Yashasvi Jaiswal Ranji Trophy comeback: ઓસ્ટ્રેલિયા સામેની ODI અને આગામી T20 શ્રેણીમાં સ્થાન ન મળવાને કારણે યુવા ઓપનિંગ બેટ્સમેન યશસ્વી જયસ્વાલે મોટો નિર્ણય લીધો છે. ઓસ્ટ્રેલિયાના પ્રવાસ દરમિયાન ત્રણેય ODI મેચમાં પ્લેઇંગ ઇલેવનમાં સ્થાન ન મળતાં અને T20 ટીમમાં પણ પસંદગી ન થતાં, જયસ્વાલ હવે ભારત પરત ફર્યા છે અને સ્થાનિક ક્રિકેટમાં રણજી ટ્રોફી રમવા માટે તૈયાર છે. અહેવાલ મુજબ, જયસ્વાલે 42 વખતની ચેમ્પિયન મુંબઈ ક્રિકેટ એસોસિએશનને જાણ કરી છે કે તે રણજી ટ્રોફીના ત્રીજા રાઉન્ડ માં ટીમ માટે રમશે. તેમનું ધ્યાન હવે દક્ષિણ આફ્રિકા સામેની આગામી ટેસ્ટ શ્રેણીમાં ટીમ ઇન્ડિયામાં વાપસી કરવા પર છે, જ્યાં તે નિયમિતપણે સારું પ્રદર્શન કરી રહ્યા છે.
ઓસ્ટ્રેલિયા પ્રવાસ પર ODI ટીમમાં તક ન મળી
ભારત અને ઓસ્ટ્રેલિયા વચ્ચે રમાયેલી ત્રણ મેચની ODI શ્રેણી દરમિયાન યશસ્વી જયસ્વાલને ટીમમાં ઓપનિંગ બેટ્સમેન તરીકે સામેલ કરવામાં આવ્યો હતો, પરંતુ એકપણ મેચમાં તેને પ્લેઇંગ ઇલેવનમાં સ્થાન મળ્યું ન હતું. ઓસ્ટ્રેલિયા પ્રવાસ દરમિયાન ટીમની કમાન શુભમન ગિલના હાથમાં હતી અને ઓપનિંગમાં રોહિત શર્માએ ગિલ સાથે ભાગીદારી કરી હતી, જ્યારે વિરાટ કોહલી ત્રીજા નંબર પર બેટિંગ માટે આવ્યો હતો. આ મજબૂત બેટિંગ લાઇનઅપને કારણે જયસ્વાલ આખી શ્રેણી દરમિયાન માત્ર બેન્ચ પર બેઠા જોવા મળ્યા હતા અને એકપણ વાર મેદાનમાં ઉતરી શક્યા નહોતા.
T20 ટીમમાં પણ પસંદગી ન થતાં રણજી તરફ પ્રયાણ
ODI શ્રેણીમાં તક ન મળ્યા બાદ યશસ્વી જયસ્વાલને આગામી T20 શ્રેણી માટે પણ ભારતીય ટીમમાં પસંદ કરવામાં આવ્યો નથી, જે 29 ઓક્ટોબર થી શરૂ થવાની છે. આ T20 શ્રેણી માટે સૂર્યકુમાર યાદવની કેપ્ટનશીપ હેઠળ અભિષેક શર્મા, જસપ્રીત બુમરાહ, તિલક વર્મા અને રિંકુ સિંહ જેવા ખેલાડીઓ ઓસ્ટ્રેલિયા પહોંચી ચૂક્યા છે. જોકે, ટીમમાં સ્થાન ન મળતાં, ભારતના આ વિસ્ફોટક ઓપનિંગ બેટ્સમેને ઓસ્ટ્રેલિયાથી પરત ફરવાનો નિર્ણય લીધો છે.
42 વખતની ચેમ્પિયન મુંબઈ ટીમમાં વાપસી
ટીમ ઈન્ડિયાની બંને લિમિટેડ ઓવરની શ્રેણીમાં અવગણના થયા બાદ યશસ્વી જયસ્વાલે મોટો નિર્ણય લીધો છે અને હવે તે સ્થાનિક ક્રિકેટમાં પોતાના પ્રદર્શન પર ધ્યાન કેન્દ્રિત કરશે. જયસ્વાલ હવે રણજી ટ્રોફી માં મુંબઈ તરફથી રમશે. મુંબઈની ટીમ ભારતીય ઘરેલું ક્રિકેટમાં સૌથી સફળ ટીમ છે, જે અત્યાર સુધીમાં 42 વખત રણજી ટ્રોફી જીતી ચૂકી છે. ઇન્ડિયન એક્સપ્રેસના અહેવાલ મુજબ, જયસ્વાલે મુંબઈ ક્રિકેટ એસોસિએશન (MCA) ને જાણ કરી દીધી છે કે તે આ સિઝનની રણજી ટ્રોફીમાં રમવા માટે ઉપલબ્ધ છે.
રણજી ટ્રોફીમાં ત્રીજા રાઉન્ડમાં જોડાશે
યશસ્વી જયસ્વાલ હવે 2025-26 રણજી ટ્રોફીના ત્રીજા રાઉન્ડ માં રમવા માટે તૈયાર છે. અહેવાલો મુજબ, તે રાજસ્થાન સામેની મેચમાં મુંબઈનું પ્રતિનિધિત્વ કરતો જોવા મળી શકે છે. જયસ્વાલનો આ નિર્ણય સ્પષ્ટપણે દર્શાવે છે કે તે ટીમ ઈન્ડિયામાં પોતાનું સ્થાન પાછું મેળવવા માટે મેચ પ્રેક્ટિસ અને મોટો સ્કોર કરવા માટે ઉત્સુક છે.
ટેસ્ટ ક્રિકેટમાં વાપસી પર ધ્યાન
યશસ્વી જયસ્વાલ નિયમિતપણે ભારતની ટેસ્ટ ટીમ સાથે સંકળાયેલા છે અને ટેસ્ટ મેચોમાં તેમણે ટીમ માટે અત્યાર સુધી સારું પ્રદર્શન કર્યું છે. ઓસ્ટ્રેલિયા સામેની T20 શ્રેણી સમાપ્ત થયા બાદ ભારત દક્ષિણ આફ્રિકા સામેની મહત્ત્વની ટેસ્ટ શ્રેણી રમવાનું છે. આશા છે કે જયસ્વાલ રણજી ટ્રોફીમાં પ્રભાવશાળી પ્રદર્શન કરીને દક્ષિણ આફ્રિકા સામેની આ ટેસ્ટ શ્રેણીમાં ટીમ ઇન્ડિયામાં શક્તિશાળી વાપસી કરી શકે છે.
