગ્લાદેશને કર્યો ધ્વસ્ત
થોમ્પસનનું આ પ્રદર્શન એટલા માટે પણ આશ્ચર્યજનક છે કારણ કે તેમણે પોતાના કારકિર્દીમાં અત્યાર સુધી માત્ર એક શેફિલ્ડ શીલ્ડ મેચ અને બે ODI મેચ જ રમી છે. બાંગ્લાદેશ તરફથી બીજી ઇનિંગ્સમાં ઓપનિંગ બેટર તાંઝીદ હસન (22 રન) એકમાત્ર એવા બેટર રહ્યા જે બે આંકડાનો સ્કોર કરી શક્યા, જ્યારે બાકીના તમામ બેટર ક્રીઝ પર ટકી રહેવા માટે સંઘર્ષ કરતા જોવા મળ્યા.
પ્રથમ ઇનિંગ્સમાં મળી હતી મોટી લીડ
આ પહેલાં પ્રથમ ઇનિંગ્સમાં બેટિંગ કરતાં ક્રિકેટ ઓસ્ટ્રેલિયા XIએ ટિગ વાયલીની શાનદાર સદી અને જેક ડોરેનની ઉપયોગી ઇનિંગ્સના આધારે 92 રનની મજબૂત લીડ મેળવી હતી. પશ્ચિમ ઓસ્ટ્રેલિયા છોડીને તસ્માનિયા સાથે જોડાયેલા 22 વર્ષીય વાયલીએ 177 બોલમાં 130 રનની ઉત્તમ ઇનિંગ્સ રમી હતી. તેમને છઠ્ઠા ક્રમે બેટિંગ કરવા આવેલા વિકેટકીપર બેટર ડોરેન (76 રન)નો સારો સાથ મળ્યો અને બંનેએ મળીને સાતમી વિકેટ માટે 167 રનની મહત્વપૂર્ણ ભાગીદારી નોંધાવી હતી. કેપ્ટન કર્ટિસ પેટરસને પણ 53 રનનું યોગદાન આપ્યું, જેના કારણે ટીમ વિશાળ સ્કોર સુધી પહોંચી શકી.
