IPL RCB Brand Value: IPLનો બિઝનેસ પ્રથમ વખત 20 બિલિયન ડોલર પાર, RCB નંબર-1 ટીમ બની
IPL RCB Brand Value: રોયલ ચેલેન્જર્સ બેંગલુરુ IPL ની પ્રથમ એવી ટીમ બની છે, જેના બ્રાન્ડ વેલ્યુ 300 મિલિયન ડોલર એટલે કે અંદાજે 2,979 કરોડ રૂપિયા પાર પહોંચી ગઈ છે. બીજી તરફ સમગ્ર IPL નો કુલ બિઝનેસ પ્રથમ વખત 20 બિલિયન ડોલર એટલે કે અંદાજે 1.96 લાખ કરોડ રૂપિયા પાર પહોંચી ગયો છે. તેનાથી સ્પષ્ટ થઈ ગયું છે કે વિશ્વની સૌથી સમૃદ્ધ ક્રિકેટ લીગ હવે માત્ર બે મહિના ચાલતી ટુર્નામેન્ટ નથી, પરંતુ આખું વર્ષ આવક આપતો એક વિશાળ વૈશ્વિક બિઝનેસ બની ગઈ છે. હૂલિહાન લોકીની 2026 IPL બ્રાન્ડ વેલ્યુ રિપોર્ટ મુજબ, IPLની કુલ બિઝનેસ વેલ્યુ ગયા વર્ષની સરખામણીએ 11.4 ટકા વધીને 20.6 બિલિયન ડોલર એટલે કે અંદાજે 1.96 લાખ કરોડ રૂપિયા થઈ ગઈ છે. જ્યારે માત્ર IPL બ્રાન્ડની વેલ્યુ 10.3 ટકા વધીને 4.3 બિલિયન ડોલર એટલે કે અંદાજે 41,000 કરોડ રૂપિયા પહોંચી ગઈ છે.
2,979 કરોડ રૂપિયાની વેલ્યુ સાથે RCB નંબર-1 પર
RCB સતત IPLની સૌથી મૂલ્યવાન ટીમ બની રહી છે. RCB ની બ્રાન્ડ વેલ્યુ ગયા વર્ષની સરખામણીએ 16 ટકા વધીને અંદાજે 2,979 કરોડ રૂપિયા થઈ ગઈ છે. તે 300 મિલિયન ડોલરનો આંકડો પાર કરનારી પ્રથમ IPL ટીમ બની છે. ખાસ વાત એ છે કે આ જ વર્ષે RCB ટીમની માલિકીનો હક રેકોર્ડ 1.78 બિલિયન ડોલર એટલે કે અંદાજે 17,000 કરોડ રૂપિયામાં ખરીદવામાં આવ્યો હતો, જે IPLના ઇતિહાસમાં કોઈપણ ટીમ માટે અત્યાર સુધીની સૌથી મોટી કિંમત છે. આ ઉપરાંત, રાજસ્થાન રોયલ્સને અંદાજે 15,750 કરોડ રૂપિયાની ભારે કિંમતમાં ખરીદવામાં આવી છે.
જીત કરતાં વધુ જબરદસ્ત ચાહકોએ RCB ને નંબર-1 બનાવી
રિપોર્ટ મુજબ, 2026માં RCBની બીજી IPL ટ્રોફીની જીતથી ચાહકોમાં ભારે ખુશી જોવા મળી, પરંતુ ટીમની સાચી તાકાત તેના ચાહકો, સામાજિક માધ્યમો પર તેની જબરદસ્ત લોકપ્રિયતા અને મજબૂત બિઝનેસ મોડેલ છે. RCBએ માત્ર છેલ્લા એક વર્ષમાં પોતાની બ્રાન્ડ વેલ્યુમાં અંદાજે 410 કરોડ રૂપિયાનો વધારો કર્યો છે. IPLની અન્ય ટીમોની વાત કરીએ તો મુંબઈ ઇન્ડિયન્સ અંદાજે 2,520 કરોડ રૂપિયા સાથે બીજા ક્રમે છે. ત્યારબાદ કોલકાતા નાઇટ રાઇડર્સ 2,339 કરોડ રૂપિયા સાથે ત્રીજા અને ચેન્નાઈ સુપર કિંગ્સ 2,330 કરોડ રૂપિયા સાથે ચોથા ક્રમે છે. રિપોર્ટમાં એ પણ જણાવાયું છે કે એમએસ ધોની ન રમવાના કારણે CSKની બ્રાન્ડ વેલ્યુની વૃદ્ધિની ગતિ થોડી ધીમી પડી છે, જે દર્શાવે છે કે ટીમો માટે હવે ભવિષ્યની યોજનાઓ કેટલી મહત્વપૂર્ણ બની ગઈ છે.
બાકીની ટીમોની સ્થિતિ
લીગની અન્ય ટીમોની બ્રાન્ડ વેલ્યુમાં પણ સારો વધારો નોંધાયો છે. સનરાઇઝર્સ હૈદરાબાદ 168 મિલિયન ડોલર (અંદાજે 1,604 કરોડ રૂપિયા) સાથે પાંચમા ક્રમે પહોંચી ગઈ છે. ત્યારબાદ રાજસ્થાન રોયલ્સ 161 મિલિયન ડોલર (અંદાજે 1,537 કરોડ રૂપિયા), પંજાબ કિંગ્સ 158 મિલિયન ડોલર (અંદાજે 1,508 કરોડ રૂપિયા), ગુજરાત ટાઇટન્સ 157 મિલિયન ડોલર (અંદાજે 1,499 કરોડ રૂપિયા), દિલ્હી કેપિટલ્સ 156 મિલિયન ડોલર (અંદાજે 1,489 કરોડ રૂપિયા) અને લખનૌ સુપર જાયન્ટ્સ 122 મિલિયન ડોલર (અંદાજે 1,164 કરોડ રૂપિયા) પર છે.
ટીવી કરતાં મોબાઇલ અને સ્માર્ટ TV પર વધ્યો IPLનો ક્રેઝ
દર્શકોની મેચ જોવાની રીત હવે સંપૂર્ણપણે બદલાઈ ગઈ છે. જિઓસ્ટાર મુજબ, 2026ની સીઝન કુલ 106 કરોડ સ્ક્રીન્સ પર જોવામાં આવી હતી. સ્માર્ટ TV પર મેચ જોનારા લોકોની સંખ્યામાં 26 ટકા જેટલો જબરદસ્ત વધારો થયો, જ્યારે પરંપરાગત સામાન્ય TV પર દર્શકોની સંખ્યા 18.8 ટકા ઘટી ગઈ. માત્ર ઓપનિંગ વીકએન્ડમાં જ 51.5 કરોડ દર્શકોએ મેચ નિહાળી હતી. સમગ્ર સીઝનમાં IPLની કુલ આવક 1.8 બિલિયન ડોલર એટલે કે અંદાજે 17,180 કરોડ રૂપિયા પાર પહોંચી ગઈ.
