Virat Kohli SENA Record: વિરાટ કોહલી દરેક મેચમાં કોઈને કોઈ મોટો રેકોર્ડ તોડી રહ્યા છે. તેમાં મોટાભાગે બેટિંગના રેકોર્ડ સચિન તેંડુલકરના હોય છે. ન્યૂઝીલેન્ડ સામેની વનડે શ્રેણીની પ્રથમ મેચમાં વિરાટના બેટમાંથી 74 રનની ઇનિંગ જોવા મળી. ત્રીજા ક્રમે ઉતર્યા બાદ તેમણે આક્રમક બેટિંગ કરી. 51 બોલની ઇનિંગમાં પૂર્વ ભારતીય કેપ્ટને 13 ચોગ્ગા ઉપરાંત એક છગ્ગો પણ ફટકાર્યો. વરસાદથી પ્રભાવિત મેચમાં ભારતને DLS નિયમ હેઠળ જીત મળી.
SENA દેશો સામે વિરાટના સૌથી વધુ 50+ સ્કોર
વિરાટ કોહલી આંતરરાષ્ટ્રીય ક્રિકેટમાં SENA દેશો એટલે કે દક્ષિણ આફ્રિકા, ઇંગ્લેન્ડ, ન્યૂઝીલેન્ડ અને ઓસ્ટ્રેલિયા સામે સૌથી વધુ 50+ સ્કોર બનાવનાર બેટ્સમેન બની ગયા છે. આ ચાર દેશો સામે વિરાટના નામે 417 ઇનિંગ્સમાં 134 ફિફ્ટી પ્લસ સ્કોર નોંધાયા છે. તેમાં 45 સદીની સાથે 89 અડધી સદીનો સમાવેશ થાય છે. SENA દેશો સામે વિરાટે અત્યાર સુધી 321 મેચની 385 ઇનિંગ્સમાં બેટિંગ કરી છે. તેમની સરેરાશ 48.19ની છે.
મહાન સચિન તેંડુલકરના નામે SENA દેશો સામે 133 ફિફ્ટી પ્લસ સ્કોર છે. તેમણે 50 સદી ઉપરાંત 83 અડધી સદી ફટકારી છે. 1990માં સચિને SENA દેશ સામે પોતાની પ્રથમ મેચ રમી હતી. 328 મેચની 417 ઇનિંગ્સમાં તેમણે 45.97ની સરેરાશથી 17,794 રન બનાવ્યા છે. SENA સામે સચિન સૌથી વધુ રન બનાવનાર બેટ્સમેન પણ છે.
SENA દેશો સામે સૌથી વધુ 50+ સ્કોર
| બેટ્સમેન | 50+ સ્કોર |
|---|---|
| વિરાટ કોહલી | 134 |
| સચિન તેંડુલકર | 133 |
| બ્રાયન લારા | 100 |
| કુમાર સંગાકારા | 97 |
ચારેય SENA દેશોમાં સરેરાશ 50થી વધુ થઈ
વિરાટ કોહલીની ચારેય SENA દેશોમાં વનડેમાં બેટિંગ સરેરાશ 50થી વધુ થઈ ગઈ છે. આવું કરનાર તેઓ એકમાત્ર બેટ્સમેન છે. આ મેચ પહેલાં ન્યૂઝીલેન્ડમાં કોહલીની સરેરાશ 49.66 હતી. 74 રનની ઇનિંગ બાદ તે વધીને 51.53 થઈ ગઈ છે. દક્ષિણ આફ્રિકામાં ભારતીય ટીમના ત્રીજા ક્રમના બેટ્સમેનની સરેરાશ 76.38, ઇંગ્લેન્ડમાં 51.48, ન્યૂઝીલેન્ડમાં 51.53 અને ઓસ્ટ્રેલિયામાં 50.03 છે.
