Neeru Dhanda: જ્યારે જીંદ જિલ્લાના સંગતપુરા ગામની રહેવાસી સુદેશ દેવી BPL રાશન કાર્ડ પર અનાજ લેવા માટે ઘરેથી નીકળ્યા હતા ત્યારે તેમને અંદાજો પણ નહોતો કે તેમની દીકરી સાત સમુદ્ર પાર જાપાનમાં તિરંગો ફરકાવવા જઈ રહી છે. 2026 એશિયન ગેમ્સમાંથી આવેલા આ સમાચારે સમગ્ર પરિવારનું જીવન બદલી નાખ્યું. માતા સુદેશે આપેલા પોતાના ઇન્ટરવ્યૂમાં જણાવ્યું કે તેઓ ગરીબી રેખા હેઠળ મળતું રાશન લેવા જઈ રહી હતી ત્યારે તેમને નીતૂના ગોલ્ડ મેડલ જીતવાની જાણ થઈ. એક તરફ રાશન લેવા માટેની મજબૂરી હતી તો બીજી તરફ પોડિયમ પર સૌથી ઉપર ઊભેલી તેમની દીકરી નીતૂ ધાંડા, જેમણે એશિયન ગેમ્સની મહિલા ટ્રેપ શૂટિંગ સ્પર્ધામાં ભારત માટે પ્રથમ વ્યક્તિગત ગોલ્ડ મેડલ જીતીને ઇતિહાસ રચ્યો.
30માંથી 28 સચોટ નિશાન અને નવો એશિયન રેકોર્ડ
26 વર્ષની નીતૂએ નિશાનબાજીના ફાઇનલ રાઉન્ડમાં જબરદસ્ત એકાગ્રતા દર્શાવી. તેમણે 30માંથી 28 નિશાન એકદમ સચોટ લગાવ્યાં અને નવો એશિયન ગેમ્સ રેકોર્ડ સ્થાપિત કર્યો. ચીનની દિગ્ગજ નિશાનબાજ સન યુનૉંગ 26 અંકો સાથે બીજા સ્થાને રહી. નીતૂ માટે આ મેડલ માત્ર એક રમત સ્પર્ધાની જીત નથી પરંતુ તે લાંબા આર્થિક અને સામાજિક સંઘર્ષનું પરિણામ છે જેને તેમના પરિવારે વર્ષો સુધી સહન કર્યો છે.
કબડ્ડીના મેદાનથી ગન હાથમાં લેવા સુધીની કહાની
નીતૂ શરૂઆતથી શૂટિંગમાં નહોતી. તેઓ શાળા અને રાજ્ય સ્તરે કબડ્ડી રમતી હતી. વર્ષ 2018માં જ્યારે તેમના પિતરાઈ ભાઈ લક્ષ્ય શ્યોરાણે જકાર્તા એશિયન ગેમ્સમાં સિલ્વર જીત્યો ત્યારે નીતૂના મનમાં પણ આ રમત અપનાવવાનો વિચાર આવ્યો. સુદેશ દેવીએ ધ ઇન્ડિયન એક્સપ્રેસને આપેલા પોતાના નિવેદનમાં કહ્યું, ‘અમારી પાસે માત્ર બે એકર જમીન અને કેટલાક પશુઓ છે. નીતૂ કબડ્ડી રમતી હતી, પરંતુ લક્ષ્યના મેડલ જીત્યા બાદ તેણે શૂટિંગ કરવાની ઇચ્છા વ્યક્ત કરી. અમારી આર્થિક સ્થિતિ એવી નહોતી કે અમે ગન ખરીદી શકીએ અથવા તાલીમનો ખર્ચ ઉઠાવી શકીએ.’
તળાવ કિનારે ટીનના ડબ્બા પર સાધ્યાં શરૂઆતના નિશાન
જ્યારે ખિસ્સો ખાલી હોય ત્યારે મોંઘી રમતોનું સપનું જોવું પણ મુશ્કેલ બની જાય છે. આવી સ્થિતિમાં નીતૂના કાકા સોમવીર શ્યોરાણ મદદ માટે આગળ આવ્યા. શરૂઆતમાં નીતૂ પાસે અભ્યાસ માટે પોતાની રાઇફલ પણ નહોતી તેથી તેઓ લક્ષ્યની ગનથી જ પ્રેક્ટિસ કરતી હતી. ટાઇમ્સ ઑફ ઇન્ડિયાને આપેલા પોતાના નિવેદનમાં નીતૂએ તે સમયને યાદ કરતાં કહ્યું, ‘મારા કાકા મને એક તળાવ પાસે લઈ ગયા અને તેમણે મને ટીનના એક નાના ટુકડા પર નિશાન સાધવા કહ્યું. મેં મારી જાતને કહ્યું કે ચાલો જોઈએ હું શું કરી શકું છું, અને મેં તે પરીક્ષા પાસ કરી લીધી.’ ત્યારબાદ તેઓ ઔપચારિક કોચિંગ માટે મધ્ય પ્રદેશ રાજ્ય શૂટિંગ અકાદમી (ભોપાલ) પહોંચ્યાં.
ભારતીય સેનામાં નાયબ સુબેદાર
આજે નીતૂ ભારતીય સેનાની કોર ઑફ મિલિટરી પોલીસમાં નાયબ સુબેદારના પદ પર તૈનાત છે અને મહૂ સ્થિત આર્મી માર્ક્સમેનશિપ યુનિટમાં પોતાની તાલીમ કરે છે. રમત મંત્રાલયે તેમને TOPS સ્કીમના ડેવલપમેન્ટ ગ્રુપમાં પણ સામેલ કર્યા છે. 2022માં આંતરરાષ્ટ્રીય ડેબ્યૂ કરનારી નીતૂએ 2025 એશિયન શૂટિંગ ચેમ્પિયનશિપમાં ગોલ્ડ જીત્યો હતો.
