India vs Pakistan Hockey: મહિલા જુનિયર એશિયા કપમાં ભારતે પાકિસ્તાનને એકતરફી મુકાબલામાં હરાવી દીધું છે. ચીનના મોકીમાં ટુર્નામેન્ટનું આયોજન કરવામાં આવી રહ્યું છે. ટુર્નામેન્ટની પ્રથમ ક્વાર્ટર ફાઇનલમાં ભારત અને પાકિસ્તાન વચ્ચે ટક્કર થઈ હતી. આ મેચ ભારતે 19-0ના મોટા અંતરથી પોતાના નામે કરી હતી. આ મહિલા જુનિયર એશિયા કપમાં કોઈપણ ટીમની સૌથી મોટી જીત છે. આ જીત સાથે ટીમ સેમિફાઇનલમાં પહોંચી ગઈ છે, જ્યાં તેનો મુકાબલો સાઉથ કોરિયા અથવા મલેશિયા સામે થશે.
ભારતે 7મી મિનિટથી શરૂ કર્યો ગોલનો વરસાદ
ભારત તરફથી મેચનો પ્રથમ ગોલ 7મી મિનિટમાં થયો હતો. આ ગોલ પૂજા સાહૂએ પેનલ્ટી કોર્નર પર કર્યો હતો. પ્રથમ ક્વાર્ટરમાં 5 ગોલ થયા હતા અને બીજા ક્વાર્ટરમાં પણ ભારતે જ ગોલ ફટકાર્યા હતા. ત્રીજા ક્વાર્ટરમાં પાકિસ્તાને સારું પ્રદર્શન કર્યું હતું, પરંતુ ભારતે આ વખતે પણ ત્રણ ગોલ ફટકાર્યા હતા. અંતિમ ક્વાર્ટરમાં સૌથી વધુ 6 ગોલ ફટકારવામાં આવ્યા હતા. આ રીતે ભારતે મેચમાં કુલ 19 ગોલ કર્યા હતા.
𝗜𝗡𝗗𝗜𝗔 𝗣𝗨𝗧𝗦 𝗢𝗡 𝗔 𝗦𝗛𝗢𝗪 𝗧𝗢 𝗥𝗘𝗔𝗖𝗛 𝗧𝗛𝗘 𝗦𝗘𝗠𝗜-𝗙𝗜𝗡𝗔𝗟𝗦! 🇮🇳🔥
An emphatic 19-0 win over Pakistan sends the Indian Junior Women’s Team into the last four of the AHF Junior Asia Cup 2026! 🏑💥
The road to the title continues! 🏆🇮🇳
We will face the… pic.twitter.com/rNTaETJr09
— Hockey India (@TheHockeyIndia) September 10, 2026
ટીમ માટે પૂજા મલિકે હેટ્રિક ગોલ કર્યો
ભારત માટે આ મુકાબલામાં 13 ખેલાડીઓએ ગોલ કર્યા હતા. પૂજા મલિકે ટીમ માટે 27મી, 49મી અને 51મી મિનિટમાં ગોલ કરીને હેટ્રિક પૂર્ણ કરી હતી. જ્યારે રોશની, સનિકા ચંદ્રકાંત માને, મધુ સિદર અને સુપ્રિયાએ બે-બે ગોલ કર્યા હતા. પૂજા સાહૂ ઉપરાંત તનુશ્રી દિનેશ કાડૂ, સૂખવીર કૌર, ગીતા યાદવ, તનુજા ટોપ્પો, પૂર્ણિમા યાદવ, કૃષ્ણા શર્મા અને બિનિમા ધનની સ્ટિકથી 1-1 ગોલ થયો હતો.
ભારત ટુર્નામેન્ટનું બે વખતનું ડિફેન્ડિંગ ચેમ્પિયન
ડિફેન્ડિંગ ચેમ્પિયન ભારત મહિલા જુનિયર હોકી એશિયા કપ 2026માં એક પણ મેચ હાર્યું નથી. એલિટ પૂલ રાઉન્ડમાં ચીન સામે ભારતની મેચ ગોલરહિત ડ્રોમાં સમાપ્ત થઈ હતી. આ ઉપરાંત જાપાન, સાઉથ કોરિયા અને મલેશિયા સામે એકતરફી જીત મળી હતી. 1992માં મહિલા જુનિયર એશિયા કપની શરૂઆત થઈ હતી. 2015 સુધી તેમાં ચીન અને સાઉથ કોરિયાનું વર્ચસ્વ હતું. છેલ્લી બે ટુર્નામેન્ટમાં ભારતે સાઉથ કોરિયા અને ચીનને હરાવીને જ ખિતાબ જીત્યો છે.
